ໃນລະຫວ່າງວັນທີ 29 ກັນຍາ - 4 ຕຸລາ 2024, ຄະນະສື່ມວນຊົນ 4 ແຂວງພາກໃຕ້ ສປປ ລາວ ປະກອບມີ: ແຂວງເຊກອງ, ສາລະວັນ, ຈໍາປາສັກ ແລະ ແຂວງອັດຕະປື ໄດ້ເຄື່ອນໄຫວຢ້ຽມຢາມ ແລະແລກປ່ຽນບົດຮຽນຢູ່ແຂວງບິ່ງດິ້ງ ສສ ຫວຽດນາມ; ຊຶ່ງໃນໄລຍະເຄື່ອນໄຫວຢ້ຽມຢາມ, ຄະນະສື່ມວນຊົນ 4 ແຂວງພາກໄຕ້ໄດ້ເຂົ້າພົບປະ ແລະ ຢ້ຽມຊົມສະຖານີວິທະຍຸ-ໂທລະພາບແຂວງບິ່ງດິ້ງ ໂດຍການຕ້ອນຮັບຂອງທ່ານ ຫງວຽນ ກົງ ເຊິນ ຜູ້ອໍານວຍການສະຖານີວິທະຍຸ-ໂທລະພາບແຂວງບິ່ງດິ້ງ, ມີຮອງຜູ້ອໍານວຍການ, ຫົວໜ້າ-ຮອງພະແນກ ພ້ອມດ້ວຍພະນັກງານ ເຂົ້າຮ່ວມ.

ການພົບປະຄັ້ງນີ້, ມີຈຸດປະສົງ ເພື່ອແລກປ່ຽນບົດຮຽນເຊິ່ງກັນ ແລະ ກັນ ກ່ຽວກັບການຜະລິດລາຍການ ແລະ ການນໍາສະເໜີຂໍ້ມູນ-ຂ່າວສານຜ່ານທາງວິທະຍຸ ແລະ ໂທລະພາບ ເພື່ອໃຫ້ປະຊາຊົນ ກໍຄືສັງຄົມໄດ້ຮັບຮູ້ໃນແຕ່ລະວັນ. ພ້ອມກັນນີ້, ຄະນະສື່ມວນຊົນ 4 ແຂວງ ຍັງໄດ້ຮັບຟັງລາຍງານການເຄື່ອນໄຫວວຽກງານວິຊາສະເພາະ, ຮັບຊົມວີດີໂອປະຫວັດຄວາມເປັນມາ ແລະ ການພັດທະນາສະຖານີວິທະຍຸ-ໂທລະພາບແຂວງບິ່ງດິ້ງ ນັບແຕ່ມື້ສ້າງຕັ້ງຈົນເຖິງປັດຈຸບັນ.

(ຂ່າວ: ສັນຍາ)