ຂ່າວຕ່າງປະເທດລາຍງານ ໃນວັນທີ 10 ກັນຍາ ຜ່ານມາວ່າ: ທ່ານ ອັນໂຕນີ ອານບາເນັສນາຍົກລັດຖະມົນຕີອົສຕຣາລີ ໄດ້ປະກາດແຜນການຫ້າມເດັກນ້ອຍໃຊ້ສື່ສັງຄົມອອນລາຍ, ໂດຍລັດຖະບານຈະອອກກົດໝາຍພາຍໃນປີນີ້ ເພື່ອກໍານົດອາຍຸຂັ້ນຕໍ່າໃນການເຂົ້າເຖິງສື່ສັງຄົມອອນລາຍ ແລະ ແພລັດ ຟອມດີຈີຕອນອື່ນໆທີ່ກ່ຽວຂ້ອງ.
ທ່ານ ອັນໂຕນີ ອານບາເນັສກ່າວວ່າ: ສື່ສັງຄົມອອນລາຍ ກໍ່ໃຫ້ເກີດອັນຕະລາຍຕໍ່ສັງຄົມແລະກໍາລັງເຮັດໃຫ້ເດັກນ້ອຍຂາດການພົວພັນກັບໝູ່ເພື່ອນແລະປະສົບການໃນຊີວິດຈິງ,ໂດຍກົດໝາຍດັ່ງກ່າວຈະມີການພິຈາລະນາຮ່ວມກັບລັດ ແລະ ເຂດແຄ້ວນຕ່າງໆ. ແຕ່ໂດຍສ່ວນຕົວແລ້ວ ທ່ານ ອັນໂຕນີ ອານບາເນັສຕ້ອງການກໍານົດອາຍຸຂັ້ນຕໍ່າໄວ້ທີ່ 16 ປີ.
ຜົນການສຳຫຼວດຄວາມຄິດເຫັນທີ່ເຮັດໂດຍສະຖານີໂທລະພາບອົສຕຣາລີ ໃນເດືອນສິງຫາຜ່ານມາ ພົບວ່າ 61% ຂອງຊາວອົສຕຣາລີ ສະໜັບສະໜູນການຈໍາກັດການເຂົ້າເຖິງສື່ສັງຄົມອອນລາຍໃນກຸ່ມເດັກນ້ອຍທີ່ມີອາຍຸຕໍ່າກວ່າ 17 ປີ.