ດ້ວຍການຊຸກຍູ້ສົ່ງເສີມໃຫ້ບັນດາຫົວໜ່ວຍການຜະລິດ ແລະ ບໍລິການຕ່າງໆ ຕະຫຼອດຮອດພໍ່ແມ່ນປະຊາຊົນໃນຂອບເຂດທົ່ວແຂວງ ໃຫ້ພ້ອມກັນເອົາໃຈໃສ່ເຮັດການຜະລິດ ຫຼື ບໍລິການຫຼາຍຂຶ້ນ, ພ້ອມທັງນໍາໃຊ້ທ່າແຮງທີ່ມີ ການຮ່ວມມືກັນທຸກພາກສ່ວນ ຈັດງານເທດສະການການທ່ອງທ່ຽວ ແລະ ບຸນຮີດຄອງປະເພນີຂອງແຕ່ລະເມືອງ ເພື່ອຕ້ອນຮັບປີທ່ອງທ່ຽວລາວ ເພື່ອກະຕຸ້ນເສດຖະກິດ ແລະ ສັງຄົມຂອງແຂວງໃນແຕ່ລະດ້ານ ໃນນີ້ດ້ານການເກັບລາຍຮັບມີອັນພົ້ນເດັ່ນ ໃນ 6 ເດືອນຕົ້ນປີ ເກັບລາຍຮັບໄດ້ 65,34% ຂອງແຜນການ ຊຶ່ງແມ່ນໜຶ່ງໃນຜົນງານພົ້ນເດັ່ນ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ງົບປະມານແຫ່ງລັດ ໃນໄລຍະດັ່ງກ່າວ.

ບົດລາຍງານຫຍໍ້ ການສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ງົບປະ ມານແຫ່ງລັດ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2024 ຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງວຽງຈັນ ຊຸດທີIIທີ່ຈັດຂຶ້ນລະຫວ່າງວັນທີ 31 ກໍລະກົດ ຫາ 2 ສິງຫາ ຜ່ານມາ ໃຫ້ຮູ້ວ່າ: ໃນ 6ເດືອນຕົ້ນປີນີ້, ສາມາດເກັບລາຍຮັບໄດ້ 218,19 ຕື້ກີບ ເທົ່າກັບ 65,34% ຂອງແຜນການ (ແຜນ 333,93 ຕື້ກີບ) ສາມາດປະຕິບັດອະນຸມັດເບີກຈ່າຍງົບປະມານໄດ້ 400,85 ຕື້ກີບ ເທົ່າກັບ 56,38% ຂອງແຜນການ (ລວມຈ່າຍເງິນລົງທຶນລັດ 120,99 ຕື້ກີບ), ໄດ້ຮັບດຸ່ນດ່ຽງຈາກສູນກາງ 344,89 ຕື້ກີບ ເທົ່າກັບ 76,12% ຂອງແຜນການ. ຂະນະດຽວກັນ, ກໍສາມາດລະດົມເງິນຝາກຍອດລວມໄດ້ 5.907,39 ຕື້ກີບ ລື່ນແຜນ 2.000 ກວ່າຕື້ກີບ (ແຜນ 3.000 ຕື້ກີບ) ແລະ ສາມາດສະໜອງສິນເຊື່ອໃຫ້ແກ່ຫົວໜ່ວຍການຄ້າ-ການບໍລິການ, ອຸດສາຫະກຳ ແລະ ກະສິກຳໄດ້ 922,35 ຕື້ກີບ ລື່ນແຜນການ 15% (ແຜນ 800 ຕື້ກີບ).

ໃນ 6 ເດືອນທ້າຍປີ 2024, ແຂວງຈະສູ້ຊົນຈັດເກັບລາຍຮັບໃຫ້ໄດ້ຕາມຄາດໝາຍຂອງແຜນ ຊຶ່ງຈະເກັບໃຫ້ໄດ້ຕື່ມອີກ 177,29 ຕື້ກີບ ແລະ ໝົດປີຈະໄດ້ 381,68 ຕື້ກີບ ລື່ນແຜນ 14,30% (ແຜນ 333,93 ຕື້ກີບ) ແລະ ປະຕິບັດລາຍຈ່າຍໃຫ້ໄດ້ໃນລະດັບທີ່ສະພາໄດ້ຮັບຮອງ, ຄາດຄະເນລາຍຈ່າຍທົ່ວແຂວງຮອດທ້າຍປີ ປະມານ 483,49 ຕື້ກີບ ລວມໝົດປີ 835,74 ຕື້ກີບ ລື່ນແຜນ 17,56%; ລື່ນແຜນຍ້ອນວ່າ ຈະໄດ້ສະເໜີກະຊວງການເງິນພິຈາລະນາຂໍດັດແກ້ງົບປະມານລາຍຈ່າຍບາງພາກ, ບາງຮ່ວງ ເປັນຕົ້ນ: ດັດແກ້ເພີ່ມເງິນເດືອນ, ເງິນອຸດໜູນຕື່ມອີກ 28,75 ຕື້ກີບ, ຄ່າຄອງຊີບພະນັກງານ-ລັດຖະກອນ, ຈ່າຍບໍລິຫານປົກກະຕິ, ກະແສໄຟຟ້າ ແລະ ລາຍຈ່າຍອື່ນໆ; ພ້ອມນັ້ນ, ຈະໄດ້ດັດແກ້ລາຍຈ່າຍບ່ວງບໍາເນັດເກັບລາຍຮັບເກີນແຜນປີ 2023 ຕື່ມອີກ 95,56 ຕື້ກີບ.

ສະນັ້ນ, ເພື່ອຈະສູ້ຊົນໃຫ້ບັນລຸຕາມຄາດໝາຍຂອງແຜນ ໃນ 6 ເດືອນທ້າຍປີ ແຂວງໄດ້ປະຕິບັດບາງວຽກຈຸດສຸມ ເປັນຕົ້ນແມ່ນການສົ່ງເສີມການຜະລິດສະບຽງອາຫານ ສະໜອງໃຫ້ແກ່ພາຍໃນ ແລະ ສົ່ງອອກ ເພື່ອທົດແທນການນໍາເຂົ້າໃຫ້ຂຶ້ນຫຼາຍ; ສົ່ງເສີມຈຸນລະວິສາຫະກິດ, ທຸລະກິດຂະໜາດນ້ອຍ ແລະ ກາງໃຫ້ເຂັ້ມແຂງກວ່າເກົ່າໂດຍນໍາໃຊ້ນະໂຍບາຍສິນເຊື່ອທີ່ລັດຖະບານສົ່ງເສີມ; ພ້ອມທັງຕິດຕາມ, ກວດກາ ແລະ ປະເມີນການຈັດຕັ້ງປະຕິບັດຕົວຈິງ; ສືບຕໍ່ຕິດຕາມ, ກວດກາ ການຈັດຕັ້ງປະຕິບັດໂຄງການບໍ່ແຮ່ ທີ່ໄດ້ຮັບອະນຸຍາດໄປແລ້ວ ໃຫ້ດຳເນີນຕາມສັນຍາ ເພື່ອສ້າງລາຍຮັບງົບປະມານໃຫ້ແກ່ລັດ.