ບໍລິສັດຄໍາມ່ວນຊີມັງຈຳກັດຖືກສ້າງຕັ້ງຂຶ້ນໃນປີ 2014 ທີ່ບ້ານໂພວາ ເມືອງມະຫາໄຊ ແຂວງຄໍາມ່ວນ ດ້ວຍເງິນລົງທຶນ10,000 ລ້ານບາດ ເພື່ອຜະລິດຊີມັງຈໍາໜ່າຍໃນສປປລາວ ແລະ ສົ່ງອອກຕ່າງປະເທດ, ດໍາເນີນທຸລະກິດພາຍໃຕ້ອຸດົມການ 4 ປະການຄື: ຕັ້ງໝັ້ນໃນຄວາມເປັນທໍາ, ມຸ່ງໝັ້ນໃນຄວາມເປັນເລີດ, ເຊື່ອໝັ້ນ ໃນຄຸນຄ່າຂອງຄົນ ແລະ ມຸ່ງໝັ້ນໃນຄວາມຮັບຜິດຊອບຕໍ່ສັງຄົມ. ບໍລິສັດ ຄໍາມ່ວນຊີມັງ ຈຳກັດເປັນບໍລິສັດໃນເຄືອ ຂອງເອັສຊີຈີ (SCG) ຜູ້ຜະລິດ ແລະ ຈໍາໜ່າຍຊີມັງ, ວັດສະດຸກໍ່ສ້າງ, ວັດສະດຸຕົບແຕ່ງແບບຄົບວົງຈອນລາຍ ໃຫຍ່ໃນອາຊຽນ.

ທ່ານ ນົບປະດົນ ໄຕຣສັທ ຜູ້ອຳນວຍການບໍລິສັດ ຄຳມ່ວນຊີມັງ ຈຳກັດ ໄດ້ກ່າວວ່າ: ໂຮງງານຄໍາມ່ວນ ຊີມັງ ມີກຳລັງການຜະລິດ 1.8 ໂຕ່ນຕໍ່ປີ, ມີ 2 ຜະລິດຕະພັນຫຼັກໄດ້ແກ່ປູນຊີມັງສໍາລັບງານໂຄງສ້າງ ແລະ ປູນຊີມັງ ສຳລັບງານຕົບແຕ່ງ (ກໍ່, ໂບກ, ເທ) ໂດຍມີການຈໍາໜ່າຍຢູ່ພາຍໃນ ສປປ ລາວ ໃນອັດຕາສ່ວນ 30% ແລະ ປະເທດໄທ 70% ຊຶ່ງເປັນປູນທີ່ມີຄຸນນະພາບມາດຕະຖານດຽວກັນ. ດ້ານຂະບວນການຜະລິດໄດ້ນຳ ເທັກໂນໂລຊີໃໝ່ໆ ແລະ ທັນສະໄໝເຂົ້າໃນຂະບວນການຜະລິດໃນແຕ່ລະຂັ້ນຕອນ, ການຄວບຄຸມຄຸນນະພາບ ຜະລິດດ້ວຍເຄື່ອງມືວິເຄາະ ແລະ ທົດສອບທີ່ຖືກຕ້ອງ, ລະອຽດທີ່ສຸດມີປະສິດທິພາບສູງເຮັດໃຫ້ໝັ້ນໃຈໄດ້ເຖິງຄຸນ ນະພາບທີ່ໄດ້ມາດຕະຖານຂອງ ເອັສຊີຈີ ພ້ອມທັງນໍາໃຊ້ເທັກໂນໂລຊີທີ່ຊ່ວຍປະຢັດພະລັງງານ ແລະ ນໍາໃຊ້ ນໍ້າໜ້ອຍໂດຍຈະມີລະບົບການບໍາບັດນໍ້າເສຍເພື່ອໝູນວຽນນຳກັບມາໃຊ້ໃໝ່ ແລະ ບໍ່ມີການປ່ອຍນໍ້າເສຍອອກສູ່ແຫຼ່ງ ນໍ້າຕາມທຳມະຊາດ, ລວມໄປເຖິງການນຳຄວາມຮ້ອນທີ່ເຫຼືອຖິ້ມຈາກຂະບວນການຜະລິດ ຊີມັງມາຜະລິດເປັນ ກະແສໄຟຟ້າສາມາດທົດແທນການໃຊ້ກະແສໄຟຟ້າໄດ້ປະມານ 30% ຕໍ່ປີ, ມີລະບົບກໍາຈັດຝຸ່ນທີ່ມີປະສິດທິພາບສູງ ສາມາດກຳຈັດຝຸ່ນໄດ້ສູງສຸດເຖິງ 99.99% ເຮັດໃຫ້ການຜະລິດຊີມັງຄວບຄູ່ໄປກັບການຮັກສາຄຸນນະພາບອາກາດ. ບໍລິສັດໄດ້ຄັດເລືອກພະນັກງານທີ່ມີຄວາມຮູ້, ຄວາມສາມາດ, ເປັນຄົນດີ ແລະ ມີຄຸນນະທຳເຂົ້າຮ່ວມງານຕະຫຼອດ ເຖິງການຝຶກອົບຮົມທັງພາຍໃນ ແລະ ຕ່າງປະເທດເພື່ອພັດທະນາທັກສະຄວາມສາມາດ, ບໍລິສັດ ຄຳມ່ວນ ຊີມັງ ຈໍາກັດ ໄດ້ຢືດໝັ້ນໃນການມີສ່ວນຮ່ວມພັດທະນາຊີວິດຂອງຊຸມຊົນເຊັ່ນ: ຊ່ວຍສະໜັບສະໜູນດ້ານການສຶກສາ ພາຍໃຕ້ໂຄງການ SCG Sharing The Dream ມອບທຶນການສຶກສາໃຫ້ກັບນັກຮຽນທີ່ຮຽນເກັ່ງແຕ່ຂາດ ທຶນການສຶກສາເພາະການສຶກສາຄືຮາກຖານສຳຄັນຂອງການພັດທະນາປະເທດຊາດ. ນອກນີ້, ຍັງໄດ້ມອບ ເງິນກອງທຶນພັດທະນາທ້ອງຖິ່ນ ແລະ ກອງທຶນສ້າງຄວາມເຂັ້ມແຂງໃຫ້ກັບຂະແໜງການຂອງລັດ ເພື່ອນໍາໄປຈັດສັນໂຄງການຍົກລະດັບຄຸນນະພາບຊີວິດໃຫ້ກັບຊຸມຊົນ ແລະ ປະກອບສ່ວນໃຫ້ແກ່ສັງຄົມໃນ ດ້ານຕ່າງໆເຊັ່ນ: ໂຄງການປັບປຸງສ້ອມແປງເສັ້ນທາງ, ໂຄງການກໍ່ສ້າງຫ້ອງການບ້ານ, ສ້າງສູນຟື້ນຟູຜູ້ຕິດຢາ ເສບຕິດ, ມອບອຸປະກອນການແພດໃຫ້ແກ່ໂຮງໝໍ, ອຸປະກອນການສຶກສາໃຫ້ໂຮງຮຽນ ແລະ ຮ່ວມສະໜັບສະໜູນ ໃນງານບຸນສຳຄັນຕ່າງໆ. ປັດຈຸບັນ ພາຍໃນບໍລິສັດມີພະນັກງານລວມທັງໝົດ 200 ກວ່າຄົນ. ໃນນັ້ນ, ພະ ນັກງານທີ່ເປັນຄົນລາວກວມເຖິງ 92%.

ທ່ານ ວັນທອນ ບຸດສົມພັນ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງຄຳມ່ວນໄດ້ ລາຍງານກ່ຽວກັບການຄຸ້ມຄອງວຽກງານອຸດສາຫະກຳປຸງແຕ່ງໃນແຂວງຄຳມ່ວນໂດຍສະເພາະແມ່ນການຄຸ້ມຄອງ ພາຍໃນໂຮງງານ ຄໍາມ່ວນຊີມັງ ຊຶ່ງທາງພະແນກອຸດສາຫະກຳ ແລະ ການຄ້າແຂວງໄດ້ສົມທົບ ກັບ ພະແນກການ ທີ່ກ່ຽວຂ້ອງຂອງແຂວງລົງມາຕິດຕາມການດຳເນີນການຜະລິດຂອງບໍລິສັດຢ່າງເປັນປົກກະຕິຊຶ່ງເຫັນໄດ້ວ່າໂຮງງານດັ່ງກ່າວແມ່ນໄດ້ດຳເນີນການຜະລິດຖືກຕ້ອງຕາມຂັ້ນຕອນ, ຜະລິດຕະພັນແມ່ນມີຄຸນນະພາບ ແລະ ມີມາດ ຕະຖານດຽວກັນໃນອາຊຽນ. ສະນັ້ນ, ຈຶ່ງສະເໜີມາຍັງບັນດາບໍລິສັດກໍຄືສັງຄົມທີ່ມີຄວາມຕ້ອງການ ຜະລິດຕະພັນດັ່ງກ່າວທັງພາຍໃນ ແລະ ຂອບເຂດທົ່ວປະເທດພ້ອມກັນຊົມໃຊ້ຜະລິດຕະພັນ ທີ່ຜະລິດຢູ່ພາຍໃນເພື່ອສົ່ງເສີມການຜະລິດພາຍໃນ ແລະ ຫຼຸດຜ່ອນການນຳເຂົ້າຈາກຕ່າງປະເທດ.

(ຂ່າວ-ພາບ: ກອງຄຳ)