ມູນນິທິຈີນນະຄອນຫຼວງວຽງຈັນໄດ້ຈັດກິດຈະກຳບຸນປະເພນີໄຫວ້ບັນພະບູລຸດ ແລະ ຄົບຮອບວັນສ້າງຕັ້ງມູນນິທິຈີນນະຄອນຫຼວງວຽງຈັນ ຄົບຮອບ58 ປີຂຶ້ນໃນວັນທ 29 ສິງຫານີ້ ທີ່ມູນນິທິຈີນ ນະຄອນຫຼວງວຽງຈັນ.ໂດຍທ່ານ ບຸນຕາ ສຸລິວົງ ເຈົ້າເມືອງຈັນທະບູລີ, ທ່ານ ອ່າງ ຫານວິຈິດ ປະທານມູນນິທິຈີນນະຄອນຫຼວງວຽງຈັນ ທັງເປັນຮອງປະທານສະມາຄົມຈີນ, ຫົວໜ້າກົງສູນສະຖານທູດຈີນປະຈຳລາວພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ອ່າງ ຫານວິຈິດ ໃຫ້ຮູ້ວ່າ: ການຈັດກິດຈະກຳຄັ້ງນີ້ເປັນປະເພນີທີ່ສືບທອດກັນມາເພື່ອລະນຶກເຖິງບັນພະບຸລູດ ແລະ ຄົບຮອບວັນສ້າງຕັ້ງມູນນິທິຈີນນະຄອນຫຼວງວຽງຈັນ ຄົບຮອບ 58 ປີ ຊຶ່ງກິດຈະກຳໄຫວ້ບັນພະບູລຸດ ແລະ ແຈກຢາຍເຂົ້າສານອາຫານແຫ້ງແມ່ນໄດ້ຖືເອົາເດືອນສິງຫາ (8) ຂອງທຸກໆປີ, ການຈັດກິດຈະກຳດັ່ງກ່າວໄດ້ກຳນົດເອົາຕອນເຊົ້າ ວັນທີ 28 ສິງຫາແມ່ນພິທີຕັກບາດຖວາຍສັງຄະທານແດ່ພະສົງສຳມະເນນແບບປະເພນີລາວ ແລະ ວັນທີ 29 ສິງຫາ ແມ່ນເຮັດພິທີໄຫວ້ບັນພະບູລຸດຕາມປະເພນີຂອງຊາວຈີນທີ່ເຄີຍສືບທອດປະຕິບັດກັນມາ.

ພາຍໃນງານນອກຈາກການໄຫວ້ບັນພະບູລຸດຕາມປະເພນີແລ້ວ ຍັງມີການແຈກຢາຍເຄື່ອງອຸປະໂພກ-ບໍລິໂພກຈຳນວນໜຶ່ງ ຊຶ່ງປີນີ້ໄດ້ແຈກຢາຍຂົ້າສານປະມານ 20 ໂຕນ, ອາຫານແຫ້ງ, ເຄື່ອງໃຊ້ພາຍໃນຄົວເຮືອນ ຈຳນວນ 4.000 ກວ່າຖົງ ລວມມູນຄ່າທັງໝົດ 1 ຕື້ກວ່າກີບ. ເຄື່ອງທີ່ນຳມາແຈກຢາຍແມ່ນໄດ້ຮັບຈາກການປະກອບສ່ວນຂອງຫຼາຍພາກສ່ວນເປັນຕົ້ນບັນດາຫົວໜ່ວຍທຸລະກິດ, ຄອບຄົວຜູ້ໃຈບຸນ, ສະມາຄົມຕ່າງໆທັງພາຍໃນ ແລະ ຕ່າງປະເທດ.