ສະຖາບັນຍຸຕິທໍາແຫ່ງຊາດ ກະຊວງຍຸຕິທໍາ ແລະ ກົມກໍ່ສ້າງກໍາລັງ ກົມໃຫຍ່ການເມືອງ ກະຊວງປ້ອງກັນຄວາມສະຫງົບ ໄດ້ເຊັນບົດບັນທຶກການຮ່ວມມື ວ່າດ້ວຍ ກໍ່ສ້າງບຸກຄະລາກອນທາງດ້ານກົດໝາຍ ໃຫ້ກະຊວງປ້ອງກັນຄວາມສະຫງົບ.
ພິທີດັ່ງກ່າວ ໄດ້ຈັດຂຶ້ນເມື່ອບໍ່ດົນຜ່ານມາ ທີ່ ຂອງສະຖາບັນຍຸຕິທໍາແຫ່ງຊາດ, ກະຊວງຍຸຕິທໍາ. ຕາງໜ້າກະຊວງປ້ອງກັນຄວາມສະຫງົບ ເຂົ້າຮ່ວມລົງນາມ ໂດຍ ທ່ານ ພັອ ບຸນມີ ມັກຄະວານ, ຫົວໜ້າກົມກໍ່ສ້າງກົມໃຫຍ່ການເມືອງ ກະຊວງປ້ອງກັນຄວາມສະຫງົບ , ຕາງໜ້າໃຫ້ສະຖາບັນຍຸຕິທໍາແຫ່ງຊາດ ໂດຍ ທ່ານ ປະເສີດ ສະຫວ່າງດີ, ຫົວໜ້າ ສະຖາບັນຍຸຕິທໍາແຫ່ງຊາດ, ພ້ອມດ້ວຍພະນັກງານທັງສອງເຂົ້າຮ່ວມ.
ຈຸດປະສົງຂອງການເຊັນບົດບັນທຶກການຮ່ວມມືໃນຄັ້ງນີ້ ແມ່ນເພື່ອເປັນການຜັນຂະຫຍາຍມະຕິຂອງຄະນະບໍລິຫານງານ ສູນກາງພັກ ສະບັບເລກທີ 037/ຄບສພ, ລົງວັນທີ 18 ມິຖຸນາ 2018 ວ່າດ້ວຍ ການຍົກສູງປະສິດທິພາບການຄຸ້ມຄອງລັດຄຸ້ມຄອງສັງຄົມດ້ວຍກົດໝາຍ, ເປັນການຜັນຂະຫຍາຍມະຕິກົມການເມືອງ ສູນກາງພັກ ສະບັບເລກທີ 112/ ກມສພ ລົງວັນທີ 20 ມິຖຸນາ 2020 ວ່າດ້ວຍການຍົກສູງຄຸນນະພາບ ການດໍາເນີນຄະດີ ຕາມຂະບວນຍຸຕິທໍາ ແລະ ເປັນການຜັນຂະຫຍາຍມະຕິຂອງກົມການເມືອງສູນການພັກ ສະບັບເລກທີ 030/ ກມສພ ລົງວັນທີ 3 ມັງກອນ 2018 ວ່າດ້ວຍມາດຕະການຂອງພະນັກງານ ນໍາພາ-ຄຸ້ມຄອງ.
ບົດບັນທຶກດັ່ງກ່າວໄດ້ເໜັ້ນໃສ່ສ້າງບຸກຄະລາກອນ ນາຍ ແລະ ພົນຕໍາຫຼວດທີ່ເປັນບຸກຄົນດີເດັ່ນ, ເປັນບຸກຄົນທີໄດ້ຮັບຄວາມໄວ້ວາງໃຈຈາກກົມກອງ ເຂົ້າຮ່ວມໃນການສຶກສາກົດໝາຍເພື່ອເປັນກໍາລັງແຮງໃນການຜັນຂະຫຍາຍມະຕິດັ່ງກ່າວ.(ຂ່າວ: ສະຖາບັນຍຸຕິທໍາແຫ່ງຊາດ)