(ສພຊ). ເພື່ອເປັນການຜັນຂະຫຍາຍ ແລະ ຈັດຕັ້ງປະຕິບັດແຜນດຳເນີນງານຂອງຄະນະປະຈຳສະພາແຫ່ງຊາດ ໄລຍະ 5 ປີ (2021-2025) ໂດຍສະເພາະການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ(ສສຂ) ແລະ ພະນັກງານທີ່ເປັນເສນາທິການ ໃຫ້ມີປະສິດທິຜົນ ແນໃສ່ຍົກສູງການປະຕິບັດພາລະບົດບາດ, ສິດ ແລະ ໜ້າທີ່ຂອງບັນດາກຳມາທິການ, ຄະນະເລຂາທິການ, ສະຖາບັນຄົ້ນຄວ້ານິຕິກຳ ແລະ ສະພາປະຊາຊົນຂັ້ນແຂວງ(ສພຂ)ຕາມທີ່ໄດ້ກຳນົດໄວ້ໃນລັດຖະທໍາມະນູນ, ກົດໝາຍ ແລະ ແຜນການເຄື່ອນໄຫວຂອງແຕ່ລະພາກສ່ວນ ທັງເປັນການພັດທະນາວິທະຍາກອນຂອງ ສພຂ ໃຫ້ເປັນເອກະພາບ ລວມສູນ ແລະ ລົງເລິກສະເພາະດ້ານ ທັງຮັບປະກັນດ້ານເນື້ອໃນຫົວຂໍ້, ຫຼັກສູດ, ຄູ່ມືການສອນ ຢ່າງມີຈຸດສຸມ, ຍົກສູງປະສິດທິພາບ ແລະ ປະສິດທິຜົນ ໃນການສະເໜີ, ອະທິບາຍເນື້ອໃນບົດຮຽນ ແລະ ການຄົ້ນຄວ້າເອກະສານ ໃຫ້ແກ່ ສສຂດີຂຶ້ນກວ່າເກົ່າ;ສະພາແຫ່ງຊາດຈຶ່ງໄດ້ຈັດກອງປະຊຸມຝຶກອົບຮົມການເປັນວິທະຍາກອນໃຫ້ແກ່ພະນັກງານນຳພາ-ຄຸ້ມຄອງຂັ້ນສູງຂອງສະພາປະຊາຊົນຂັ້ນແຂວງໃນວັນທີ 15-16ສິງຫາ 2024 ທີ່ເມືອງວັງວຽງແຂວງວຽງຈັນໂດຍການເປັນປະທານຂອງທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ, ເຂົ້າຮ່ວມມີທ່ານ ນາງ ອຳໄພວອນ ລ້ອມບຸນແພງ ເລຂາທິການສະພາແຫ່ງຊາດ, ບັນດາທ່ານປະທານ-ຮອງປະທານ ສພຂ ທົ່ວປະເທດ, ຫົວໜ້າ-ຮອງຫົວໜ້າສະຖາບັນຄົ້ນຄວ້ານິຕິກຳ, ວິທະຍາກອນຮັບເຊີນ, ຄະນະກົມ, ຄະນະພະແນກ ແລະ ພາກສ່ວນທີ່ກ່ຽວຂ້ອງ.

ທ່ານ ຈະເລີນ ເຢຍປາວເຮີ ໄດ້ມີຄຳເຫັນວ່າ: ການຝຶກອົບຮົມເປັນວິທະຍາກອນຄັ້ງນີ້ ເປັນກອງປະຊຸມວິຊາການ ລົງເລິກຫົວຂໍ້“ເປັນວິທະຍາກອນ” ຊຶ່ງມີຄວາມໝາຍສໍາຄັນ ແລະ ຈໍາເປັນຢ່າງພາວະວິໄສ ສໍາລັບພະນັກງານນໍາພາ-ຄຸ້ມຄອງຂັ້ນສູງຂອງສະພາປະຊາຊົນຂັ້ນແຂວງກໍຄືພະນັກງານນໍາພາ-ຄຸ້ມຄອງທົ່ວໄປຂອງພັກ, ລັດ, ແນວລາວສ້າງຊາດ, ສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນໃນລະບົບການເມືອງ ປະຊາທິປະໄຕ ປະຊາຊົນຂັ້ນຕ່າງໆ;ຍ້ອນວ່າພະນັກງານນຳພາ-ຄຸ້ມຄອງຂອງສະພາປະຊາຊົນຂັ້ນແຂວງນອກຈາກມີພາລະບົດບາດເປັນພະນັກງານນຳພາ-ຄຸ້ມຄອງຂອງພັກ, ລັດ ແລະ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ກໍຄືສະພາປະຊາຊົນຂັ້ນແຂວງແລ້ວ ຍັງປະຕິບັດພາລະບົດບາດເປັນຕົວແທນໃຫ້ແກ່ສິດ ແລະ ຜົນປະໂຫຍດຂອງປະຊາຊົນບັນດາເຜົ່າໃນແຕ່ລະເຂດເລືອກຕັ້ງ. ດັ່ງນັ້ນ, ການຝຶກອົບຮົມການເປັນວິທະຍາກອນຍິ່ງມີບົດບາດສຳຄັນສຳລັບແຕ່ລະທ່ານຊຶ່ງເນື້ອໃນພົວພັນກັບຫຼາຍບັນຫາຢ່າງກວ້າງຂວາງ ແລະ ເລິກເຊິ່ງ.

ໃນກອງປະຊຸມໄດ້ຮັບຟັງບົດຮຽນໃນຫົວຂໍ້: ບົດບາດຂອງວິທະຍາກອນ ແລະຫຼັກການເວົ້າຂອງວິທະຍາກອນ ສະເໜີໂດຍທ່ານ ນາງ ບຸນເພັງ ມູນໂພໄຊ ອະດີດລັດຖະມົນຕີປະຈຳສຳນັກງານນາຍົກລັດຖະມົນຕີ, ການສ້າງຄວາມເຊື່ອໝັ້ນສຳລັບວິທະຍາກອນ ແລະ ນັກປາຖະກະຖາ ສະເໜີໂດຍທ່ານ ສີພຸກ ວົງພັກດີ ອະດີດຮອງລັດຖະມົນຕີກະຊວງພາຍໃນ, ຄວາມຮູ້ພື້ນຖານການເປັນວິທະຍາກອນຂອງສະພາແຫ່ງຊາດ ສະເໜີໂດຍທ່ານ ສຸບັນ ສະວະບຸດ ປະທານກຳມາທິການວຽກງານສະມາຊິກສະພາແຫ່ງຊາດ;ຈາກນັ້ນ, ບັນດາຜູ້ເຂົ້າຮ່ວມໄດ້ສຸມສະຕິປັນຍາຄົ້ນຄວ້າ, ສົນທະນາແລກປ່ຽນຄຳຄິດຄຳເຫັນຢ່າງຈິງຈັງ ແລະ ກົງໄປກົງມາຕໍ່ເນື້ອໃນແຕ່ລະຫົວຂໍ້.

ກອງປະຊຸມຄັ້ງນີ້ ໄດ້ຮັບການສະໜັບສະໜູນງົບປະມານຊ່ວຍເຫຼືອຈາກມູນນິທິເອເຊຍ (TAF) ແລະ ງົບປະມານສົມທົບຈາກຄະນະເລຂາທິການສະພາແຫ່ງຊາດ.

(ຂ່າວ-ພາບ: ນາງ ສຸພາວັນ ຫອມສະນິດ)