ພາຍຫຼັງທີ່ເກີດມີຝົນຕົກຕິດຕໍ່ກັນເປັນເວລາຫຼາຍຊົວໂມງ ເລີ່ມຕັ້ງແຕ່ເວລາ 7 ໂມງເຊົ້າ ຈົນເຖິງຕອນບ່າຍ ວັນທີ 9 ກັນຍາ 2024 ເຮັດໃຫ້ແມ່ນ້ຳຫຼາຍສາຍມີລະດັບປະລິມານສູງຂຶ້ນ ພ້ອມທັງເກີດມີນ້ຳປ່າໄຫຼຊຸແຮງ ເຮັດໃຫ້ເກີດມີນ້ຳອັ່ງຖ້ວມພື້ນທີ່ທໍາການຜະລິດຂອງຊາວກະສິກອນ ຖະໜົນຫົນທາງປ່ເພ ໂດຍສະເພາະແມ່ນເສັ້ນທາງເລກ 2w ທາງທິດເໜືອ ກິໂລແມັດທີ 46 ທາງໄປເມືອງໄຊ. ຕໍ່ກັບສະພາບການດັ່ງກ່າວ ທ່ານ ຄໍາພອນ ພີມມະລາດ ວ່າການເຈົ້າເມືອງໆແບງ ພ້ອມດ້ວຍຄະນະ ໄດ້ລົງຕິດຕາມສະພາບການຢ່າງໄກ້ຊິດ ພ້ອມທັງລົງຕິດຕາມກວດກາຜົນກະທົບຢູ່ເຂດຕ່າງໆພາຍໃນເທດສະບານເມືອງແບງ ແລະ ເສັ້ນທາງ. ໃນນີ້, ເສັ້ນທາງເລກ 2w ກິໂລແມັດທີ 46 ທາງໄປເມືອງໄຊ ເຫັນວ່າເສັ້ນທາງສາຍດັ່ງກ່າວເກີດມີດິນເຈື່ອນຖົມທາງ, ຕົ້ນໄມ້ຫັກລົ້ມທັບຕາມເສັ້ນທາງ 1 ຈຸດ ປັດຈຸບັນພາກາກສ່ວນທີ່ກ່ຽວຂ້ອງແມ່ນເລັ່ງແກ້ໄຂສຸກເສີນ ແລະ ສາມາດທຽວໄປມາໄດ້ແລ້ວ, ນອກຈາກນັ້ນ ຍັງມີເສັ້ນທາງບາງເຂດເປ່ເພເລັກໜ່ອຍ, ສໍາລັບພື້ນທີ່ທໍາການຜະລິດຂອງພໍ່ແມ່ປະຊາຊົນ ພາກສ່ວນທີ່ກ່ຽວຂ້ອງຍັງຈະໄດ້ລົງເກັບກໍາຂໍ້ມູນຜົນເສຍຫາຍ ສ່ວນລາຍລະອຽດແມ່ນຈະລາຍງານໃຫ້ຊາບຕາມພາຍຫຼັງ.

ສະນັ້ນ, ຈຶ່ງແຈ້ງ ເຕືອນມາຍັງປະຊາຊົນທີ່ອາໄສລຽບຕາມແຄມສາຍນໍ້າ ໃຫ້ມີສະຕິເຝົ້າລະວັງຕໍ່ການປ່ຽນແປງຂອງສະພາບດິນຟ້າອາກາດ ຕິດຕາມລະດັບນໍ້າ ແລະ ນໍ້າຫ້ວຍຕ່າງໆ ທີ່ອາດຈະສູງຂຶ້ນເຖິ່ງເຂດອັນຕະລາຍ ເພື່ອປ້ອງກັນຄວາມເສຍຫາຍ ແລະ ຮັບມືກັບໄພພິບັດທີ່ອາດຈະເກີດຂຶ້ນໃຫ້ທັນເວລາ ພ້ອມກັນຕິດຕາມຂ່າວການປ່ຽນແປງຂອງສະພາບດິນຟ້າອາກາດຈາກກົມ ອຸຕຸນິຍົມ ແລະ ອຸທົກກະສາດ, ຈາກວິທະຍຸ, ລະບົບໂທລະໂຄ່ງ ແລະ ສື່ສັງຄົມອອນລາຍຕ່າງໆ ທີ່ເປັນທາງການ ແລະ ໜ້າເຊື່ອຖື, ພ້ອມນັ້ນ ກໍໃຫ້ເກັບມ້ຽນເຄື່ອງຂອງທີ່ມີຄ່າ, ສັດລ້ຽງໃຫ້ພາກັນຍົກຍ້າຍໄປບ່ອນທີ່ສູງ ແລະ ປອດໄພ.

(ຂ່າວ: ກິ່ງມະນີ)