ພິທີປະກາດ ຮັບຮອງເອົາເມືອງໃໝ່ ແຂວງຜົ້ງສາລີ ເປັນເມືອງຢຸດຕິການຖ່າຍຊະຊາຍ ໃນວັນທີ 29 ກໍລະກົດ 2024 ໂດຍມີ ທ່ານ ຄຳເຫລັກ ໃຈອີສານ ຮອງເຈົ້າແຂວງໆຜົ້ງສາລີ ຜູ້ຊີ້ນຳຂົງເຂດວັດທະນະທຳ-ສັງຄົມແຂວງ ພ້ອມດ້ວຍພະນັກງານ ແລະ ປະຊາຊົນພາຍໃນເມືອງເຂົ້າຮ່ວມ.
ທ່ານ ພອນສະຫວັນ ມະນີວົງສີ ຮອງເຈົ້າເມືອງໆໃໝ່ ໄດ້ລາຍງານວ່າ: ເມືອງໃໝ່ເປັນເມືອງໜຶ່ງທີນອນຢູ່ໃນ 7 ເມືອງ ຂອງແຂວງຜົ້ງສາລີ ເປັນເມືອງທີ 4 ຂອງການປະກາດຮັບຮອງເອົາເປັນເມືອງຢຸດຕິການຖ່າຍຊະຊາຍ ເປັນເມືອງທີ່ຕັ້ງຢູ່ທາງພາກໃຕ້ຂອງແຂວງຜົ້ງສາລີ ຢູ່ຫ່າງຈາກເທດສະບານແຂວງ ປະມານ 210 ກິໂລແມັດ ເນື້ອທີ່ສ່ວນໃຫຍ່ເປັນເຂດພູດອຍ ກວມເອົາ 90% ຊຶ່ງແບ່ງອອກເປັນ 10 ກຸ່ມບ້ານ, ມີທັງໝົດ 78 ບ້ານ ມີ 6 ບ້ານ ຂຶ້ນກັບເທສະບານເມືອງ, ປະຊາກອນລວມ 28.317 ຄົນ ຍິງ 13.936 ຄົນ, ມີ 4.984 ຄົວເຮືອນ, ມີ 6.345 ຄອບຄົວ ແລະ ມີ 10 ຊົນເຜົ່າ, ປະຊາຊົນຍຶດຖືເອົາການຜະລິດກະສິກຳເປັນສ່ວນໃຫຍ່. ໃນການຈັດຕັ້ງປະຕິບັດ ວຽກງານຢຸດຕິການຖ່າຍຊະຊາຍ ໃນທົ່ວເມືອງ ມີວິດຖ່າຍ ແລະ ນຳໃຊ້ວິດຖ່າຍ ແມ່ນກວມເອົາ 100% ມີວິດຖ່າຍເປັນຂອງຕົນເອງ 4.702 ຄົວເຮືອນ ໃຊ້ຮ່ວມກັບພີ່ນ້ອງ 282 ຄົວເຮືອນ.
ໃນພິທີດັ່ງກ່າວ ໄດ້ມີການມອບໃບຢັ້ງຢືນບ້ານຢຸດຕິການຖ່າຍຊະຊາຍ ຈຳນວນ 18 ບ້ານ ແລະ ມອບໃບຍ້ອງຍໍໃຫ້ ບຸກຄົນ, ກົມກອງ, ຫ້ອງການ ທີ່ໃຫ້ການຊ່ວຍເຫຼືອວຽກງານດັ່ງກ່າວຕື່ມອີກ.( ຂ່າວ: ວັນວິໄລ)