(ໃນໂອກາດວັນສ້າງຕັ້ງກອງທັບ ປະຊາຊົນຈີນ ຄົບຮອບ 97 ປີ, 1/8/1927-1/8/2024)

ລັດຖະບານຈີນ ໄດ້ປະກາດປື້ມປົກຂາວກ່ຽວກັບ; “ກິດຈະການປ້ອງກັນປະເທດຈີນໃນຍຸກໃໝ່” ໂດຍລະບຸເຖິງນະໂຍບາຍວຽກງານປ້ອງກັນປະເທດຂອງ ສປ ຈີນ ໃນຍຸກໃໝ່ດ້ວຍ 6 ດ້ານຢ່າງລະອຽດ. ພ້ອມທັງກໍານົດທິດທາງຍຸດທະສາດຫຼັກການພື້ນຖານ ແລະ ຄວາມສໍາຄັນລະດັບໂລກ ຂອງກິດຈະການປ້ອງກັນປະເທດຈີນ ແລະ ການສ້າງກໍາລັງທະຫານຂອງຈີນ ຢ່າງຊັດເຈນ ໂດຍສະແດງເຖິງການເປີດກວ້າງຄວາມໂປ່ງໃສ ແລະ ຄວາມໝັ້ນຄົງ.

ນອກຈາກນັ້ນ, ປື້ມປົກຂາວດັ່ງກ່າວ ຍັງໄດ້ລະບຸຢ່າງຊັດເຈນ ເປັນຄັ້ງທໍາອິດວ່າ: ກິດຈະການວຽກງານປ້ອງກັນປະເທດຈີນ ໃນຍຸກໃໝ່ ມີເອກະລັກສະເພາະຢ່າງເດັ່ນຊັດຄື: ບໍ່ດໍາເນີນນະໂຍບາຍລັດທິຄອງຄວາມເປັນໃຫຍ່ ແລະ ບໍ່ຂະຫຍາຍອິດທິພົນ ໂດຍຖືການສ້າງປະຊາຄົມ ທີ່ມີອະນາຄົດຮ່ວມກັນຂອງມວນມະນຸດ ເປັນພາລະກິດສໍາຄັນລະດັບໂລກ ຂອງກິດຈະການປ້ອງກັນປະເທດຈີນ ໃນຍຸກໃໝ່ເປັນຄັ້ງທໍາອິດ. ນີ້ຖືເປັນຄວາມກ້າວໜ້າທີ່ສໍາຄັນຂອງນະໂຍບາຍ ປ້ອງກັນປະເທດຈີນ ແລະ ສະແດງໃຫ້ເຫັນເຖິງເອກະ ລັກແຫ່ງຍຸກສະໄໝ.

ອີງຕາມຂໍ້ມູນຈາກຊີອາໄອ, ນະໂຍບາຍປ້ອງກັນປະເທດຈີນ ໄດ້ຢືນຢັນແນວຄິດຫຼັກ ໂດຍເນັ້ນການປ້ອງກັນມາໂດຍຕະຫຼອດ ຊຶ່ງສອດຄ່ອງກັບນະໂຍບາຍທາງການທູດຂອງຈີນ ທີ່ເນັ້ນຫຼັກການ 5 ປະການ ດ້ານການຢູ່ຮ່ວມກັນຢ່າງສັນຕິຂອງຈີນ.

ປື້ມປົກຂາວດັ່ງກ່າວ ຍັງລະບຸອີກວ່າ: ເປົ້າໝາຍພື້ນຖານດ້ານປ້ອງກັນຊາດຂອງຈີນ ໃນຍຸກໃໝ່ຄື: ຄຸ້ມຄອງອະທິປະໄຕ, ຄວາມໝັ້ນຄົງ ແລະ ຜົນປະໂຫຍດດ້ານການພັດທະນາປະເທດຊາດ ໂດຍມີເອກະລັກຢືນຢັນ ບໍ່ດໍາເນີນນະໂຍບາຍລັດທິຄອງຄວາມເປັນໃຫຍ່ ແລະ ບໍ່ຂະຫຍາຍອິດທິພົນ ຢ່່າງຖາວອນ.

ໃນຍຸກໃໝ່ ບົນຫຼັກການ; “ໃຫ້ບໍລິການປະຊາຊົນ” ຂອງກິດຈະການປ້ອງກັນປະເທດຈີນ ໄດ້ຈະຫຍາຍຂອບເຂດລວມເຖິງໃຫ້ບໍລິການປະຊາຄົມໂລກ ຊຶ່ງສະແດງໃຫ້ເຫັນວ່າ: ຈີນ ຈະເປັນຜູ້ພິທັກສັນຕິ ພາບໂລກ ຢ່າງຖາວອນ.

ໄລຍະຜ່ານມາ, ຈີນ ໄດ້ປະກາດລາຍງານປື້ມປົກຂາວ; “ການປ້ອງກັນປະເທດຈີນ ໃນສັກກະລາດໃໝ່” ໂດຍຊີ້ອອກວ່າ: ປະເທດຈີນ ຢືນຢັນຫຼັກການ ຈະບໍ່ໃຊ້ອໍານາດຄອບງໍາ, ບໍ່ແຜ່ຂະຫຍາຍ ແລະ ສະແຫວງຫາອິດທິພົນ. ນີ້ຄືຄຸນສົມບັດທີ່ໂດດເດັ່ນຂອງການປ້ອງກັນປະເທດຂອງຈີນ ໃນຍຸກໃໝ່. ປື້ມປົກຂາວດັ່ງກ່າວເນັ້ນວ່າ: ຈີນ ຢືນຢັນໃນຄວາມເປັນເພື່ອນ, ແຕ່ບໍ່ສ້າງພັນທະມິດ ບໍ່ເຂົ້າຮ່ວມກຸ່ມທະຫານໃດໆ ຕໍ່ຕ້ານການຮຸກຮານ ແລະ ແຜ່ຂະຫຍາຍອິດທິພົນ, ຄັດຄ້ານການໃຊ້ກໍາລັງ ຫຼື ຂົ່ມຂູ່ດ້ວຍກໍາລັງ. ການກໍ່ສ້າງ ແລະ ພັດທະນາການປ້ອງກັນປະເທດຂອງຈີນ ເນັ້ນການຕອບສະໜອງຄວາມຕ້ອງການຮັກສາຄວາມປອດໄພໂດຍຊອບທໍາຂອງຕົນເອງ ເປັນການເຕີບໂຕຂອງກໍາລັງ ເພື່ອສັນຕິພາບຂອງໂລກ ຕະຫຼອດໄປ. ປະຫວັດສາດຈະພິສູດໃຫ້ເຫັນວ່າ: ຈີນ ຈະບໍ່ມີວັນແລ່ນຕາມແນວຄິດຄອງຄວາມເປັນໃຫຍ່, ຈະບໍ່ເດີນຕາມເສັ້ນທາງສາຍເກົ່າຂອງ “ປະເທດທີ່ມີພະລັງແຂງແກ່ນຕ້ອງເປັນເຈົ້າໂລກ”. ບໍ່ວ່າຈະພັດທະນາໄປເຖິງຂັ້ນຕອນໃດໃນອະນາຄົດ, ຈີນ ບໍ່ເປັນໄພຄຸກຄາມຕໍ່ໃຜ, ຈະບໍ່ພະຍາຍາມແຜ່ຂະຫຍາຍ ແລະ ສ້າງຂອບເຂດອິດທິພົນ ອີກດ້ວຍ.