ໃນຂະນະທີ່ທຸກພາກ ສ່ວນກໍາລັງລະດົມການຊ່ວຍເຫຼືອໄພນໍ້າຖ້ວມແຂວງຫຼວງນໍ້າທາຢ່າງຫ້າວ ຫັນ ເພື່ອເປັນການຮອງຮັບ ທັງຮັບປະກັນວ່າເຄື່ອງຊ່ວຍເຫຼືອຈະຖືກສົ່ງໄປຮອດ ເຂດອຸທົກກະໄພ ນໍ້າຖ້ວມຢ່າງທັນເວລາ. ດັ່ງນັ້ນ, ທາງລົດໄຟລາວ-ຈີນ ໄດ້ເປິດໃຊ້ຂະບວນລົດໄຟສາຍດ່ວນພິເສດສະ ເພາະທີ່ສາມາດລຳລຽງເຄື່ອງຊ່ວຍເຫຼືອໄປຮອດເຂດດັ່ງກ່າວໄດ້ໂດຍກົງ.

ທ່ານ ສົມຊາຍ ລາວລີ້ວ ແລະ ທ່ານ ກາເຢັງ ຊົງປໍລີ ພະນັກງານຂັບລົດໄຟຄົນລາວ ຮຸ່ນທໍາອິດທີ່ຜ່ານການຝຶກອົບຮົບຈາກທາງລົດໄຟລາວ-ຈີນ ແລະ ຜ່ານການກວດສອບຄຸນນະວຸດ ທິໃນການຂັບລົດໄຟ, ທັງສອງຄົນທີ່ຮັບໜ້າທີ່ເປັນຄົນຂັບລົດໄຟຂົນສົ່ງເຄື່ອງຊ່ວຍເຫຼືອຂະບວນ ດັ່ງກ່າວ ແລະ ກໍເປັນໜຶ່ງໃນ 14 ຄົນທີ່ຫາກໍໄດ້ຮັບໃບຢັ້ງຢືນນັກຂັບລົດໄຟທີ່ອອກໃຫ້ ໂດຍກະ ຊວງໂຍທາທິການ ແລະ ຂົນສົ່ງ ສປປ ລາວ ໃນເດືອນສິງຫາ ປີ 2024 ທີ່ຜ່ານມານີ້ ເຮັດໃຫ້ທັງສອງຄົນໄດ້ກາຍ ເປັນນັກຂັບລົດໄຟທີ່ສາມາດຂັບລົດໄຟໄດ້ດ້ວຍຕົວເອງຮຸ່ນທຳອິດຂອງລາວ.

ທ່ານ ສົມຊາຍ ລາວລີ້ວ ໄດ້ສະແດງຄວາມຮູ້ສຶກຕໍ່ນັກຂ່າວວ່າ: ຕົນເອງຮູ້ສືກຕື່ນເຕັ້ນ ແລະ ດີໃຈຫຼາຍ ຍ້ອນວ່າຕົນເອງເຮັດວຽກເປັນຄົນຂັບລົດໄຟຢູ່ທາງລົດໄຟລາວ-ຈີນ. ສະນັ້ນ, ໃນເວລາທີ່ບ້ານເກີດເມືອງນອນມີຄວາມຕ້ອງການ ຕົນເອງສາມາດຂັບລົດ ໄຟຂົນສົ່ງເຄື່ອງຊ່ວຍ ເຫຼືອບັນເທົາທຸກຂຶ້ນໄປຊ່ວຍປະຊາຊົນລາວຢູ່ເຂດປະສົບໄພນໍ້າຖ້ວມຢ່າງທັນການ ທັງນີ້ຕ້ອງຂອບໃຈທາງລົດໄຟລາວ-ຈີນທີ່ມອບໂອກາດແກ່ຕົນເອງ ເຮັດໃຫ້ມີໂອກາດຕອບແທນ ແລະ ບໍລິການບ້ານເກີດເມືອງນອນຂອງຕົນໄດ້ດີກວ່າເກົ່າ. ໃນວັນທີ 12 ກັນ ຍາຜ່ານມາ ໄດ້ເລີ່ມຂົນສົ່ງເຄື່ອງຊ່ວຍເຫຼືອຈາກສະຖານີວຽງຈັນໃຕ້ໄປລົງສະຖານີນາເຕີຍ 1 ຂະບວນ ແລະ ຈາກສະຖານີບໍ່ເຕ່ນມາລົງສະຖານີນາເຕີຍ 1 ຂະບວນ; ໃນວັນທີ 13 ກັນຍາຜ່ານມາ ໄດ້ສືບຕໍ່ຂົນສົ່ງເຄື່ອງຊ່ວຍເຫຼືອຈາກສະຖານີວຽງຈັນໃຕ້ໄປລົງສະຖານີນາເຕີຍ ແລະ ຈາກສະຖານີບໍ່ເຕ່ນມາລົງສະຖານີນາເຕີຍ ຊຶ່ງເຄື່ອງຊ່ວຍເຫຼືອທີ່ຂົນສົ່ງຈາກບໍ່ເຕ່ນມາລົງນາເຕີຍແມ່ນເຄື່ອງຊ່ວຍເຫຼືອທີ່ມາຈາກ ສປ ຈີນ. ໃນນັ້ນ, ມີເຄື່ອງໃຊ້ຈຳເປັນຫຼາຍຢ່າງເຊັ່ນ: ນ້ຳດື່ມ, ອາຫານແຫ້ງ, ທຽນໄຂ, ຜ້າຫົ່ມ, ເສື່ອນອນ ແລະ ອື່ນໆ. ລົດໄຟຂະບວນດ່ວນສະເພາະນີ້ ແມ່ນທາງລົດໄຟລາວ-ຈີນໃຫ້ບຸລິມະສິດໃນການອອກລົດ ແລະ ການຂົນເຄື່ອງຊ່ວຍເຫຼືອກ່ອນ, ເຄື່ອງຊ່ວຍເຫຼືອທີ່ມາຮອດສະຖານີຈະສາມາດຈັດໂຫຼດຂຶ້ນລົດໄດ້ເລີຍ. ທາງລົດໄຟລາວ-ຈີນ ໄດ້ເຮັດວຽກແຂ່ງກັບເວລາເພື່ອຮັບຮອງວ່າເຄື່ອງຊ່ວຍເຫຼືອທັງໝົດຈະຖືກຂົນສົ່ງໄປຮອດເຂດນໍ້າຖ້ວມຢ່າງທັນເວລາ. ພະນັກງານທາງລົດໄຟລາວ-ຈີນແຕ່ລະຄົນ ຍັງໄດ້ສືບຕໍ່ຊ່ວຍກັນ ປະກອບສ່ວນເຂົ້າໃນການຊ່ວຍເຫຼືອໄພນ້ຳຖ້ວມຄັ້ງນີ້.

(ຂ່າວ: ວັນເພັງ, ຂໍ້ມູນຈາກ: ທາງລົດໄຟລາວ-ຈີນ)