ຕາມການລາຍງານຂອງຄະນະຄຸ້ມຄອງໄພພິບັດກໍຄືຫ້ອງການແຮງງານສະຫວັດດີການສັງຄົມເມືອງຜາອຸດົມ ແຂວງບໍ່ແກ້ວ ໃຫ້ຮູ້ວ່າ: ເນື່ອງຈາກຝົນຕົກໜັກຕິດຕໍ່ກັນຫຼາຍວັນ ນັບແຕ່ວັນທີ 8 - 9 ກັນຍາຜ່ານມານີ້, ມີຝົນຕົກໜັກເນື່ອງຈາກລົມພາຍຸໃຕ້ຝຸ່ນຢາກິ ເຮັດໃຫ້ມີນໍ້າປ່າໄຫຼຊຸຖ້ວມເຮືອນປະຊາຊົນຢູ່ບ້ານນາໂຮມ ມີຄວາມເສຍຫາຍຢ່າງໜັກໜ່ວງ, ມີຄອບຄົວທີ່ໄດ້ຮັບຜົນກະທົບເສຍຫາຍຫຼາຍຈໍານວນ 9 ຄອບຄົວ. ນອກຈາກນີ້, ຍັງມີເນື້ອທີ່ປູກຝັງຂອງພໍ່ແມ່ປະຊາຊົນເປັນຕົ້ນແມ່ນ: ສວນ, ໄຮ່ ແລະ ນາ ຢູ່ຈຸດບ້ານ ຫ້ວຍແປ້ນ, ບ້ານປາງທອງ ແລະ ນາແຄມລ້ອງນໍ້າຫາດ ບ້ານ ຖິ່ນແກ້ວ, ຜາອຸດົມ, ສີບຸນເຮືອງ, ໂຮມສຸກ, ໃຫ່ຍນໍ້າຍາວ, ຄໍາຝອງ, ກອນຊອດ, ຄະນອງ ແລະ ເຂດຈັດສັນຫາດໝວກ, ເສັ້ນທາງທີ່ໄດ້ຮັບຄວາມເສຍຫາຍດິນເຈື່ອນຂາດຢູ່ຈຸດຈັດສັນຫາດໝວກ, ຂົວຂ້າມຫ້ວຍໝວກ, ຈຸດບ້ານ ໃຫ່ຍນໍ້າຍາວ, ບ້ານສີບຸເຮືອງ, ຂົວນໍ້າຄາ ບ້ານ ນາໂຮມ ຂົ້ວຫ້ວຍເນືອມ ແລະ ເສັ້ນທາງແຕ່ບ້ານໄຊສະຫວ່າງ ຫາ ບ້ານນາຄູນຊາຍແດນເມືອງຮຸນ ແລະ ເສັ້ນທາງບ້ານ ຄະນອງ ຊຶ່ງປັດຈຸບັນເຮັດໃຫ້ການສັນຈອນໄປ-ມາພົບຄວາມຫຍຸ້ງຍາກ ຫຼື ເສັ້ນທາງບາງບ່ອນບໍ່ສາມາດສັນຈອນໄປ-ມາໄດ້. ຕໍ່ເຫດການດັ່ງກ່າວ, ທາງການນຳຂອງເມືອງ ໄດ້ສົມທົບກັບ ຄະນະກໍາມະການປ້ອງກັນໄພພິບັດຂັ້ນເມືອງ, ຄະນະກອງບັນຊາການທະຫານເມືອງ ແລະ ຄະນະກອງພັນໃຫ່ຍ ທະຫານຫາບ 302 ແລະ ຊາວໜຸມຕະລຸມບອນພາຍໃນເມືອງ ໄດ້ລະດົມກຳລັງ ທັງໝົດ 105 ສະຫາຍ, ຍິງ 19 ສະຫາຍ ລົງຊ່ວຍເຫຼືອປະຊາຊົນ ທີ່ຖືກຜົນກະທົບຫຼາຍບ້ານໂດຍສະເພາະ ບ້ານນາໂຮມ ຂົນເຂົ້າ ແລະ ເຄື່ອງຂອງຕ່າງໆອອກຈາກບ່ອນທີ່ມີຄວາມສ່ຽງນໍ້າຖ້ວມ ໄປໄວ້ບ່ອນທີ່ປອດໄພ.

(ຂ່າວ: ໂສພາ ທິບພະວົງ)