ເມື່ອບໍ່ດົນມານີ້, ເມືອງເງິນ ແຂວງໄຊຍະບູລີ ໄດ້ຈັດພິທີເຜີຍແຜ່ເຊື່ອມຊືມ ແຜນແມ່ບົດການ ສ້າງຄູ່ຮ່ວມສະຕາກໍາລາວ-ຈີນ ປີ 2024-2028 ໂດຍຕິດພັນກັບການປາຖະກະຖາ 6 ວັນປະຫວັດສາດ ສໍາຄັນຂອງຊາດ ຂອງພັກ ຄື: ວັນສ້າງຕັ້ງລັດຖະທໍາມະນູນແຫ່ງຊາດ ຄົບຮອບ 33 ປີ(15/8/1991–15/8/2024), ວັນຍຶດອໍານາດ 23 ສິງຫາ ຄົບຮອບ 49 ປີ (23/8/1975-23/8/2024), ວັນສ້າງຕັ້ງແນວລາວສ້າງຊາດຄົບຮອບ 74 ປີ (13/8/1950-13/8/2024), ວັນສ້າງຕັ້ງສື່ມວນຊົນ ແລະ ວັນພີມຈໍານໜ່າຍ ຄົບຮອບ 74 ປີ (13/8/1950-13/8/82024), ວັນສ້າງຕັ້ງສານປະຊາຊົນຄົບຮອບ 44 ປີ (14/8/1982-14/8/2024), ວັນສ້າງຕັ້ງສະຫະພັນນັກຮົບເກົ່າ ຄົບຮອບ 22 ປີ (9/9/2002-9/9/2024). ພິທີດັ່ງກ່າວ ໄດ້ຈັດຂຶ້ນຢູ່ທີ່ສະໂມສອນເມືອງເງິນ ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ອົງການ, ກົມກອງ, ລັດວິສາຫະກິດ ແລະ ພາກສ່ວນກ່ຽວຂ້ອງພາຍໃນທົ່ວເມືອງເຂົ້າຮ່ວມຮັບຟັງ.

ທ່ານ ທະວີສັກ ໄຊຍະວົງ ເລຂາຄະນະບໍລິຫານງານພັກເມືອງ ເຈົ້າເມືອງ ໄດ້ເປັນກຽດເລົ່າຄືນມູນເຊື້ອຂອງແຕ່ລະວັນສຳຄັນດັ່ງກ່າວໂດຍໄດ້ຍົກໃຫ້ເຫັນມູນເຊື້ອ, ພາລະບົດບາດ, ຄວາມໝາຍຄວາມສໍາຄັນ ຕະຫຼອດເຖິງການເຕີບໃຫຍ່ຂະຫຍາຍຕົວ, ມູນເຊື້ອຄຸນງາມຄວາມດີໃນແຕ່ລະໄລຍະຂອງຜູ້ນໍາທີ່ມີນໍ້າໃຈຮັກຊາດອັນສູງສົ່ງ ແລະ ຄວາມອົງອາດກ້າຫານ, ຄວາມເດັດດ່ຽວໜ້ຽວແໜ້ນຂອງນັກຮົບປະຕິວັດໃນຂະບວນການຕໍ່ສູ້ປົດປ່ອຍຊາດ ທັງເປັນການທົບທວນຫວນຄືນມູນເຊື້ອວັນສໍາຄັນຂອງພັກ ຂອງຊາດ, ໂດຍມີຈຸດປະສົງ ກໍເພື່ອເຮັດໃຫ້ສະມາຊິກພັກ ພະນັກງານ-ລັດຖະກອນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບມູນເຊື້ອຂອງວັນດັ່ງກ່າວ.

(ຂ່າວ: ສົມຄິດ ຂຽວສີຟ້າ).