ໃນທ້າຍອາທິດຜ່ານມານີ້ ຢູ່ທີ່ເດີ່ນວັດ ບ້ານປາກຫາດ ເມືອງຜາອຸດົມ ແຂວງບໍ່ແກ້ວ ສະມາຄົມສົ່ງເສີມຄວາມຮູ້ ເພື່ອການພັດທະນາຊົນນະບົດແບບມີສ່ວນຮ່ວມ ຫຼື ສະມາຄົມຄໍາຄິດ ປະຈໍາແຂວງບໍ່ແກ້ວ ໄດ້ນໍາເອົາເຄື່ອງຊ່ວຍເຫຼືອ ແລະ ແນວພັນພືດກະສິກໍາ ມາມອບໃຫ້ຄອບຄົວຜູ້ທີ່ໄດ້ຮັບຜົນກະທົບຈາກໄພພິບັດນໍ້າຖ້ວມ ທີ່ເກີດຈາກລົມພາຍຸຢາກິ ໃນຄັ້ງວັນທີ 9-11 ກັນຍາ 2024 ໃນໄລຍະຜ່ານມາ ແລະ ຄອບຄົວທຸກຍາກ-ຂາດເຂີນ. ນໍາພາທີມງານໂດຍທ່ານ ນາງ ພອນໄຊ ມະນີວົງໄຊ ປະທານ ສະມາຄົມຄໍາຄິດ ປະຈໍາແຂວງບໍ່ແກ້ວ, ເປັນກຽດເຂົ້າຮ່ວມ ຂອງທ່ານ ສົມນິດ ໄຊທະວົງສິດ ຮອງເຈົ້າເມືອງ (ປະທານຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນເມືອງ), ມີໜ້າຂະແໜງການກ່ຽວຂ້ອງຂັ້ນແຂວງ-ຂັ້ນເມືອງເຂົ້າຮ່ວມ.

ເຄື່ອງທີ່ນໍາມາມອບໃນ ຄັ້ງນີ້, ປະກອບມີ ເຂົ້າສານໜຽວ 9,300 ກິໂລ, ຜ້າຮົ່ມໂຕ່ໆ 561 ຜືນ, ແນວພັນຜັກກາດ ແລະ ຜັກຫອມ 748 ປ໋ອງ, ໃນນີ້, ບ້ານປາກຫາດ ມີ 43 ຄອບຄົວ, ບ້ານຫາດຄໍາ 19 ຄອບຄົວ, ບ້ານຫາດຫ້ອມ 32 ຄອບຄົວ, ບ້ານຫາດໜາມ 32 ຄອບຄົວ, ບ້ານຫາດໂຊນ 44 ຄອບຄົວ, ມອບອຸປະກອນການຮຽນ-ການສອນ ແລະ ອຸປະກອນກິລາຈໍານວນໜຶ່ງ ໃຫ້ຄູ, ນ້ອງນັກຮຽນ 3 ໝວດໂຮງຮຽນປະຖົມຄື: ໂຮງຮຽນປະຖົມຫາດໜາມ, ໂຮງຮຽນປະຖົມຫາດຫ້ອມ, ໂຮງຮຽນປະຖົມຫາດໂຊນ ແລະ ໂຮງຮຽນ ມຕ ຫາດໜາມ ລວມມູນຄ່າ 305 ລ້ານກວ່າກີບ.

(ພາບ-ຂ່າວ: ໂສພາ ທິບພະວົງ)