ເຈົ້າຄອງນະຄອງຫຼວງວຽງຈັນ (ນວ) ລົງຕິດຕາມສະພາບ ແລະ ມອບເຄື່ອງຊ່ວຍເຫຼືອໃຫ້ປະຊາຊົນ ທີ່ຖືກຜົນກະທົບຈາກໄພນໍ້າຖ້ວມຢູ່ ເມືອງຫາດຊາຍຟອງ ໂດຍສະເພາະ ຢູ່ທີ່ບ້ານ ດອນເກີດ ມີ 154 ຄອບຄົວ ທີ່ຖືກນໍ້າຖ້ວມ ລວມທັງເນື້ອທີ່ທໍາການຜະລິດຂອງປະຊາຊົນ ກໍຖືກນໍ້າຖ້ວມ 1 ຮ້ອຍກວ່າ ເຮັກຕາ. .

ໃນວັນທີ 15 ກັນຍາຜ່ານມາ, ທ່ານ ອາດສະພັງທອງ ສີພັນດອນ ເຈົ້າຄອງ ນວ ພ້ອມດ້ວຍຄະນະ ໄດ້ລົງຕິດຕາມສະພາບນໍ້າຖ້ວມ ແລະ ມອບເຄື່ອງອຸປະໂພກ-ບໍລິໂພກ ປະເພດເຂົ້າສານອາຫານແຫ້ງ ໃຫ້ປະຊາຊົນທີ່ຖືກຜົນກະທົບຈາກໄພນໍ້າຖ້ວມຢູ່ບ້ານ ດອນເກີດ ເມືອງ ຫາດຊາຍຟອງ ນວ.

ການລົງມອບເຄື່ອງຄັ້ງນີ້, ທ່ານ ເຈົ້າຄອງ ນ.ວ ພ້ອມດ້ວຍຄະນະ ໄດ້ຂີ່ເຮືອລົງໄປມອບເຄື່ອງບັນເທົາທຸກໃຫ້ກັບປະຊາຊົນ ເຖິງທີ່ ຢູ່ແຕ່ລະຫຼັງຄາເຮືອນ ຊຶ່ງສະແດງເຖິງຄວາມເປັນຫວ່ງເປັນໄຍ ຈາກການນໍາພັກ-ລັດ ນະຄອນຫຼວງວຽງຈັນ ຕໍ່ປະຊາຊົນ ກໍຄືຄອບຄົວຜູ້ທີ່ຖືກຜົນກະທົບຈາກໄພນໍ້າຖ້ວມ ທັງເປັນການຊ່ວຍເຫຼືອ  ບັນເທົາທຸກໃນເບື້ອງຕົ້ນ, ສີ່ງສໍາຄັນກໍເພື່ອໄປໃຫ້ກໍາລັງໃຈ, ໃຫ້ຄວາມອົບອຸ່ນແກ່ປະຊາຊົນ ທີ່ຖືກຜົນກະທົບໃນຄັ້ງນີ້.

ສໍາລັບບ້ານ ດອນເກີດ ແມ່ນບ້ານໜຶ່ງຂອງເມືອງ ຫາດຊາຍຟອງ ທີ່ໄດ້ຮັບຜົນກະທົບຈາກນໍ້າຖ້ວມຫຼາຍສົມຄວນ ຊຶ່ງໃນຈໍານວນ 154 ຄອບຄົວ ແມ່ນຖືກນໍ້າຖ້ວມທັງໝົດ. ນອກນີ້, ຍັງຖ້ວມເນື້ອທີ່ທໍາການຜະລິດຈໍານວນ 101 ເຮັກຕາ ໄດ້ແກ່ເນື້ອທີ່ປູກຜັກບົ່ວ, ຫອມລາບ, ຫອມປ້ອມ, ຜັກກາດ, ສະລັດ ແລະ ຫມາກເລັ່ນ. ເຊີ່ງສ້າງຄວາມເສຍຫາຍໃຫ້ກັບຜົນຜະລິດກະສິກໍາປະຊາຊົນພາຍໃນບ້ານ ເປັນຈໍານວນຫຼາຍ.

ນັບແຕ່ມື້ຖືກຜົນກະທົບຈາກນໍ້າຖ້ວມ ກໍໄດ້ມີຫຼາຍພາກສ່ວນ ໄດ້ມອບເຄື່ອງຊ່ວຍເຫຼືອເຊັ່ນ: ເຂົ້າກ່ອງ, ໝີ່, ນໍ້າດື່ມ ແລະ ອື່ນໆ.

(ຂ່າວ : ຕຸ້ຍ,  ພາບ: ໂບ້)