ວັນທີ 2 ກັນຍາຜ່ານມານີ້, ກົມສວຍສາອາກອນເຜີຍແຜ່ ແນະນໍາວຽກງານເກັບອາກອນທີ່ດີນ ແລະ ການເກັບຖານຂໍ້ມູນທີ່ດິນ ເຂົ້າໃນລະບົບຄຸ້ມຄອງຂໍ້ມູນລາຍຮັບສວຍສາອາກອນ ໄດ້ຈັດຂຶ້ນຢູ່ທີ່ຫ້ອງປະຊຸມພະແນກການເງິນແຂວງຫຼວງນໍ້າທາ ໂດຍການເປັນປະທານຂອງທ່ານ ຄຳພັນ ພັນທຸລັກ ຮອງຫົວໜ້າກົມສວຍສາອາກອນ, ມີທ່ານ ສົມຈັນ ຈິດດາລາ ຮັກສາການຫົວໜ້າພະແນກການເງິນແຂວງ, ມີຄະນະຮັບຜິດຊອບຂັ້ນສູນກາງ, ຂັ້ນແຂວງ - ເມືອງ ແລະ ພາກສ່ວນກ່ຽວຂ້ອງເຂົ້າຮ່ວມ:

ທ່ານ ຄໍາພັນ ພັນທຸລັກ ໃຫ້ຮູ້ວ່າ: ປັດຈຸບັນ ກະຊວງການເງິນ ໄດ້ສຸມໃສ່ທຸກມາດຕະການ ເພື່ອຈັດເກັບລາຍຮັບເຂົ້າງົບປະມານໃຫ້ຖືກຕ້ອງຄົບຖ້ວນ ແລະ ເພີ່ມຂຶ້ນ ພ້ອມທັງປິດກັ້ນການຮົ່ວໄຫຼ ບົນພື້ນຖານການຈັດຕັ້ງປະຕິບັດການເກັບລາຍຮັບປີ 2024 ແລະ ຄາດໝາຍສູ້ຊົນໃຫ້ບຸກທະລຸ ຕາມມະຕິຂອງກົມການເມືອງສູນກາງພັກ. ໃນນັ້ນ, ວຽກທີ່ດິນກໍແມ່ນວຽກໜຶ່ງ ທີ່ລັດຖະບານໃຫ້ຄວາມສໍາຄັນ ແລະ ເປັນຖານລາຍຮັບທີ່ໝັ້ນຄົງ, ຖ້າເກັບກໍາຖານຂໍ້ມູນຕອນດິນໄດ້ຊັດເຈນ ກໍຈະເປັນຖານລາຍຮັບໜຶ່ງໃຫ້ແກ່ລັດໃນແຕ່ລະປີ ແລະ ທຸກພາກສ່ວນກໍມີສ່ວນຮ່ວມໃນການຄຸ້ມຄອງຕິດຕາມຊ່ວຍກັນ. ພ້ອມນັ້ນ ຜູ້ເຂົ້າຮ່ວມກອງປະຊຸມກໍໄດ້ມີຄໍາຖາມເຈະຈີ້ມ ແລະ ປະກອບຄໍາເຫັນ ເພື່ອເຮັດໃຫ້ການຈັດຕັ້ງປະຕິບັດວຽກງານເກັບອາກອນທີ່ດີນ ແລະ ການເກັບຖານຂໍ້ມູນທີ່ດິນ ເຂົ້າໃນລະບົບຄຸ້ມຄອງຂໍ້ມູນລາຍຮັບສວຍສາອາກອນ ໃຫ້ມີປະສິດທິພາບສູງໃນຕໍ່ໜ້າ.

(ຂ່າວ: ອຸ້ມ ສົມນໍວັນ)