ບໍລິສັດ ຊຸນດາການຄ້າ, ຂົນສົ່ງ, ຂາອອກ-ຂາເຂົ້າ ແລະ ຫ້ອງການພາສີປະຈໍາແຂວງຈໍາປາສັກ -ດ່ານພາສີວັງເຕົ່າ, ໃຫ້ການຊ່ວຍເຫຼືອແກ່ແຂວງຈໍາປາສັກ ເພື່ອບັນເທົາທຸກໃຫ້ຜູ້ປະສົບໄພ ຈາກເຫດ ໄພພິບັດນໍ້າຖ້ວມ.
      ພິທີມອບ-ຮັບ, ເງິນຄັ້ງນີ້ ຈັດຂຶ້ນໃນວັນທີ 16 ກັນຍາຜ່າມາ ຢູ່ຫ້ອງວ່າການແຂວງຈໍາປາສັກ, ໂດຍການໃຫ້ກຽດເຂົ້າຮ່ວມຂອງທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມຄະນະ, ມີພາກສ່ວນກ່ຽວຂ້ອງ ທັງສອງຝ່າຍ ເຂົ້າຮ່ວມເປັນສັກຂີພະຍານ. ການປະກອບສ່ວນຄັ້ງນີ້, ບໍລິສັດ ຊຸນດາ ການຄ້າ, ຂົນສົ່ງ, ຂາອອກ-ຂາເຂົ້າ ຈໍາກັດ ມອບເງິນ 200.000.000 ກີບ ໃຫ້ແກ່ແຂວງຈໍາປາສັກ, ມອບໂດຍທ່ານ ອາຕົງ ປະທານ ບໍລິສັດ ຊຸນດາ ການຄ້າ ແລະ ຕາງໜ້າຮັບໂດຍ ທ່ານ ໂສມ ບຸດຕະກຸນ ຮອງເຈົ້າແຂວງຈໍາປາສັກ ຫົວໜ້າຄະນະ ກໍາມະການຄຸ້ມຄອງໄພພິບັດແຂວງ. ໃນວັນດຽວກັນນີ້, ຫ້ອງການພາສີແຂວງ-ດ່ານພາສີວັງເຕົ່າ ປະກອບສ່ວນຊ່ວຍເຫຼືອ ເປັນ ເຄື່ອງບໍລິໂພກ ລວມມູນຄ່າ 12.878.000 ກີບ, ຕາງໜ້າມອບໂດຍທ່ານ ພູຊ່ອງ ສົມຄິດ ຫົວໜ້າດ່ານພາສີສາກົນວັງເຕົ່າ ແລະ ທ່າບົກວົງເຕົ່າ, ຕາງໜ້າຮັບໂດຍ ທ່ານ ອຸດົມສັກ ດີວິໄຊ ຫົວໜ້າ ພະແນກແຮງງານ ແລະ  ສະຫວັດດີການສັງຄົມ.
ໂອກາດດັ່ງກ່າວ, ເຈົ້າແຂວງຈໍາປາສັກ ກໍໄດ້ສະແດງຄວາມຂອບໃຈ ແລະ ຕີລາຄາສູງ ຕໍ່ການສະໜັບສະໜຸນປະກອບສ່ວນ ຂອງທັງສອງພາກສ່ວນ, ເພື່ອຊ່ວຍເຫຼືອຜູ້ທີ່ໄດ້ຮັບຜົນກະທົບຈາກໄພພິບັດ ແລະ ວຽກງານການຕ້ານໄພພິບັດ ຂອງຄະນະກໍາມະການຕ້ານໄພພິບັດຂັ້ນແຂວງ, ໃນສະພາບທີ່ກໍາລັງເຝົ້າລະວັງ ເພື່ອສະກັດກັ້ນ ແລະ ຫຼຸດຜ່ອນຄວາມເສຍຫາຍ.
ຂ່າວ-ພາບ: ພູທິບສະຫັວນ