ວິທະຍຸກະຈາຍສຽງຫວຽດນາມລາຍງານວ່າ: ວັນທີ 16 ຕຸລາ ຜ່ານມາ ຢູ່ ຮ່າໂນ້ຍ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ໄດ້ໃຫ້ການຕ້ອນຮັບ ທ່ານ ສຸບຣາມານຢາມ ໄຈຊານກາ ລັດຖະມົນຕີການຕ່າງປະເທດ ອິນເດຍ ເນື່ອງໃນໂອກາດມາຢ້ຽມຢາມ ຫວຽດນາມ ຢ່າງເປັນທາງການ ແລະ ເປັນປະທານຮ່ວມກອງປະຊຸມຄັ້ງທີ 18 ຂອງຄະນະກຳມະການຮ່ວມມື ຫວຽດນາມ - ອິນເດຍ ກ່ຽວກັບການຮ່ວມມືດ້ານເສດຖະກິດ-ການຄ້າ ແລະ ວິທະຍາສາດເຕັກໂນໂລຊີ.

ຂ່າວລະບຸວ່າ: ໃນການຕ້ອນຮັບ, ທ່ານ ຟ້າມມິງຈິງ ໄດ້ຖືສຳຄັນໃນການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ - ອິນເດຍ. ທ່ານສະເໜີໃຫ້ກະຊວງການຕ່າງປະເທດ 2 ປະເທດ ສົມທົບກັນ ພະຍາຍາມ, ກະກຽມເປັນຢ່າງດີໃຫ້ແກ່ການເຄື່ອນໄຫວ, ຮັກສາບັນດາກົນໄກຮ່ວມມື 2 ຝ່າຍ, ຕັ້ງໜ້ານຳບັນດາຂົງເຂດຮ່ວມມືເຂົ້າສູ່ສະພາບຕົວຈິງ ແລະ ມີປະສິດທິຜົນກວ່າເກົ່າ. ທ່ານຮຽກຮ້ອງໃຫ້ ອິນເດຍ ຊຸກຍູ້ບັນດາວິສາຫະກິດໃຫຍ່ລົງທຶນເຂົ້າ ຫວຽດນາມ ໃນຂົງເຂດຍຸດທະສາດສຳຄັນຄື: ພື້ນຖານໂຄງລ່າງ, ທ່າກຳປັ່ນ, ການບໍລິການຂົນສົ່ງ, ການຊອກຫາ ແລະ ຂຸດຄົ້ນນ້ຳມັນອາຍແກັສ, ພະລັງງານທົດແທນ.

ທ່ານ ສຸບຣາມານຢາມ ໄຈຊານກາ ລັດຖະມົນຕີການຕ່າງປະເທດ ອິນເດຍ ກໍຢືນຢັນວ່າ: ອິນເດຍ ຖື ຫວຽດນາມ ແມ່ນຄູ່ຮ່ວມມື ສຳຄັນຂອງພາກພື້ນ ໃນການປະຕິບັດນະໂຍບາຍການກະທຳມຸ່ງໄປສູ່ທິດຕາເວັນອອກ ແລະ ເນັ້ນໜັກວ່າ ອິນເດຍ ປາຖະໜາຢາກສືບຕໍ່ຊຸກຍູ້ ການພົວພັນຄູ່ຮ່ວມມືຍຸດທະສາດຮອບດ້ານກັບ ຫວຽດນາມ.