ໃນວັນທີ 9 ກັນຍາຜ່ານມາ, ຢູ່ພະແນກແຜນການ ແລະ ການລົງທຶນແຂວງຈໍາປາສັກ ໄດ້ມີພິທີເຊັນບົດບັນທຶກຄວາມເຂົ້າໃຈ ວ່າດ້ວຍການສຶກສາສໍາຫຼວດຄວາມເປັນໄປໄດ້ໃນການລົງທຶນພັດທະນາໂຄງປູກເຂົ້າ, ຜະລິດແນວພັນເຂົ້າ ແລະ ພັດທະນາກະສິກໍາຄົບວົງຈອນ ໃນເນື້ອທີ່ 150 ເຮັກ ຢູ່ເຂດບ້ານອຸທຸມ ເມືອງສຸຂຸມາ ແຂວງຈໍາປາສັກ ລະຫວ່າງ ອົງການປົກຄອງແຂວງຈໍາປາສັກ ກັບ ບໍລິສັດ ດີເອັນເອສ ເຈແປນ ຄົບວົງຈອນ ຈໍາກັດຜູ້ດຽວ, ໂດຍການເຂົ້າຮ່ວມຂອງ ທ່ານ ອະລຸນໄຊ ສຸນນະລາດ ເຈົ້າແຂວງຈໍາປາສັກ, ມີທ່ານ ບູ໋ຍ ກວັກ ຢຸ໋ງ ຜູ້ອໍານວຍການບໍລິສັດ ດີເອັນເອສ ເຈແປນ ຄົບວົງຈອນ ຈໍາກັດຜູ້ດຽວ, ພ້ອມດ້ວຍການນໍາພະແນກການ-ກົມກອງທີ່ກ່ຽວຂ້ອງອ້ອມຂ້າງແຂວງ ແລະ ພະນັກງານວິຊາການທັງສອງຝ່າຍເຂົ້າຮ່ວມ.
ຕາງໜ້າອົງການປົກຄອງແຂວງຈໍາປາສັກໂດຍ ພະແນກແຜນການ ແລະ ການລົງທຶນ ລົງນາມໂດຍ ທ່ານ ປອ.ສຸກສະຫວັນ ວິໄລວົງ ຫົວໜ້າພະແນກແຜນການ ແລະ ການລົງທຶນແຂວງ, ບໍລິສັດ ດີເອັນເອສ ເຈແປນ ຄົບວົງຈອນ ຈໍາກັດຜູ້ດຽວ ລົງນາມໂດຍ ທ່ານ ບູ໋ຍ ກວັກ ຢຸ໋ງ ຜູ້ອໍານວຍການບໍລິສັດ ດີເອັນເອສ ເຈແປນ ຄົບວົງຈອນ ຈໍາກັດຜູ້ດຽວ.
ການເຊັນບົດບັນທຶກຄວາມເຂົ້າໃຈຄັ້ງນີ້, ແມ່ນປະຕິບັດຕາມຂໍ້ຕົກລົງ ຂອງເຈົ້າແຂວງຈໍາປາສັກ ເລກທີ 976/ຈຂ.ຈສ, ລົງວັນທີ 23 ສິງຫາ 2024 ວ່າດ້ວຍການມອບສິດໃຫ້ພະແນກແຜນການ ແລະ ການລົງທຶນແຂວງ ຕາງໜ້າອົງການປົກຄອງແຂວງ ເຊັນບົດບັນທຶກຄວາມເຂົ້າໃຈ ວ່າດ້ວຍການສຶກສາສໍາຫຼວດຄວາມເປັນໄປໄດ້ໃນການລົງທຶນພັດທະນາ ໂຄງການປູກເຂົ້າ, ຜະລິດແນວພັນເຂົ້າ ແລະ ພັດທະນາກະສິກຳ ຄົບວົງຈອນ ຢູ່ເຂດບ້ານອຸທຸມ ເມືອງສຸຂຸມາ ແຂວງຈໍາປາສັກ ໃນເນື້ອທີ່ 150 ເຮັກຕາ, ຂອງບໍລິສັດ ດີເອັນເອສ ເຈແປນ ຄົບວົງຈອນ ຈຳກັດຜູ້ດຽວ, ເປັນການລົງທຶນຂອງຕ່າງປະເທດ 100% ຊຶ່ງຈະໄດ້ເລີ່ມຈັດຕັ້ງປະຕິບັດໂຄງການສຶກສາສໍາຫຼວດ ນັບແຕ່ມື້ເຊັນບົດບັນທຶກຄວາມເຂົ້າໃຈ ເປັນຕົ້ນໄປ, ຄາດວ່າຈະໃຫ້ສໍາເລັດໃນເວລາ 12 ເດືອນ..
(ຂ່າວ-ພາບ: ທູນທອງໃຈ)
