ເພື່ອເປັນການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່ທີ່ເປັນມູນເຊື້ອ, ຄວາມສາມັກຄີພິເສດ ລະ ຫວ່າງສອງພັກ-ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ເວົ້າລວມ, ເວົ້າສະເພາະ ສອງແນວໂຮມລາວ-ຫວຽດນາມ ຫວ່າງມໍ່ໆມານີ້, ຄະນະກຳມະການສູນກາງແນວລາວສ້າງຊາດ (ສນຊ) ໄດ້ເຄື່ອນໄຫວພົບປະຢ້ຽມຢາມ ແລະ ເຮັດວຽກກັບຄະນະກໍາມະການແນວໂຮມປະເທດຊາດຫວຽດນາມແຂວງເຫງະອານ ສສ ຫວຽດນາມ ຝ່າຍລາວນຳໂດຍທ່ານ ອ໋ອດ ພົງສະຫວັນ ຮອງປະທານຜູ້ບໍ່ປະຈຳການ ສນຊ, ຝ່າຍຫວຽດນາມ ນຳໂດຍທ່ານ ວໍ້ ທິ ມິງ ຊິງ ຄະນະປະຈຳພັກແຂວງ ປະທານແນວໂຮມປະເທດຊາດຫວຽດນາມ ແຂວງເຫງະອານ ພ້ອມດ້ວຍຄະນະຜູ້ແທນຂອງທັງສອງຝ່າຍເຂົ້າຮ່ວມ.

ໃນພິທີ, ທ່ານປະທານແນວໂຮມປະເທດຊາດຫວຽດນາມ ແຂວງເຫງະອານ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ໄດ້ລາຍງານໂດຍຫຍໍ້ກ່ຽວກັບວຽກງານແນວໂຮມຂອງແຂວງໃນໄລຍະຜ່ານມາ ຊຶ່ງໄດ້ໃຫ້ຮູ້ວ່າແນວໂຮມປະເທດຊາດຫວຽດນາມແຂວງເຫງະອານ ໄດ້ເອົາໃຈໃສ່ຊຸກຍູ້ປຸກລະດົມຄວາມສາມັກຄີປອງດອງຂອງປະຊາຊົນບັນດາ ເຜົ່າພາຍໃນທົ່ວແຂວງ ໂດຍສະເພາະການປຸກລະດົມພາກສ່ວນຕ່າງໆ ເພື່ອປະກອບສ່ວນເຂົ້າໃນການຊ່ວຍເຫຼືອປະຊາຊົນຜູ້ທີ່ທຸຸກຍາກຢູ່ເຂດຫ່າງໄກສອກຫຼີກ-ຊົນນະບົດ ຊຶ່ງໄດ້ປຸກເຮືອນໃຫ້ປະຊາຊົນທີ່ທຸກຍາກທັງໝົດ 8 ພັນກວ່າຫຼັງ, ບັນລຸໄດ້ 52 ຂອງແຜນງານປະຈຳປີ ພ້ອມດຽວກັນນັ້ນ, ຍັງໄດ້ປຸກລະດົມທຶນເພື່ອຊ່ວຍເຫຼືອປະຊາຊົນທີ່ປະສົບອຸທົກກະໄພໄດ້ 3 ພັນກວ່າຄົນ; ປຸກລະດົມປະຊາຊົນຊາວຫວຽດນາມນຳໃຊ້ຜະລິດຕະພັນຂອງປະເທດຕົນເອງ ແລະ ປຸກລະດົມໃຫ້ປະຊາຊົນທຳການຜະລິດກະສິກຳເປັນສິນຄ້າອີກດ້ວຍ.

ໂອກາດນີ້, ທ່ານ ອ໋ອດ ພົງສະຫວັນ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນຂອງຄະນະກຳມະ ການແນວໂຮມປະເທດຊາດຫວຽດນາມ ແຂວງເຫງະອານ ຊຶ່ງໄດ້ຍົກໃຫ້ເຫັນສະພາບລວມໃນການເຄື່ອນໄຫວວຽກງານ ກອງທຶນສາມັກຄີພັດທະນາຂອງແນວລາວສ້າງຊາດໃນໄລຍະຜ່ານມາ ຊຶ່ງໄດ້ສົ່ງເສີມໃຫ້ປະຊາຊົນທຳການຜະລິດກະສິ ກຳເປັນສິນຄ້າເພື່ອສ້າງລາຍຮັບໃຫ້ແກ່ຄອບຄົວ ແລະ ແກ້ໄຂຊີວິດການເປັນຂອງປະຊາຊົນໃຫ້ນັບມື້ດີຂຶ້ນເທື່ອລະກ້າວ. ພ້ອມນັ້ນ, ທ່ານຍັງໄດ້ສະເໜີໃຫ້ແຂວງເຫງະອານ ສືບຕໍ່ຊ່ວຍເຫຼືອທາງດ້ານວິຊາການ ທາງດ້ານການກະເສດເພື່ອມາຊ່ວຍວິໄຈດິນທຳການຜະລິດຢູ່ ສປປ ລາວ ໂດຍສະເພາະຢູ່ບັນດາແຂວງພາກເໜືອທີ່ມີຊາຍແດນຕິດຈອດກັບ ສສ ຫວຽດນາມ ແລະ ແຂວງແຮກສ່ຽວກັບແຂວງເຫງະອານ ພ້ອມທັງຊ່ວຍຍົກລະດັບວຽກງານວິຊາການໃຫ້ພະນັກງານຮັບຜິດຊອບວຽກງານກະສິກຳຂອງ ສປປ ລາວ; ສະເໜີໃຫ້ບັນດາແຂວງແຮກສ່ຽວສືບຕໍ່ຈັດຕັ້ງຜັນຂະຫຍາຍບົດບັນທຶກການຮ່ວມມືຢູ່ຂັ້ນແຂວງໃຫ້ໄດ້ຮັບຜົນສຳເລັດຫຼາຍຂຶ້ນກວ່າເກົ່າ. ຈາກນັ້ນ, ຄະນະຜູ້ແທນທັງສອງຝ່າຍໄດ້ພ້ອມກັນປະ ກອບຄຳຄິດຄຳເຫັນ ແລກປ່ຽນບົດຮຽນຕໍ່ບາງວຽກງານທີ່ຈະຕ້ອງສືບຕໍ່ຮ່ວມມືກັນໃນຕໍ່ໜ້າ.

ຈາກນັ້ນ, ຄະນະໄດ້ເຄື່ອນໄຫວຢ້ຽມຢາມເຂດພັດທະນາອຸດສາຫະກຳ WHA Group, ເຂດພັດທະນາ VSIP, ຢ້ຽມຢາມຄອບຄົວຕົວແບບໃນການເຮັດນ້ຳປາ-ກະປິ, ອາຫານທະເລທີ່ເປັນສິນຄ້າຂະໜາດນ້ອຍ ແລະ ຢ້ຽມຢາມເຂດຮ່ອງຮອຍປະຫວັດສາດຂອງແຂວງຈໍານວນໜຶ່ງຕື່ມອີກ.

ຂ່າວ-ພາບ: ຢຢ