ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ສຳນັກງານສະຖິຕິແຫ່ງຊາດຂອງອາຟຣິກາໃຕ້ (Statsa) ໄດ້ເປີດເຜີຍຜົນການສຳຫຼວດສຳມະໂນປະຊາກອນຄັ້ງໃໝ່ ຊຶ່ງພົບວ່າຈຳນວນປະຊາກອນໃນອາຟຣິກາໃຕ້ ເພີ່ມຂຶ້ນຫຼາຍກວ່າ 10 ລ້ານຄົນ ເປັນ 62 ລ້ານຄົນໃນໄລຍະ 10 ປີຜ່ານມາ.

ບົດລາຍງານລະບຸວ່າ: ໂຕເລກດັ່ງກ່າວບົ່ງບອກເຖິງປະຊາກອນໃນປະເທດທີ່ເພີ່ມຂຶ້ນ 19,8% ຈາກເດີມ 51,8 ລ້ານຄົນໃນປີ 2011 ຊຶ່ງເປັນປີທີ່ມີການດຳເນີນການສຳຫຼວດສຳມະໂນປະຊາກອນຄັ້ງຫຼ້າສຸດ. ທ່ານ ໄຊຣິນ ຣາມາໂຟຊາ ປະທານາທິບໍດີຂອງອາຟຣິກາໃຕ້ກ່າວວ່າ: ການສຳຫຼວດສຳມະໂນປະຊາກອນຄັ້ງນີ້ຖືວ່າເປັນຄັ້ງທີ 4 ນັບຕັ້ງແຕ່ການກຳເນີດຂອງປະຊາທິປະໄຕໃນປີ 1994 ແລະ ຍ້ອນເຫດຜົນນີ້ມັນຈຶ່ງມີສ່ວນເຮັດໃຫ້ເກີດອົງກອນຄວາມຮູ້ຢ່າງຫຼວງຫຼາຍທີ່ອະທິບາຍເຖິງລັດ ແລະ ຄວາມກ້າວໜ້າຂອງປະເທດພວກເຮົາ. ທັງນີ້, ການສຳຫຼວດສຳມະໂນປະຊາກອນເມື່ອປີ 2022 ພົບວ່າ: ຊາວອາຟຣິກາໃຕ້ຫຼາຍກວ່າ 81% ເປັນຊາວອາຟຣິກາຜິວສີ ສ່ວນລູກຊອດມີອັດຕາສ່ວນ 8,1%, ຄົນຜິວຂາວມີ 7,3% ແລະ ຊາວອາຟຣິກາເຊື້ອສາຍອິນເດຍ ຫຼື ອາຊີ ມີ 2,7%. ທາງດ້ານ ທ່ານ ຣິເຊນກາ ມາລູເລເກ ຫົວໜ້າຂອງ Statsa ກ່າວວ່າ: ໂຕເລກຂອງປະຊາກອນທີ່ເປັນຄົນຜິວຂາວໃນອາຟຣິກາໃຕ້ນັ້ນໜ້າສົນໃຈ ເນື່ອງຈາກອັດຕາສ່ວນດັ່ງກ່າວຫຼຸດລົງຈາກເດີມ 9% ໃນປີ 2011.

ນອກຈາກນີ້, ການສຳຫຼວດສຳມະໂນປະຊາກອນຍັງພົບວ່າ: ແຂວງກົວເຕງ ຊຶ່ງເປັນສະຖານທີ່ຕັ້ງຂອງເມືອງໂຈຮັນເນສເບີກ ເປັນພາກພື້ນທີ່ມີປະຊາກອນຫຼາຍກວ່າ 15 ລ້ານຄົນ ຖືວ່າສູງທີ່ສຸດໃນອາຟຣິກາໃຕ້ ອີກທັງແຂວງກົວເຕງ ແລະ ແຂວງເວສເທິນເຄບ ກໍຮັບເອົາຜູ້ຢູ່ອາໄສໃໝ່ເປັນຈຳນວນຫຼາຍທີ່ສຸດເຊັ່ນກັນ.