ທະນາການແຫ່ງ ສປປ ລາວ(ທຫລ)  ໄດ້ຈັດກອງປະຊຸມ ແລກປ່ຽນຄໍາເຫັນຕໍ່ຮ່າງນິຕິກໍາ ທີ່ຕິດພັນກັບການຄຸ້ມຄອງເງິນຕາຕ່າງປະເທດ  2 ສະບັບ ຢູ່ ສປປ ລາວ ຄື: ຮ່າງຂໍ້ຕົກລົງ ວ່າດ້ວຍການນໍາໃຊ້ເງິນຕາຕ່າງປະເທດຢູ່ ສປປ ລາວ ແລະ ຮ່າງຂໍ້ຕົກລົງ ວ່າດ້ວຍບັນຊີເງິນຝາກເປັນເງິນຕາຕ່າງປະເທດຢູ່ ສປປ ລາວ ໃນວັນທີ 16 ກັນຍາ ຜ່ານມາ, ໂດຍການເປັນປະທານຂອງ ທ່ານ ສຸລິວັດ ສຸວັນນະຈູມຄຳ ຮອງຜູ້ວ່າການ ທະນາຄານແຫ່ງ ສປປ ລາວ  ແລະ ມີພາກທຸລະກິດ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ສຸລິວັດ ສຸວັນນະຈູມຄຳ ກ່າວວ່າ:ຜ່ານມາ ທຫລ ຍັງບໍ່ໄດ້ຜັນຂະຫຍາຍເປັນນິຕິກໍາອັນສະເພາະ ເພື່ອຄຸ້ມຄອງການນໍາໃຊ້ເງິນຕາຕ່າງປະເທດ ແລະ ການເປີດບັນຊີເງິນຝາກເປັນຕາຕ່າງປະເທດ ຢູ່ ສປປ ລາວ ດັັ່ງກ່າວ, ເຮັດໃຫ້ການຄອບຄອງເງິນຕາຕ່າງປະເທດ ທັງໃນຮູບແບບເງິນຝາກ ແລະ ເງິນສົດໃນສັງຄົມລາວ ຍັງມີການປະຕິບັດບໍ່ເປັນເອກະພາບ ແລະ ບໍ່ມີມາດຕະຖານທີ່ຊັດເຈນ. ສະນັ້ນ, ໂດຍອີງຕາມຄວາມຈໍາເປັນຄື ດັັ່ງກ່າວ, ທະນາຄານແຫ່ງ ສປປ ລາວ ຈະໄດ້ນໍາສະເໜີ 2 ນິຕິກໍາທີ່ສໍາຄັນຄື:1. ຮ່າງຂໍ້ຕົກລົງວ່າດ້ວຍການນໍາໃຊ້ເງິນຕາຕ່າງປະເທດຢູ່ ສປປ ລາວແລະ 2. ຮ່າງຂໍ້ຕົກລົງວ່າດ້ວຍບັນຊີເງິນຝາກເປັນເງິນຕາຕ່າງປະເທດຢູ່ ສປປ ລາວ ຊຶ່ງທັງ 2 ນິຕິກໍາດັັ່ງກ່າວ ຈະມີຄວາມສໍາຄັນຄື: 1.  ຈະເປັນເຄື່ອງມື ຂອງ ທະນາຄານແຫ່ງ ສປປ ລາວ ລວມທັງພາກສ່ວນກ່ຽວຂ້ອງ ເພື່ອນໍາໃຊ້ເຂົ້າໃນການຄຸ້ມຄອງ ການນໍາໃຊ້ເງິນຕາຕ່າງປະເທດ ແລະ ການເປີດບັນຊີເງິນຝາກເປັນເງິນຕາຕ່າງປະເທດ ຢູ່ພາຍໃນ ສປປ ລາວ; 2. ສ້າງຄວາມເປັນລະບຽບຮຽບຮ້ອຍ ແລະ ຄວາມເປັນເອກະພາບຕໍ່ການຈັດຕັ້ງປະຕິບັດຂອງ ທຸກພາກສ່ວນທີ່ກ່ຽວຂ້ວງ ທັງສູນກາງ ແລະ ທ້ອງຖິ່ນ, 3. ເພື່ອເປັນການຊຸກຍູ້ສົ່ງເສີມການຄ້າ, ການບໍລິການ ແລະ ການລົງທຶນ ລະຫວ່າງປະເທດ ເຮັດໃຫ້ມີລາຍຮັບເປັນເງິນຕາຕ່າງປະເທດ ເຂົ້າສູ່ລະບົບທະນາຄານຫຼາຍຍິ່ງຂຶ້ນ.ໂດຍລວມເປົ້າໝາຍສູງສຸດຂອງ ທຫລ ແມ່ນຢາກໃຫ້ທຸກພາກສ່ວນນໍາໃຊ້ເງິນກີບຢ່າງເປັນເອກະພາບ, ນໍາໃຊ້ເງິນຕາຕ່າງປະເທດຢ່າງເປັນລະບຽບຮຽບຮ້ອຍຖືກຕ້ອງຕາມວັດຖຸປະສົງ ແລະ ເປົ້າໝາຍ, ນໍາໃຊ້ເງິນຕາຕ່າງປະເທດຢ່າງປະຢັດ ແລະ ຮັບປະກັນຖານະເງິນຕາຕ່າງປະເທດຊໍາລະກັບຕ່າງປະເທດໃຫ້ມີຄວາມເຂັ້ມແຂງ.

 ທ່ານປະທານກອງປະຊຸມ  ຈຶ່ງໄດ້ ຮຽກຮ້ອງມາຍັງບັນດາທ່ານ ຜູ້ເຂົ້າຮ່ວມກອງປະຊຸມ ຈົ່ງພ້ອມກັນຍົກສູງຄວາມຮັບຜິດຊອບໃນການຕິດຕາມ, ຄົ້ນຄວ້າ, ໄຈ້ແຍກບັນຫາ ແລະ ປະກອບຄວາມຄິດຄວາມເຫັນໃນແຕ່ລະບັນຫາ ຢ່າງສ້າງສັນ ແລະ ກົງໄປກົງມາ ເພື່ອເຮັດໃຫ້ກອງປະຊຸມມີຂໍ້ສະຫຼຸບທີ່ລະອຽດ-ຈະແຈ້ງ, ສາມາດນຳເອົາຄວາມຄິດຄວາມເຫັນດັ່ງກ່າວ ໄປປັບປຸງເຂົ້າໃນນິຕິກໍາໃຫ້ມີເນື້ອໃນຄວາມຄົບຖ້ວນສົມບູນ ແລະ ຮັບປະກັນໃນການຈັດຕັ້ງປະຕິບັດໃນຕໍ່ໜ້າໃຫ້ມີປະສິດທິຜົນສູງ.

(ຂ່າວ:ຕຸໄລເພັດ ຂໍ້ມູນ ທຫລ)