ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 17 ຕຸລາ ຜ່ານມານີ້, ທ່ານ ຫວໍວັນເຖືອງ ປະທານປະເທດ ຫວຽດນາມ ພ້ອມດ້ວຍຄະນະຜູ້ແທນຂັ້ນສູງຫວຽດນາມ, ໄດ້ໄປຮອດສະໜາມບິນນະຄອນຫຼວງປັກກິ່ງ ສປ ຈີນ, ເລີ່ມຕົ້ນການເຂົ້າຮ່ວມເວທີປາໄສຂັ້ນສູງກ່ຽວກັບການຮ່ວມມືສາກົນ “ໜຶ່ງແລວ, ໜຶ່ງເສັ້ນທາງ” ຄັ້ງທີ 3 ຊຶ່ງດໍາເນີນແຕ່ວັນທີ 17 – 20 ຕຸລາ 2023.

ຕາມວາລະດຳເນີນກອງປະຊຸມ, ທ່ານ ຫວໍວັນເຖືອງ ເຂົ້າຮ່ວມພິທີເປີດກອງປະຊຸມສຸດຍອດເວທີປາໄສຂັ້ນສູງຮ່ວມມືສາກົນ “ໜຶ່ງແລວ, ໜຶ່ງເສັ້ນທາງ” ຄັ້ງທີ 3, ໂດຍທ່ານ ສີຈິ້ນຜິງ ເລຂາທິການໃຫຍ່ ປະທານປະເທດ ສປ ຈີນ ເປັນປະທານ; ເຂົ້າຮ່ວມ ແລະ ກ່າວຄຳເຫັນໃນກອງປະຊຸມສຸດຍອດ ດ້ວຍຫົວຂໍ້: ເສດຖະກິດດີຈີຕອນ - ກຳລັງໜູນໃໝ່ຂອງການເຕີບໂຕ; ເຂົ້າຮ່ວມງານລ້ຽງຕ້ອນຮັບບັນດາຫົວໜ້າຄະນະ ແລະ ພັນລະຍາການນຳບັນດາປະເທດ ໂດຍທ່ານເລຂາທິການໃຫຍ່ ປະທານປະເທດ ສປ ຈີນ ແລະ ພັນລະຍາເປັນປະທານ.

ທ່ານ ຫວໍວັນເຖືອງ ຈະມີການພົບປະສອງຝ່າຍກັບການນຳບັນດາປະເທດ, ບັນດາອົງການຈັດຕັ້ງສາກົນ ທີ່ເຂົ້າຮ່ວມເວທີປາໄສຄັ້ງນີ້, ເປັນຕົ້ນແມ່ນ ທ່ານ ວະລາດີເມຍ ປູຕິນ ປະທານາທິບໍດີ ຣັດເຊຍ; ທ່ານ ທອງລຸນ ສີສຸລິດ ເລຂາທິການໃຫຍ່ ປະທານປະເທດ ສປປ ລາວ ແລະ ຈະມີການພົບປະສອງຝ່າຍກັບການນຳຈີນຫຼາຍໆທ່ານອີກດ້ວຍ.