ໃນໂອກາດລົງເຄື່ອນໄຫວຢ້ຽມຢາມດ່ານສາກົນສິນຄ້າທ່າບົກ-ທ່ານາແລ້ງ ແລະ ເຂດໂລຈິສຕິກພາກນະຄອນຫຼວງວຽງຈັນ ຫວ່າງມໍ່ມານີ້, ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີລັດຖະມົນຕີກະຊວງປ້ອງກັນປະເທດໄດ້ມີຄຳເຫັນຊີ້ນຳໃຫ້ບໍລິສັດວຽງຈັນໂລຈິສຕິກພາກ ສຸມໃສ່ສ້າງພື້ນຖານອຸດສາຫະກໍາ, ກະສິກໍາໂດຍສະເພາະເອົາໃຈໃສ່ຂອດການບໍລິການ, ອໍານວຍຄວາມສະດວກໃຫ້ແກ່ການສົ່ງອອກ-ນໍາເຂົ້າສິນຄ້າ, ສຸມໃສ່ສ້າງເສດຖະກິດເປັນເຈົ້າຕົນເອງ ຕິດພັນກັບການພົວພັນຮ່ວມມືກັບຕ່າງປະເທດປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດ ກໍຄືປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ, ສືບຕໍ່ດໍາເນີນທຸລະກິດໃຫ້ເຕີບໃຫຍ່ເຂັ້ມແຂງ, ໜັກແໜ້ນ ແລະ ປະສົບຜົນສໍາເລັດໃນທຸກດ້ານ.

ທ່ານ ຈັນທອນ ສິດທິໄຊ ປະທານບໍລິສັດວຽງຈັນໂລຈິສຕິກພາກຈຳກັດ ໄດ້ນໍາສະເໜີຄວາມເປັນມາຂອງໂຄງການໂລຈິສຕິກພາກ ຊຶ່ງໂຄງການດັ່ງກ່າວເກີດຂຶ້ນໄດ້ເນື່ອງມາຈາກລັດຖະບານລາວໄດ້ມອບໃຫ້ກຸ່ມບໍລິສັດພົງສະຫວັນ ກໍຄືບໍລິສັດພີທີແອວໂຮນດິ້ງ, ການພັດທະນາໂຄງການດັ່ງກ່າວທີ່ຕິດພັນກັບການພັດທະນາພື້ນຖານໂຄງລ່າງວ່າດ້ວຍຫັນປະເທດລາວຈາກແລນລັອກເປັນແລນລິ້ງ ກໍຄື LLL ຫຼືລາວໂລຈິສຕິກລິ້ງ. ດັ່ງນັ້ນ, ລັດຖະບານລາວ ຈຶ່ງມີໂຄງການລາວໂລຈິສຕິກລິ້ງ ຊຶ່ງປະກອບມີທ່າເຮືອຫວຸ່ງອ່າງຢູ່ພາກກາງຂອງ ສສ ຫວຽດນາມ, ລັດຖະບານລາວ ແລະ ຫວຽດນາມໄດ້ພັດທະນາໂຄງການນີ້ເພື່ອໃຫ້ລາວມີປະຕູທາງອອກສູ່ທະເລ, ໂຄງການເສັ້ນທາງລົດໄຟລາວ-ຫວຽດນາມຈາກນະຄອນຫຼວງວຽງຈັນຈຸດເຊື່ອມໂຍງເສັ້ນທາງລົດໄຟລາວ-ຈີນຢູ່ທ່າບົກ-ທ່ານາແລ້ງເຊື່ອມໂຍງໄປຈົນຮອດແຂວງຄຳມ່ວນ ເປັນແຂວງພາກກາງຂອງປະເທດລາວຊຶ່ງກົງກັນຂ້າມກັບນະຄອນພະນົມປະເທດໄທ. ຈາກນັ້ນ, ກໍຕໍ່ໄປຮອດທ່າເຮືອຫວຸ່ງອ່າງ ຈາກນະຄອນຫຼວງວຽງຈັນຮອດແຂວງຄຳມ່ວນໃຊ້ໄລຍະທາງ 300 ກິໂລແມັດ ແລະ ຈາກແຂວງຄໍາມ່ວນ ຫາທ່າເຮືອຫວຸ່ງອ່າງໄລຍະທາງ 240 ກິໂລແມັດ ຖືວ່າເປັນໄລຍະທາງທີ່ສັ້ນທີ່ສຸດ, ຖ້າສິນຄ້າຈາກພາກອີສານຂອງໄທ ແລະ ສິນຄ້າຂອງລາວຕໍ່ໄປແມ່ນໃຊ້ທ່າເຮືອຫວຸ່ງອ່າງເພື່ອອອກໄປທ່າເຮືອປາຊີຟິກ ກໍຄືໄປ ສປຈີນຕອນໃຕ້, ຍີ່ປຸ່ນ, ສເກົາຫຼື, ໄຕ້ຫວັນ, ຣັດເຊຍ ແລະ ປະເທດອື່ນໆທີ່ອອກທາງທະເລປາຊີຟິກຈະໃຊ້ເວລາສັ້ນລົງໃນການຂົນສົ່ງສິນຄ້າ. ນອກນີ້, ຍັງມີໂຄງການເຂດໂລຈິສຕິກພາກຢູ່ໃນ 3 ເຂດຄື: ຢູ່ນະຄອນຫຼວງວຽງຈັນ, ແຂວງຄໍາມ່ວນແລະ ຢູ່ປາກຊັນ ແຂວງບໍລິຄໍາໄຊ ໂດຍລັດຖະບານມອບໃຫ້ກຸ່ມບໍລິສັດພັດທະນາບັນດາໂຄງການຕ່າງໆເພື່ອຫັນວິໄສທັດຂອງລັດຖະບານໃຫ້ປະກົດຜົນເປັນຈິງ. ໃນນັ້ນ, ກຸ່ມບໍລິສັດວຽງຈັນໂລຈິສຕິກໄດ້ລົງທຶນໃນການເຮັດໂຄງການດັ່ງກ່າວໃຫ້ປະກົດຜົນເປັນຈິງ ໂດຍສະເພາະໂຄງການທ່າບົກ-ທ່ານາແລ້ງໄດ້ເຊັນສັນຍາສຳປະທານໃນເດືອນກໍລະກົດ ແລະ ໄດ້ເລີ່ມກໍ່ສ້າງເດືອນທັນວາ 2020 ແລະ ສໍາເລັດເດືອນພະຈິກ 2021 ໃຊ້ເວລາກໍ່ສ້າງ 11 ເດືອນ, ໂຄງການທ່າບົກ-ທ່ານາແລ້ງ ແລະ ວຽງຈັນໂລຈິສຕິກພາກມີເນື້ອທີ່ທັງໝົດ 418 ເຮັກຕາ ລວມມູນຄ່າການກໍ່ສ້າງ 727 ລ້ານໂດລາ ຊຶ່ງປະກອບມີ8 ເຂດຄື: ເຂດສາງເກັບມ້ຽນນໍ້າມັນ, ເຂດຜະລິດສົ່ງອອກ (ເຂດອຸດສາຫະກຳເບົາ), ເຂດໂລຈິສຕິກພາກ(ເຂດສາງສິນຄ້າ ແລະ ສາງເຢັນ), ເຂດກັກກັນພືດ-ສັດ, ເຂດການຄ້າ, ເຂດເຕັກໂນໂລຊີ, ເຂດການເງິນ, ເຂດໂຮງງານກັ່ນ ແລະ ຫຼອມຄໍາ.

ໂອກາດດັ່ງກ່າວ, ທ່ານຮອງນາຍົກລັດຖະມົນຕີ ພ້ອມດ້ວຍຄະນະໄດ້ຢ້ຽມຊົມລານຕູ້ສິນຄ້າຊີວາຍ, ສາງຄ່ຽນຖ່າຍສິນຄ້າ ແລະ ຈຸດຄ່ຽນຖ່າຍສິນຄ້າລະຫວ່າງລາງມາດຕະຖານ ແລະ ລາງໜຶ່ງແມັດພ້ອມທັງຢ້ຽມຊົມຈຸດເຊື່ອມຕໍ່ຂົວມິດຕະພາບລາວ-ໄທແຫ່ງທີ່ 1 ຕື່ມອີກ.

ແຫຼ່ງຂ່າວ: ຂປລ