ກຸ່ມບໍລິສັດດອກງິ້ວຄຳຈຳກັດເຂດເສດຖະກິດພິເສດສາມຫຼ່ຽມຄຳ ໄດ້ມອບເງິນຊ່ວຍເຫຼືອ ຈຳນວນ 6.800.000.000 ກີບ ເພື່ອສົມທົບເຂົ້າກອງທຶນຄຸ້ມຄອງໄພພິບັດຂັ້ນສູນກາງໃນການຊ່ວຍເຫຼືອປະຊາຊົນທີ່ໄດ້ຮັບຜົນກະທົບໄພພິບັດໃນເຂດພາກກາງ, ເໜືອ ແລະ ພາກໃຕ້ຂອງ ສປປ ລາວ ໃນປີ 2024 ໂດຍສະເພາະ, ຊ່ວຍເຫຼືອປະຊາຊົນບັນດາແຂວງທີ່ຖືກໄພພິບັດນໍ້າຖ້ວມໃນຂອບເຂດທົ່ວປະເທດ. 
ພິທີມອບ-ຮັບເງິນຈຳນວນດັ່ງກ່າວໄດ້ຈັດຂຶ້ນໃນວັນທີ 11 ກັນຍານີ້ ທີ່ ສຳນັກງານນາຍົກ ລັດຖະມົນຕີ ໂດຍແມ່ນ ທ່ານ ຫວັງ ເອີເປົາ ຜູ້ອຳນວຍການກຸ່ມບໍລິສັດດອກງິ້ວຄຳ ຈຳກັດ ເປັນຜູ້ກ່າວມອບ ແລະ ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ) ຮອງປະທານຄະນະກຳມະການຄຸ້ມຄອງໄພພິບັດແຫ່ງຊາດຂັ້ນສູນກາງ ເປັນຜູ້ກ່າວຮັບ, ໂດຍໃຫ້ກຽດເຂົ້າຮ່ວມຂອງ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ແລະ ມີພາກສ່ວນທີ່ກ່ຽວຂ້ອງເຂົ້າຮ່ວມ, ໂອກາດດັ່ງກ່າວ ທ່ານ ກິແກ້ວ ໄຂຄຳພິທູນ ໄດ້ກ່າວສະແດງຄວາມຂອບໃຈຕໍ່ກຸ່ມບໍລິສັດດອກງິວຄຳ ຈຳກັດ ທີ່ໄດ້ນຳເອົາເງິນຈຳນວນດັ່ງກ່າວມາມອບໃຫ້ຄັ້ງນີ້ ຊຶ່ງຈະນຳໄປຊ່ວຍເຫຼືອປະຊົນທີ່ໄດ້ຮັບຜົນກະທົບຈາກໄພພິບັດນໍ້າຖ້ວມບັນດາແຂວງໃນຂອບເຂດທົ່ວປະເທດເພື່ອເປັນຂວັນກຳລັງໃຈໃຫ້ແກ່ພໍ່ແມ່ປະຊາຊົນຜູ້ທີ່ໄດ້ຮັບຜົນກະທົບຈາກໄພພິບັດດັ່ງກ່າວ. 
(ຂ່າວ-ພາບ: ສຳນານ)