ໃນໂອກາດທີ່ທ່ານ ໄຊຍະເດດ ຜຸຍຍະວົງ ຮອງຫົວໜ້າພະແນກອຸດສາຫະກຳ ລະການຄ້າແຂວງສະຫວັນນະເຂດ ພ້ອມຄະນະວິຊາການໄດ້ລົງເຄື່ອນໄຫວຕິດຕາມການລ້ຽງໄກ່ລາດຂອງຟາມໄກ່ເກດສະໜາ ທີ່ຕັ້ງຢູ່ບ້ານ ໄຊສະອາດ ເມືອງອຸທຸມພອນ ແຂວງສະຫວັນນະເຂດ ໃນອາທິດທີ່ຜ່ານມານີ້.

ທ່ານ ທອງເພັດ ຄຳມະນີວົງ ຜູ້ອຳນວຍການຟາມໄກ່ລາດເກດສະໜາໄດ້ລາຍງານໃຫ້ຮູ້ວ່າ: ຟາມລ້ຽງໄກ່ລາດເກດສະໜາ ບໍ່ພຽງແຕ່ລ້ຽງໄກ່ລາດເປັນຫຼັກເທົ່ານັ້ນ, ແຕ່ວ່າຢູ່ໃນຟາມຂອງພວກເຮົາຍັງໄດ້ລ້ຽງສັດປະເພດອື່ນໆອີກ (ແຕ່ລ້ຽງບໍ່ຫຼາຍ) ເຊັ່ນ: ແບ້ 100 ໂຕ, ງົວລາດ ແລະ ງົວພັນ 30 ໂຕ, ຄວາຍ 9 ໂຕ (ລ້ຽງແບບທຳມະຊາດ). ຟາມແຫ່ງນີ້, ໄດ້ເລີ່ມຕົ້ນລ້ຽງໄກ່ລາດແຕ່ປີ 2018. ໃນເບື້ຶອງຕົ້ນໄດ້ລ້ຽງໄກ່ລາດ 500 ໂຕ. ຈາກນັ້ນ, ຟາມເກດສະໜາກໍໄດ້ຂະຫຍາຍການລ້ຽງອອກໄປເລື້ອຍໆຈົນມາຮອດປັດຈຸບັນນີ້. ພາຍໃນຟາມມີໄກ່ທັງໝົດ 100.000 ໂຕ, ມີ 5 ໂຮງເຮືອນ (ໂຮງເຮືອນລະ 20.000 ໂຕ) ຊຶ່ງການລ້ຽງແມ່ນຊື້ເອົາໄກ່ທີ່ມີນໍ້າໜັກປະມານ 5-7 ກະລາມ ຈາກນະຄອນຫຼວງວຽງຈັນ ແລະ ປາກເຊມາລ້ຽງທອມ ປະມານ 8 ອາທິດກໍສາມາດຂາຍໄດ້ (ໄກ່ແຕ່ລະໂຕມີນໍ້າໜັກປະມານ 2,5-3 ກິໂລ), ໄກ່ລາດທັງໝົດແມ່ນຂາຍສົ່ງອອກໄປ ສສ ຫວຽດນາມ. ທ່ານ ທອງເພັດ ຄຳມະນີວົງ ກ່າວຕື່ມວ່າ: ໃນອະນາຄົດອັນໃກ້ນີ້, ຈະໄດ້ມີໂຮງຂ້າໄກ່ເປັນຂອງຕົນເອງ, ໝາຍຄວາມວ່າຈະບໍ່ໄດ້ສົ່ງໄກ່ເປັນໆໄປ ສສ ຫວຽດນາມ, ຈະເຮັດຜະລິດເປັນໄກ່ປອກທີ່ມີຄຸນະພາບ (ໄກ່ທີ່ຄົວແລ້ວ) ສົ່ງອອກຂາຍ ແລະ ປັດຈຸບັນກໍມີແຜນທີ່ຈະຂະຫຍາຍການລ້ຽງໃຫ້ເພີ່ມຂຶ້ນອີກ.

ໃນໂອກາດນີ້, ທ່ານ ໄຊຍະເດດ ຜຸຍຍະວົງ ກໍໄດ້ໃຫ້ການແນະນຳຕໍ່ເຈົ້າຂອງຟາມຕ້ອງເອົາໃຈໃສ່ເນັ້ນໜັກໃດ້ານຄຸນະພາບຂອງການລ້ຽງ ແລະ ຜະລິດໃຫ້ຫຼາຍຂຶ້ນ, ສ່ວນໃນດ້ານການແລ່ນເອກະສານທາງດ້ານການຄ້າລະຫວ່າງລະຫວ່າງປະເທດ, ທາງພະແນກອຸດສາຫະກຳ ແລະ ການຄ້າແຂວງກໍຍິນດີໃຫ້ການຮ່ວມມື ແລະ ຊ່ວຍໃນດ້ານການປະສານງານກັບຝ່າຍການຄ້າຂອງ ສສ ຫວຽດນາມ.

(ຂ່າວ: ສະຫວັນ)