ໃນວັນທີ 26 ສິງຫາ 2024 ນີ້, ຢູ່ທີ່ສະໂມສອນຫ້ອງວ່າການເມືອງແກ່ນທ້າວ ແຂວງໄຊຍະບູລີ ໄດ້ຈັດພິທີ ປະຖະກະຖາ ວັນສ້າງຕັ້ງລັດຖະທໍາມະນູນແຫ່ງຊາດ ຄົບຮອບ 33 ປີ (15 ສິງຫາ 1991-15 ສິງຫາ 2024), ວັນຍຶດອໍານາດທົ່ວປະເທດ ຄົບຮອບ 49 ປີ (23 ສິງຫາ 1975-23 ສິງຫາ 2024), ວັນຍຶດອໍານາດແຂວງໄຊຍະບູລີ ຄົບຮອບ 49 ປີ (6 ສິງຫາ 1975-6 ສິງຫາ 2024), ວັນສ້າງຕັ້ງແນວລາວສ້າງຊາດ ຄົບຮອບ 74 ປີ (13 ສິງຫາ 1950-13 ສິງຫາ 2024), ວັນສ້າງຕັ້ງສື່ມວນຊົນ ແລະ ວັນພິມຈໍາໜ່າຍ ຄົບຮອບ 74 ປີ (13 ສິງຫາ 1950-13 ສິງຫາ 2024), ວັນສ້າງຕັ້ງສານປະຊາຊົນ ຄົບຮອບ 42 ປີ (15 ສິງຫາ 1982-15 ສິງຫາ 2024), ວັນສ້າງຕັ້ງສະຫະພັນນັກຮົບເກົ່າຄົບຮອບ 22 ປີ ( 9 ກັນຍາ 2002-9 ກັນຍາ 2024) ແລະ ເຊື່ອມຊຶມແຜນແມ່ບົດວ່າດ້ວຍການສ້າງຄູ່ຮ່ວມຊາຕາກຳລາວ-ຈີນສະບັບປີ 2024-2028. ໂດຍການເປັນກຽດເຂົ້າຮ່ວມຂອງທ່ານ ຄໍາປຸ່ນ ນວນສະບັບ ວ່າການເລຂາພັກເມືອງ ວ່າການເຈົ້າເມືອງແກ່ນທ້າວ, ມີແຂກຖືກເຊີນ ແລະ ພາກສ່ວນກ່ຽວຂ້ອງອ້ອມຂ້າງເມືອງເຂົ້າຮ່ວມ.

ທ່ານ ຄໍາປຸ່ນ ນວນສະບັບ ໄດ້ປາຖະກະຖາມູນເຊື້ອ ວັນສໍາຄັນດັ່ງກ່າວ ແນໃສ່ສຶກສາອົບຮົມການເມືອງ-ແນວຄິດໃຫ້ສະມາຊິກພັກ-ພະນັກງານ, ທະຫານ-ຕໍາຫຼວດ ແລະ ປະຊາຊົນ ບັນດາເຜົ່າ ໃນການເພີ່ມທະວີຍົກສູງສະຕິເຄົາລົບ ແລະ ປະຕິບັດລັດຖະທຳມະນູນ ແລະ ກົດໝາຍ, ເພື່ອສຶກສາສະຕິຊາດໃຫ້ແກ່ຄົນຮຸ່ນຫຼັງເປັນເຈົ້າການໃນການປົກປັກຮັກສາໝາກຜົນ ຂອງການປະຕິວັດໄວ້ໃຫ້ໝັ້ນຄົງ ເອົາໃຈໃສ່ສ້າງສາປະເທດຊາດໃຫ້ມັ່ງຄັ່ງເຂັ້ມແຂງ, ຮັກສາມູນເຊື້ອ ການຕໍ່ສູ້ເສຍສະຫຼະຂອງບັນພະບຸລຸດ ແລະ ປະຊາຊົນບັນດາເຜົ່າໃນພາລະກິດຕໍ່ສູ້ ເພື່ອປົດປ່ອຍປະເທດຊາດ, ເພື່ອຍົກສູງບົດບາດການນໍາຂອງພັກ, ສ້າງຄວາມຮັບຮູ້-ເຂົ້າໃຈ ຕໍ່ມູນເຊື້ອໃນການຕໍ່ສູ້ອັນພິລະອາດຫານ ຂອງວັນສຊາຄັນທາງປະຫວັດສາດດັ່ງກ່າວ.

(ຂ່າວ: ແກ່ນທ້າວ).