ໃນວັນທີ30ກໍລະກົດຜ່ານມາ, ທີ່ຫ້ອງວ່າການແຂວງເຊກອງທ່ານເຫຼັກໄຫຼສີວິໄລກຳມະການສູນກາງພັກ, ເລຂາພັກແຂວງ, ເຈົ້າແຂວງເຊກອງໄດ້ຕ້ອນຮັບທ່ານວິໄລວົງບຸດດາຄຳກຳມະການສູນກາງພັກ, ລັດຖະມົນຕີກະຊວງພາຍໃນພ້ອມຄະນະໃນໂອກາດມາເຄື່ອນໄຫວເຮັດວຽກຢູ່ແຂວງເຊກອງ.
ໂອກາດນີ້, ທ່ານເຫຼັກໄຫຼສີວິໄລໄດ້ກ່າວຕ້ອນຮັບແລະລາຍງານສະພາບການນໍາພາ-ຊີ້ນໍາຂອງຄະນະພັກ, ອົງການປົກຄອງແຂວງຕໍ່ວຽກງານພາຍໃນອັນໄດ້ເຮັດໃຫ້ການເຄື່ອນໄຫວວຽກງານພາຍໃນໃນໄລຍະຜ່ານມາມີຜົນສໍາເລັດໂດຍສະເພາະແມ່ນວຽກງານສາມສ້າງ, ວຽກງານປັບປຸງກົງຈັກການຈັດຕັ້ງ, ການບໍລິຫານລັດໃຫ້ຮັດກຸມ, ຖືກຕ້ອງສອດຄ່ອງກັບລະບຽບກົດໝາຍຢ່າງເຂັ້ມງວດ, ໄດ້ຮັບປະສິດທິພາບ, ປະສິດທິຜົນແລະສໍາເລັດຕາມລະດັບຄາດໝາຍທີ່ວາງໄວ້. ພ້ອມນີ້, ທ່ານເຈົ້າແຂວງຍັງໄດ້ສະແດງຄວາມຂອບໃຈຕໍ່ທ່ານລັດຖະມົນຕີພ້ອມຄະນະທີ່ໄດ້ມາເຄື່ອນໄຫວຊຸກຍູ້ວຽກງານພາຍໃນຢູ່ແຂວງເຊກອງຄັ້ງນີ້ທີ່ສະແດງໃຫ້ເຫັນເຖິງຄວາມເປັນຫ່ວງເປັນໃຍຂອງພັກ, ລັດຖະບານທີ່ມີຕໍ່ແຂວງເຊກອງພວກເຮົາ.
ທ່ານວິໄວວົງບຸດດາຄຳກໍໄດ້ກ່າວສະແດງຄວາມຂອບໃຈຕໍ່ທ່ານເຈົ້າແຂວງເຊກອງພ້ອມດ້ວຍການນໍາແຂວງທີ່ໄດ້ໃຫ້ການຕ້ອນຮັບຢ່າງອົບອຸ່ນພ້ອມທັງແຈ້ງຈຸດປະສົງໃນການມາເຄື່ອນໄຫວເຮັດວຽກຢູ່ແຂວງເຊກອງຄັ້ງນີ້, ໃຫ້ທ່ານເຈົ້າແຂວງຊາບ. (ຂ່າວ: ອັດສະວິນ)