ໃນວັນທີ 23 ສິງຫາ ຜ່ານມາ, ທ່ານ ຄໍາພັນ ພົມມະທັດກໍາມະການກົມການເມືອງສູນກາງພັກເລຂາທິການສູນກາງພັກປະທານຄະນະກວດກາສູນກາງພັກປະທານອົງການກວດກາແຫ່ງລັດ ແລະຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ພ້ອມດ້ວຍຄະນະ ແລະ ຄະນະນໍາຂັ້ນແຂວງໄດ້ລົງເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງນາແລແຂວງຫຼວງນ້ຳທາໂດຍໃຫ້ກຽດຕ້ອນຮັບຂອງທ່ານ ບຸນຈັນ ສຸດທິປັນຍາ ກໍາມະການພັກແຂວງ ເລຂາພັກເມືອງ ເຈົ້າເມືອງນາແລ, ພ້ອມດ້ວຍຄະນະ.

ການລົງເຄື່ອນໄຫວຢ້ຽມຢາມ ແລະ ເຮັດວຽກໃນຄັ້ງນີ້, ແມ່ນໄດ້ຮັບຟັງການລາຍງານຫຍໍ້ກ່ຽວກັບສະພາບການໂດຍລວມຂອງເມືອງນາແລ ຈາກສະຫາຍເລຂາພັກເມືອງ ເຈົ້າເມືອງນາແລເປັນຕົ້ນແມ່ນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ, ກໍຄືມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ ແລະ ມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກເມືອງ, ໄດ້ເອົາໃຈໃສ່ນໍາພາ-ຊີ້ນໍາຢ່າງໃກ້ຊິດຕໍ່ວຽກງານ ປກຊ-ປກສ ເຜີຍແຜ່ມະຕິຄໍາສັ່ງ, ແນວທາງນະໂຍບາຍຂອງພັກ, ແນວທາງປ້ອງກັນຊາດປ້ອງກັນຄວາມສະຫງົບ ລົງສູ່ຮາກຖານຢ່າງກວ້າງຂວາງ, ເປັນເຈົ້າການນໍາພາແກ້ໄຂປະກົດການຫຍໍ້ທໍ້ໃນສັງຄົມ, ບັນຫາຢາເສບຕິດ, ການເຄື່ອນຍ້າຍພົນລະເມືອງແບບບໍ່ຖືກຕ້ອງ, ການຄ້າມະນຸດສາມາດເຮັດໃຫ້ເມືອງນາແລ ມີສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍດີ. ສາມາດປະຕິບັດແຜນພັດທະນາເສດຖະກິດ-ສັງຄົມໃນແຕ່ລະໄລຍະ, ຄຸ້ມຄອງໂຄງການລົງທຶນຂອງລັດ 4 ໂຄງການ ໃນມູນຄ່າ 10.692 ລ້ານກີບ; ທົ່ວເມືອງມີ 63 ຫົວໜ່ວຍທຸລະກິດ; ໃນ 6ເດືອນຕົ້ນປີຜ່ານມາ ການເກັບລາຍຮັບເຂົ້າງົບປະມານ ແລະ ການປະຕິບັດລາຍຈ່າຍແມ່ນໄດ້ຕາມຄາດໝາຍ,ສາມາດຈ່າຍເງິນເດືອນໃຫ້ພະນັກງານໄດ້ເປັນປົກກະຕິ, ສໍາຫຼວດວັດແທກທີ່ດິນເປັນລະບົບໄດ້ 453 ຕອນ. ນອກຈາກນີ້,ຍັງໄດ້ສຸມໃສ່ຈັດຕັ້ງປະຕິບັດວຽກງານຈຸດສຸມ 6 ເປົ້າໝາຍຄື: 1. ໃຫ້ບັນລຸເປົ້າໝາຍເສດຖະກິດຂອງແຂວງ ໃຫ້ຂະຫຍາຍຕົວຢ່າງຕໍ່ເນື່ອງມີຄຸນນະພາບ, ໝັ້ນທ່ຽງ-ຍືນຍົງ, ຊຸກຍູ້ການຜະລິດ-ການບໍລິການ ຕາມທ່າແຮງບົ່ມຊ້ອນແຕ່ລະເຂດຂອງເມືອງ, ສ້າງຈຸດສຸມພັດທະນາ, 2.ບັນລຸເປົ້າໝາຍ ຊັບພະຍາກອນມະນຸດ ໃຫ້ມີຄວາມຮູ້, ຄວາມສາມາດ, ມີຄຸນສົມບັດ, 3. ບັນລຸເປົ້າໝາຍຊີວິດການເປັນຢູ່ຂອງປະຊາຊົນ ດ້ານວັດຖຸ ແລະ ຈິດໃຈ ໃຫ້ໄດ້ຮັບການຍົກລະດັບຂຶ້ນເທື່ອລະກ້າວ, ພັດທະນາຊົນນະບົດແກ້ໄຂຄວາມທຸກຍາກ, ຈັດສັນພູມລໍາເນົາ, ສ້າງອາຊີບຄົງທີ່, ສ້າງວຽກເຮັດງານທໍາ, 4. ເປົ້າໝາຍສິ່ງແວດລ້ອມ, ປົກປັກຮັກສາສິ່ງແວດລ້ອມໃຫ້ຍືນຍົງ, ກວດກາແກ້ໄຂການນໍາໃຊ້ທີ່ດິນຂອງລັດ, ໂຄງການລົງທຶນຈັບຈອງໄວ້ບໍ່ມີການພັດທະນາ, 5. ການຄຸ້ມຄອງບໍລິຫານລັດທີ່ຍັງບໍ່ທັນເປັນລະບົບ ກະແຈກກະຈາຍ, 6. ການສ້າງພື້ນຖານໂຄງລ່າງເມືອງນາແລ ຍັງພົບຂໍ້ຫຍຸ້ງຍາກຫຼາຍດ້ານ, ໂດຍສະເພາະ ການສັນຈອນ, ເສັ້ນທາງໄດ້ມີການປັບປຸງປົວແປງແຕ່ບໍ່ມີຄຸນນະພາບ ເປ່ເພໄວ.

ພາຍຫຼັງໄດ້ຮັບຟັງການລາຍງານແລ້ວ ທ່ານ ຄຳພັນ ພົມມະທັດ ກໍໄດ້ສະແດງຄວາມຊົມເຊີຍຕໍ່ຄະນະພັກ, ຄະນະນຳຂອງເມືອງທີ່ໄດ້ພ້ອມກັນເອົາໃຈໃສ່ນຳພາ-ຊີ້ນຳວຽກງານໃນແຕ່ລະດ້ານ. ພ້ອມທັງມີບາງຄຳເຫັນຊີ້ນໍາຕໍ່ຄະນະພັກ, ຄະນະນໍາ, ພະນັກງານຫຼັກແຫຼ່ງຂອງເມືອງ,ໃຫ້ສືບຕໍ່ການສຶກສາອົບຮົມການເມືອງ-ນໍາພາແນວຄິດ ໃຫ້ສະມາຊິກພັກ, ພະນັກງານ-ລັດຖະກອນ, ທະຫານຕໍາຫຼວດ, ພໍ່ແມ່ປະຊາຊົນບັນດາເຜົ່າພາຍໃນເມືອງສ້າງລະບົບການເມືອງ-ແນວຄິດໃຫ້ເຂັ້ມແຂງ,ສືບຕໍ່ນຳພາ-ຊີ້ນໍາຊຸກຍູ້ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ,ສຸມໃສ່ການພັດທະນາຂະແໜງການເປັນຕົ້ນແມ່ນການປູກຝັງ, ລ້ຽງສັດ, ສ້າງເສດຖະກິດເອກະລາດເປັນເຈົ້າຕົນເອງຕິດພັນກັບການຜັນຂະຫຍາຍແນວທາງການປ່ຽນແປງໃໝ່ໃຫ້ເຂົ້າສູ່ລວງເລິກ, ແກ້ໄຂບັນຫາຕົວຈິງ,ເປັນເຈົ້າການນໍາພາ-​ຊີ້​ນຳ​ການ​ກະກຽມ​ດຳ​ເນີນ​ກອງ​ປະຊຸມ​ໃຫຍ່ 3 ຂັ້ນ, ໂດຍສະເພາະດ້ານເນື້ອໃນ ໃຫ້ເອົາໃຈໃສ່ໃນການຕີລາຄາ ແລະ ປະເມີນຄືນໃນໄລຍະຜ່ານມາຢ່າງຈິງຈັງວ່າຜົນສໍາເລັດທີ່ຍາດມາໄດ້ແມ່ນຍ້ອນຫຍັງ, ສາເຫດມີຜົນສໍາເລັດຍ້ອນປັດໄຈຫຍັງແດ່ ແລະ ຄວາມສາມາດບົ່ມຊ້ອນຂອງເມືອງມີຫຍັງ, ບົນພື້ນຖານນັ້ນຕ້ອງເບິ່ງບຸກຄົນທີ່ມີຄວາມຮູ້, ຄວາມສາມາດ, ມີຮັບຜິດຊອບສູງຕໍ່ໜ້າທີ່ການເມືອງ, ມີຄວາມເສຍສະຫຼະ, ຜູ້ທີ່ມີຄວາມກ້າຫານກ້າເຮັດກ້າຮັບຜິດຊອບ.ນອກຈາກນີ້, ຍັງໄດ້ເນັ້ນໃຫ້ຄະນະພັກແຕ່ລະຂັ້ນຕ້ອງເອົາໃຈໃສ່ຕໍ່ວຽກງານຕິດຕາມ, ກວດກາຢ່າງແຂງແຮງ, ເພີ່ມທະວີຈັດຕັ້ງປະຕິບັດບົດບາດຂອງວຽກງານກວດກາພັກ-ກວດກາລັດ ເພື່ອສ້າງການຫັນປ່ຽນຢ່າງເລິກເຊິ່ງຮອບດ້ານຕິດພັນກັບການແກ້ໄຂບັນຫາກໍຄືຄວາມຮັບຜິດຊອບຕົວຈິງຂອງຄະນະພັກແຕ່ລະຂັ້ນ ໃຫ້ມີຜົນສໍາເລັດດ້ວຍປະສິດທິພາບ ແລະ ປະສິດທິຜົນສູງ.

ຂ່າວ-ພາບ: ສະໝິງທອງ