ວັນທີ 25 ສິງຫາຜ່ນມານີ້, ທ່ານ ຄໍາຜະຫຍາ ພົມປັນຍາ ຮອງເຈົ້າແຂວງບໍ່ແກ້ວ ປະທານຄະກໍາມະການຄຸ້ມຄອງໄພພິບັດຂັ້ນແຂວງ ພ້ອມດ້ວຍຄະນະ ລົງຢ້ຽມຢາມປະຊາຊົນທີ່ຖືຜົນກະທົບ ຈາກໄພນໍ້າຖ້ວມ ຊຶ່ງມີຜົນເສຍຫາຍເປັນຈໍານວນຫຼາຍເປັນຕົ້ນ: ເນື້ອທີ່ນາ ພ້ອມທັງລົງກວດກາເບິ່ງຄວາມເສຍຫາຍຕົວຈິງ ຢູ່ບ້ານກ້ອນຕື່ນ, ບ້ານປາກໂຊະ, ບ້ານປາງສາ ແລະ ບ້ານດົງ.

ໂອກາດນີ້, ທ່ານ ຄໍາເຄື່ອງ ພົມວິສັກ ຫົວໜ້າຫ້ອງການ ແຮງງານ ແລະ ສະຫວັດດີການສັງຄົມເມືອງ ປາກທາ ຕາງໜ້າຄະນະກໍາມະການຄຸ້ມຄອງໄພພິບັດຂັ້ນເມືອງ ໄດ້ລາຍງານ ສະພາບຄວາມເສຍຫາຍໂດຍຫຍໍ້ ຊຶ່ງເມືອງປາກທາ ໄດ້ຮັບຜົນກະທົບໃນລະຫວ່າງວັນທີ 21-22 ທີ່ຜ່ານມາ, ການສໍາຫຼວດເບື້ອງຕົ້ນມີແມ່ນໍ້າຫ້ວຍໄຫຼຊຸ ຖ້ວມເນື້ອທີ່ນາ ແລະ ຊົນລະປະທານ ເສຍຫາຍຢູ່ຈໍານວນ 22 ບ້ານ. ສະເພາະກຸ່ມບ້ານກ້ອນຕື່ນ ຄື: ບ້ານ ກ້ອນຕື່ນ ເສຍຫາຍ 147 ຄອບຄົວ, ບ້ານປາກໂຊະ 24 ຄອບຄົວ, ບ້ານ ບ້ານປາງສາ 27 ຄອບຄົວ, ບ້ານດົງ 33 ຄອບຄົວ ບ້ານຈຽງຕອງ ຍັງບໍ່ສາມາດເຂົ້າເຖິງໄດ້ ເສັ້ນທາງຖືກຕັດຂາດຫຼາຍຈຸດ, ສ່ວນນໍ້າລິນແມ່ນເສຍຫາຍເປ່ເພເຮັດໃຫ້ປະຊາຊົນບໍ່ສາມາດນໍາໃຊ້ນໍ້າລິນໄດ້. ສ່ວນການສໍາຫຼວດ ຜົນເສຍຫາຍລະອຽດ ພາກສ່ວນທີ່ກ່ຽວຂ້ອງຍັງເລັ່ງລົງພື້ນທີ່ເກັບກໍາຂໍ້ມູນ. ບາງພື້ນທີ ຍັງບໍ່ສາມາດລົງສໍາຫຼວດໄດ້ເນື່ອງຈາກນໍ້າຍັງຖ້ວມສູງ. ສ່ວນເສັ້ນທາງລະຫວ່າງ ປາກທາ - ບ້ານຫ້ວຍແອ່ນ ລົດໃຫຍ່ ບໍ່ສາມາດສັນຈອນໄປ-ມາໄດ້ ເພາະມີດິນເຈື່ອນທັບຖົມໜ້າທາງ ຊຶ່ງກໍາລັງກຳເນີນການແກ້ໄຂ.

ໂອກາດນີ້, ທ່ານ ຮອງເຈົ້າແຂວງບໍ່ແກ້ວ ໄດ້ມີຄໍາເຫັນຢື້ຢາມຖາມຂ່າວ ພໍ່ແມ່ປະຊາຊົນ ພ້ອມທັງສະແດງຄວາມເສຍໃຈຕໍ່ກັບຜົນເສຍຫາຍທີ່ເກີດໃນຄັ້ງນີ້, ພ້ອມທັງຮຽກຮ້ອງມາຍັງພໍ່ແມ່ປະຊາຊົນຈົ່ງເປັນເຈົ້າການຊ່ວຍເຫຼືອກັນໃນເບື້ອງຕົ້ນເພື່ອຟື້ນຟູ ແລະ ປູກພືດທົດແທນເນື້ອທີ່ນາທີ່ໄດ້ຮັບຄວາມເສຍຫາຍ ແລະ ເອົາໃຈໃສ່ບົວລະບັດຮັກສາເຂົ້າທີ່ຍັງເຫຼືອ, ພ້ອມທັງເນັ້ນໜັກໃຫ້ຄະນະຮັບຜິດຊອບຂະແໜງການທີ່ກ່ຽວຂ້ອງໃຫ້ເອົາໃຈໃສ່ ສົມທົບກັບຄະນະບ້ານ ແລະ ພໍ່ແມ່ປະຊາຊົນ ເພື່ອເກັບກໍາຂໍ້ມູນຜົນເສຍຫາຍລະອຽດເພື່ອສະຫຼຸບລາຍງານໃຫ້ຖືກຕ້ອງ, ວ່ອງໄວ ແລະ ຊ່ວຍເຫຼືອປະຊາຊົນໃນທຸກດ້ານ, ໂອກາດດັ່ງກ່າວ ກໍໄດ້ມອບເຄື່ອງບັນເທົາທຸກໃຫ້ປະຊົນທີ່ໄດ້ຮັບຜົນກະທົບ, ຈາກນັ້ນກໍ່ໄກ້ເດີນທາງ ໄປເບິ່ງ ເນື້ອທີ່ນາ ທີ່ໄດ້ຮັບຄວາມເສຍຫາຍ ຢູ່ບ້ານກ້ອນຕື່ນ, ບ້ານປາກໂຊະ, ບ້ານ ປາງສາ ແລະ ບ້ານດົງ, ກວດກາເບິ່ງຜົນເສຍຫາຍ ເນື້ອທີ່ນາຂອງປະຊາຊົນບ້ານຫາດສະຕື່ມອີກ.

(ຂ່າວ: ບຸນເພັງ ທຸມມະວົງ)