ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ(ອຄ)ສປປລາວໄດ້ພົບປະກັບທ່ານ ພິໄຊ ນະຣິບທະພັນ ລັດຖະມົນຕີກະຊວງການຄ້າ ແຫ່ງຣາຊະອານາຈັກໄທໃນວັນທີ 7ຕຸລານີ້ທີ່ນະຄອນຫຼວງວຽງຈັນ.ຈຸດປະສົງການພົບປະຄັ້ງນີ້ ເພື່ອແນະນຳຕົນເອງພ້ອມທັງຊຸກຍູ້ການຮ່ວມມືດ້ານເສດຖະກິດ-ການຄ້າ, ການອຳນວຍຄວາມສະດວກແລະການສົ່ງເສີມການຄ້າສອງຝ່າຍລາວ-ໄທ.

ໂອກາດດັ່ງກ່າວ, ທ່ານ ມະໄລທອງ ກົມມະສິດ ໄດ້ສະແດງຄວາມຊົມເຊີຍຕໍ່ທ່ານພິໄຊນະຣິບທະພັນທີ່ໄດ້ຮັບການແຕ່ງຕັ້ງເປັນລັດຖະມົນຕີກະຊວງການຄ້າແຫ່ງຣາຊະອານາຈັກໄທແລະ ຍັງໄດ້ສະແດງຄວາມຍິນດີຕ້ອນຮັບທ່ານລັດຖະມົນຕີພ້ອມດ້ວຍຄະນະໃນການພົບປະສອງຝ່າຍເພື່ອປຶກສາຫາລືໃນວຽກງານສົ່ງເສີມ ແລະ ຂະຫຍາຍການຮ່ວມມືດ້ານເສດຖະກິດ-ການຄ້າສອງຝ່າຍ ລາວ-ໄທ.

ສະແດງຄວາມຂອບໃຈຕໍ່ການຮ່ວມມື ທີ່ໄດ້ໃຫ້ການສະໜັບສະໜູນວຽກງານການຮ່ວມມືດ້ານການເງິນ, ການທະນາຄານແລະພະລັງງານໃນໄລຍະຜ່ານມາທີ່ທ່ານເຄີຍເປັນລັດຖະມົນຕີກະຊວງພະລັງງານ, ລັດຖະມົນຕີຊ່ວຍວ່າການກະຊວງການຄັງເປັນຕົ້ນການສະໜອງນ້ຳມັນເຊື້ອໄຟ, ອາຍແກັສ, ການອຳນວຍຄວາມສະດວກໃນການຊຳລະສະສາງລະຫວ່າງປະເທດແລະອື່ນໆ.ຂອບໃຈທີ່ສະໜັບສະໜູນ ສປປ ລາວ ພາຍໃຕ້ຂອບການຄ້າສອງຝ່າຍແລະຂອບອາຊຽນຕະຫຼອດມາ ແລະ ຂອບໃຈມາຍັງທ່ານແລະລັດຖະບານແຫ່ງຣາຊະອານາຈັກໄທທີ່ໄດ້ໃຫ້ການສະໜັບສະໜູນແລະຊ່ວຍເຫຼືອໃນການເປັນປະທານອາຊຽນ 2024 ຂອງສປປລາວເປັນຕົ້ນການຊ່ວຍເຫຼືອຈັດກອງປະຊຸມເຈົ້າໜ້າທີ່ອາວຸໂສເສດຖະກິດອາຊຽນຄັ້ງທີ2 ທີ່ຜ່ານມາ, ການປັບປຸງຫ້ອງ VIP ສະໜາມບິນ ແລະ ອຸປະກອນຮັບໃຊ້ກອງປະຊຸມ.

ນອກນັ້ນ, ໄດ້ສະແດງຄວາມຊົມເຊີຍແລະສະໜັບສະໜູນຕໍ່ນະໂຍບາຍຂອງກະຊວງການຄ້າແຫ່ງຣາຊະອານາຈັກໄທໃນການຊຸກຍູ້ແລະສົ່ງເສີມວຽກງານການຄ້າເປັນຕົ້ນການສົ່ງເສີມການຈັດຕັ້ງປະຕິບັດສັນຍາການຄ້າເສລີ (FTAs),ການບໍລິຫານຄວາມດຸ່ນດ່ຽງລະຫວ່າງພາກທຸລະກິດແລະຜູ້ຊົມໃຊ້, ສົ່ງເສີມການຄ້າແຂວງ, ນະໂຍບາຍປັບປຸງໂຄງສ້າງການສົ່ງອອກໃຫ້ທັນສະໄໝ, ການສົ່ງເສີມການຜະລິດສິນຄ້າຂອງຜູ້ປະກອບການ ທີ່ເປັນມິດກັບສິ່ງແວດລ້ອມ ແລະ ອື່ນໆ. ພ້ອມທັງຂອບໃຈມາຍັງກະຊວງການຄ້າ ແລະລັດຖະບານໄທທີ່ໄດ້ສະໜັບສະໜູນແລະຊ່ວຍເຫຼືອໃນການພັດທະນາການຄ້າຜ່ານແຜນງານແລະໂຄງການຮ່ວມມືດ້ານວິຊາການລາວ-ໄທ/TICAຊຶ່ງກະຊວງອຄ ໄດ້ຮັບ 3 ໂຄງການໃນໄລຍະຜ່ານມາເຊັ່ນ: (1) ໂຄງການສົ່ງເສີມການຄ້າແລະ ODOP, (2)ໂຄງການຊຸກຍູ້ແລະພັດທະນາການປຸງແຕ່ງສິນຄ້າກະສິກຳແລະ (3) ໂຄງການເສີມຂະຫຍາຍວຽກງານການຄ້າຊາຍແດນທີ່ກຳລັງຈັດຕັ້ງປະຕິບັດ.

ໂອກາດນີ້ ທ່ານລັດຖະມົນຕີສປປລາວສະເໜີແລກປ່ຽນບັນຫາທີ່ສຳຄັນການເສີມຂະຫຍາຍການຮ່ວມມືການຄ້າສອງຝ່າຍເພື່ອໃຫ້ບັນລຸເປົ້າໝາຍການເພີ່ມມູນຄ່າການຄ້າສອງຝ່າຍເປັນ 2 ເທົ່າຫຼື 11 ຕື້ໂດລາພາຍໃນປີ2025ຕາມແຜນປະຕິບັດງານວ່າດ້ວຍການເປັນຄູ່ຮ່ວມມືຍຸດທະສາດ (ລົງນາມ 2022) ແລະການຕົກລົງໃນກອງປະຊຸມJC ລາວ-ໄທຄັ້ງທີ 22 (ຈັດແຕ່ປີ 2021)ແລະສືບຕໍ່ກະກຽມກອງປະຊຸມແຜນການຮ່ວມມືຂອງກະຊວງອຸດສາຫະກຳແລະການຄ້າລາວແລະກະຊວງການຄ້າ ໄທຄັ້ງທີ8ທີ່ຝ່າຍໄທຈະເປັນເຈົ້າພາບເນື່ອງຈາກໄດ້ເລື່ອນມາຫຼາຍຄັ້ງແຕ່ປີ 2020, ຫຼຸດຜ່ອນຫຼືລຶບລ້າງສິ່ງກີດຂວາງດ້ານການຄ້າ (ທີ່ບໍ່ແມ່ນພາສີ) ເປັນຕົ້ນລະບຽບການຈຳກັດການນຳເຂົ້າສິນຄ້າກະສິກຳແລະການກຳນົດໂກຕ້ານໍາເຂົ້າ ທີ່ບໍ່ສອດຄອງກັບສັນຍາ ATIGA (ສາລີ, ກາເຟ, ພືດຜັກອື່ນໆ), ນະໂຍບາຍສະໜັບສະໜູນແລະ ການສົ່ງເສີມການຊື້ສິນຄ້າ ຂອງສປປລາວໃຫ້ຫຼາຍຂຶ້ນເພື່ອຫຼຸດຜ່ອນການຂາດດູນການຄ້າລະຫວ່າງລາວ ແລະ ໄທແລະເປັນການສົ່ງເສີມການຜະລິດສິນຄ້າພາຍໃນປະເທດ, ດຶງດູດນັກລົງທຶນຈາກໄທເຂົ້າມາລົງທຶນໃນຂົງເຂດອຸດສາຫະກຳປຸງແຕ່ງແລະອື່ນໆ.

(ຂ່າວ: ແສງຈັນ)