ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ7 ຕຸລາຜ່ານມາຢູ່ສຳນັກງານລັດຖະບານ ຫວຽດນາມທີ່ນະຄອນຫຼວງຮ່າໂນ້ຍ, ທ່ານຟ້າມມິງຈິງນາຍົກລັດຖະມົນຕີໄດ້ເປັນປະທານກອງປະຊຸມລັດຖະບານກັບບັນດາທ້ອງຖິ່ນ ປະຈຳເດືອນກັນຍາ. ກອງປະຊຸມໄດ້ເຊື່ອມຕໍ່ຈາກສຳນັກງານລັດຖະບານກັບ63 ທ້ອງຖິ່ນໃນທົ່ວປະເທດ.

ທ່ານຟ້າມມິງຈິງກ່າວຄຳເຫັນເປີດກອງປະຊຸມວ່າ:ສະພາບການໂລກສືບຕໍ່ມີການຜັນແປທີ່ສັບສົນ, ຍາກທີ່ຈະຄາດຄະເນລ່ວງໜ້າໄດ້ໃນຂະນະທີ່ສະພາບການພາຍໃນປະເທດເກີດມີຂໍ້ບົກຜ່ອງຈຳນວນໜຶ່ງກ່ຽວກັບໂຄງປະກອບເສດຖະກິດທີ່ຍັງບໍ່ທັນໄດ້ຮັບການແກ້ໄຂ, ພ້ອມກັນນັ້ນພາຍຸYagi ກໍ່ຜົນເສຍຫາຍຢ່າງໜັກໜ່ວງຢູ່ບາງທ້ອງຖິ່ນເຂດພາກເໜືອ. ເຖິງຢ່າງໃດກໍຕາມ, ດ້ວຍການເຂົ້າຮ່ວມຢ່າງຂ້ຽວຂາດຂອງລັດຖະບານ, ທຸກຂັ້ນ, ທຸກຂະແໜງການແລະບັນດາທ້ອງຖິ່ນ, ສະພາບການເສດຖະກິດ - ສັງຄົມຫວຽດນາມສືບຕໍ່ເລີ່ມມີສັນຍານດີຂຶ້ນ, ການເຕີບໂຕໃນໄຕມາດທີIII ບັນລຸ7.4%; ເສດຖະກິດມະຫາພາກໄດ້ຮັກສາເປັນປົກກະຕິ, ໄພເງິນເຟີ້ໄດ້ຮັບການຄວບຄຸມ, ບັນດາຄວາມສົມດູນໃຫຍ່ໄດ້ຮັບປະກັນ; ສະພາບການປ້ອງກັນຊາດ - ປ້ອງກັນຄວາມສະຫງົບໄດ້ຮັກສາເປັນປົກກະຕິ.

ທ່ານນາຍົກລັດຖະມົນຕີຮຽກຮ້ອງວ່າ:ຕ້ອງຍາດແຍ່ງບັນດາຕະຫຼາດ, ຍູ້ແຮງ3 ແຫຼ່ງກຳລັງໜູນແກ່ການເຕີບໂຕ, ຕະຫຼາດພາຍໃນປະເທດຕ້ອງຕັ້ງໜ້າກວ່າເກົ່າ, ຕະຫຼາດສົ່ງອອກກໍຕ້ອງໄດ້ຮັບການເປີດກວ້າງກວ່າເກົ່າ. ກ່ຽວກັບການປ່ອຍເງິນລົງທຶນສາທາລະນະຕ້ອງຕັ້ງໜ້າກວ່າເກົ່າອີກ. ນອກຈາກນັ້ນ, ຕ້ອງຕັ້ງໜ້າແກ້ໄຂຜົນເສຍຫາຍພາຍຫຼັງຈາກພາຍຸYagi, ແກ້ໄຂຄວາມຫຍຸ້ງຍາກຂໍ້ຕິດຂັດກ່ຽວກັບລະບອບລະບຽບການ, ເປັນຕົ້ນແມ່ນລະດົມແຫຼ່ງກຳລັງໃນໝູ່ປະຊາຊົນ, ສັງຄົມ ແລະພາກເອກະຊົນ.