ໃນວັນທີ 3 ກັນຍາ ຜ່ານມາ, ສະຫາຍ ນາງ ສີໃສ ລືເດດມູນສອນ ກໍາມະການກົມການເມືອງສູນກາງພັກ ເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ ພ້ອມຄະນະ ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ວຽກງານຢູ່ແຂວງສາລະວັນ, ໂດຍມີ ສະຫາຍ ດາວວົງ ພອນແກ້ວ ກໍາມະການສູນກາງພັກ ເລຂາພັກແຂວງ ເຈົ້າແຂວງສາລະວັນ, ມີບັນດາຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງພ້ອມດ້ວຍບັນດາຫົວໜ້າພະແນກການ ທີ່ກ່ຽວຂ້ອງພາຍໃນແຂວງເຂົ້າຮ່ວມ ຕ້ອນຮັບທີ່ສະໂມສອນຂອງແຂວງ.

ສະຫາຍ ດາວວົງ ພອນແກ້ວ ໄດ້ລາຍງານໂດຍສັງເຂບໃນການຊີ້ນຳໆພາວຽກງານທີ່ພົ້ນເດັ່ນຂອງແຂວງ ໃນການຈັດຕັ້ງປະຕິບັດວຽກງານຮອບດ້ານ ເປັນຕົ້ນ: ການພັດທະນາເສດຖະກິດມີການຂະຫຍາຍຕົວໃນທ່ວງທ່າດີຂຶ້ນ, ການສຸມໃສ່ປະຕິບັດວຽກງານໃນຈຸດສຸມຕ່າງໆ ທີ່ເງື່ອນໄຂດ້ານທ່າແຮງບົ່ມຊ້ອນໃນການພັດທະນາເສດຖະກິດ-ສັງຄົມ ເປັນຕົ້ນ: ການຊຸກຍູ້ສົ່ງເສີມການຜະລິດເຂົ້າ ຊຶ່ງມີຈຳນວນໜຶ່ງໄດ້ສົ່ງອອກຂາຍ ໄປ ສປ ຈີນ, ການປູກພຶດອຸດສາຫະກຳ, ພຶດສະບຽງອາຫານ, ສົ່ງເສີມການລ້ຽງສັດເປັນຟາມ ແລະ ແບບຄອບຄົວ ມີທ່າອ່ຽງເພີ່ມຂຶ້ນຫຼາຍກ່ອນເກົ່າ, ສຸມໃສ່ການກະກຽມເປັນເຈົ້າພາບງານມະຫາກໍາກິລານັກຮຽນມັດທະຍົມທົ່ວປະເທດ ຄັ້ງທີ VII ແລະ ວຽກງານອື່ນໆ.

ໃນໂອກາດນີ້, ສະຫາຍ ນາງ ສີໃສ ລືເດດມູນສອນ ໄດ້ໂອ້ລົມ, ຊຶ່ງກ່ອນອື່ນໄດ້ສະແດງຄວາມຊົມເຊີຍຕໍ່ການເອົາໃຈໃສ່ດ້ວຍຄວາມເປັນເຈົ້າການຂອງຄະນະພັກ, ຄະນະນໍາຂອງແຂວງ ແລະ ເມືອງ ກໍຄືຂະແໜງ ການຕ່າງໆ ທີ່ມີຄວາມຮັບຜິດຊອບຕໍ່ກັບໜ້າທີ່ການເມືອງ ທີ່ພັກ ແລະ ລັດ ກໍຄືປະຊາຊົນບັນດາເຜົ່າມອບໝາຍໃຫ້. ຈາກນັ້ນ ສະຫາຍ ກໍໄດ້ເນັ້ນໃຫ້ເພີ່ມທະວີຄວາມຮັບຜິດຊອບໃນການກະກຽມດໍາເນີນກອງປະຊຸມໃຫຍ່ 3 ຂັ້ນ ເພື່ອຮັບປະກັນດ້ານເນື້ອໃນ, ດ້ານໂຄງປະກອບບຸກຄະລາກອນ ແລະ ດ້ານເວລາ ໃຫ້ມີຄວາມຖືກຕ້ອງ, ສອດຄ່ອງກັບບັນດານິຕິກໍາ ກໍຄືຄໍາແນະນໍາ ເພື່ອເລືອກເຟັ້ນພະນັກງານ ທີ່ມີມາດຖານເງື່ອນໄຂຄົບຖ້ວນ, ສ້າງພະນັກງານຮຸ່ນໜຸ່ມໃຫ້ໜັກແໜ້ນ, ເຂັ້ມແຂງ ເພື່ອຮັບປະກັນການສ້າງພະນັກງານສືບທອດປ່ຽນແທນ ໃຫ້ມີຄຸນນະພາບ ແລະ ກຽມດຳເນີນກອງປະຊຸມໃຫຍ່ 3 ຂັ້ນໃຫ້ບັນລຸຜົນສຳເລັດຕາມລະດັບຄາດໝາຍ. ຄຽງຄູ່ກັນນັ້ນກໍເອົາໃຈໃສ່ເພີ່ມທະວີຈັດຕັ້ງປະຕິບັດໜ້າທີ່ການເມືອງ ຢ່າງແຂງແຮງ ເພື່ອສ້າງຂະບວນການໃຫ້ຟົດຟື້ນ ໂດຍສະເພາະວຽກງານວິຊາສະເພາະໃນແຕ່ລະຂົງເຂດວຽກງານ, ປະຕິບັດໃຫ້ບັນລຸຕາມແຜນການທີ່ວາງໄວ້ ຕິດພັນກັບການຄົ້ນຄວ້າຢ່າງເລີກຊຶ່ງຕໍ່ກັບແຜນພັດທະນາຂອງຂະແໜງການດ້ວຍຄວາມເປັນເຈົ້າການ ແລະ ຄວາມຮັບຜິດຊອບສູງ.

(ຂ່າວ-ພາບ: ວິໄລວອນ ສິດທິໄຊ)