ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 15 ຕຸລາ ຜ່ານມາ ຢູ່ ຮ່າໂນ້ຍ, ທ່ານ ເວືອງດິ່ງເຫວ້ ປະທານສະພາແຫ່ງຊາດ ຫວຽດນາມ ໄດ້ເປັນປະທານພິທີຕ້ອນຮັບ ທ່ານ ເວຍເຊສລາຟ ວິກໂຕໂຣວິສ ໂວໂລດິນ ປະທານສະພາຕ່ຳ ຣັດເຊຍ. ທ່ານ ເວຍເຊສລາຟ ວິກໂຕໂຣວິສ ໂວໂລດິນ ໄດ້ນໍາພາຄະນະຜູ້ແທນຂັ້ນສູງ ຣັດເຊຍ ມາຢ້ຽມຢາມ ຫວຽດນາມ ຢ່າງເປັນທາງການ ໃນວັນທີ 15 – 16 ຕຸລາ ນີ້ ຕາມຄໍາເຊີນຂອງ ທ່ານ ເວືອງດິ່ງເຫວ້, ພາຍຫຼັງພິທີຕ້ອນຮັບ, ສອງຝ່າຍໄດ້ດຳເນີນການພົບປະເຈລະຈາ.

ຂ່າວລະບຸວ່າ: ໃນການພົບປະເຈລະຈາ, ການນຳສອງທ່ານໄດ້ສະເໜີວ່າ: ສອງຝ່າຍຕ້ອງສືບຕໍ່ເພີ່ມທະວີການພົບປະແລກປ່ຽນຄະນະຜູ້ແທນຂັ້ນສູງທຸກຂັ້ນ ເພື່ອສືບຕໍ່ຊຸກຍູ້ການພົວພັນຮ່ວມມືໃຫ້ມີປະສິດທິຜົນ ດ້ວຍທຸກຊ່ອງທາງ, ໂດຍສະເພາະແມ່ນຊ່ອງທາງພັກ ແລະ ສະພາແຫ່ງຊາດ. ສອງຝ່າຍໄດ້ເຫັນດີສົມທົບກັນໃນບັນດາເວທີປາໄສຫຼາຍຝ່າຍ, ອາຊຽນ ແລະ ສປຊ. ກ່ຽວກັບການຮ່ວມມືລະຫວ່າງສະພາແຫ່ງຊາດສອງປະເທດ, ການນຳສອງທ່ານກໍໄດ້ເຫັນດີເປັນເອກະພາບ ໂດຍຖືວ່າ ນີ້ແມ່ນໜຶ່ງໃນບັນດາເສົາຄ້ຳສຳຄັນໃນການພົວພັນຮ່ວມມືສອງຝ່າຍ.

ທ່ານ ເວືອງດິ່ງເຫວ້ ກໍສະເໜີໃຫ້ ຣັດເຊຍ ພິຈາລະນາຫຼຸດຜ່ອນລະບຽບການນຳເຂົ້າບັນດາປະເພດຜະລິດຕະພັນກະເສດ - ສິນໃນນ້ຳຂອງ ຫວຽດນາມ; ຊຸກຍູ້ການເຈລະຈາ, ຍົກລະດັບ, ປັບປຸງ, ເພີ່ມເຕີມສັນຍາການຄ້າເສລີ ລະຫວ່າງ ຫວຽດນາມ ແລະ ສະຫະພັນເສດຖະກິດ ອາຊີ - ເອີຣົບ (EAEU), ມຸ່ງໄປເຖິງເປົ້າໝາຍນຳວົງເງິນການຄ້າ ຫວຽດນາມ - ຣັດເຊຍ ໃຫ້ບັນລຸ 10 ຕື້ໂດລາ ໃນປີ 2030.

ທ່ານ ເວຍເຊສລາຟ ວິກໂຕໂຣວິສ ໂວໂລດິນ ກໍສະໜັບສະໜູນບັນດາຂໍ້ສະເໜີຂອງທ່ານປະທານສະພາແຫ່ງຊາດ ຫວຽດນາມ ກ່ຽວກັບການຮ່ວມມືສອງຝ່າຍ. ທ່ານເນັ້ນໜັກເຖິງບົດບາດຂອງ ຄະນະກຳມາທິການຮ່ວມມື ລັດຖະສະພາ ລະຫວ່າງ ຣັດເຊຍ ແລະ ສະພາແຫ່ງຊາດ ຫວຽດນາມ ໃນການປຶກສາຫາລືບັນດາຂໍ້ສະເໜີນີ້ຢ່າງລະອຽດ, ຈາກນັ້ນ ກໍປະກອບສ່ວນເປີດກວ້າງໂຄງການຮ່ວມມືລະຫວ່າງສອງສະພາແຫ່ງຊາດ ແລະ ສອງຊາດ.