ຂ່າວສານຊີອາໄອລາຍງານຫວ່າງມໍ່ໆມານີ້ວ່າ:ອົງການສະຖິຕິແຫ່ງຊາດຈີນໄດ້ເຜີຍແຜ່ບົດລາຍງານຕ່າງໆກ່ຽວກັບຜົນສຳເລັດດ້ານການພັດທະນາເສດຖະກິດ-ສັງຄົມສປຈີນໃນຮອບ75ປີ ຊຶ່ງສະແດງໃຫ້ເຫັນວ່າຕະຫຼອດໄລຍະ75ປີຜ່ານມາ, ພັກ ແລະ ລັດຖະບານຈີນໄດ້ໃຫ້ຄວາມສຳຄັນເປັນຢ່າງສູງຕໍ່ການພັດທະນາວຽກງານແມ່ຍິງແລະເດັກນ້ອຍຢ່າງສະເໝີຕົ້ນສະເໝີປາຍ, ບົດບາດຂອງແມ່ຍິງແລະເດັກນ້ອຍຈີນໄດ້ມີການປ່ຽນແປງແບບໜ້າມືເປັນຫຼັງມື, ສຸຂະພາບຂອງແມ່ຍິງແລະເດັກນ້ອຍຈີນໄດ້ຮັບການປັບປຸງໃຫ້ດີຂຶ້ນຢ່າງຫຼວງຫຼາຍ.

ລະບົບບໍລິການສຸຂະພາບແມ່ແລະເດັກໄດ້ຮັບການເສີມຂະຫຍາຍໃຫ້ເຂັ້ມແຂງຢ່າງບໍ່ຢຸດຢັ້ງ. ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ18ຂອງພັກກອມມູນິດຈີນເມື່ອປີ2012ເປັນຕົ້ນມາ, ສະຖາບັນຮັກສາສຸຂະພາບແມ່ແລະເດັກໃນທົ່ວປະເທດຈີນໄດ້ເພີ່ມຈາກ 426 ແຫ່ງໃນປີ 1950 ຂຶ້ນເປັນ 3,031ແຫ່ງໃນປີ 2022, ໂຮງໝໍເດັກເພີ່ມຂຶ້ນຈາກ 25 ແຫ່ງໃນປີ1983 ຂຶ້ນເປັນ 151 ແຫ່ງໃນປີ2022, ອົງການອະນາໄມໂລກໄດ້ຈັດເອົາປະເທດຈີນເຂົ້າເປັນໜຶ່ງໃນຈຳນວນ10ປະເທດທີ່ມີປະສິດທິພາບແລະປະສິດທິຜົນສູງໃນດ້ານສຸຂະພາບແມ່ແລະເດັກ. ປີ2020 ອາຍຸຍືນສະເລ່ຍຕາມຄາດໝາຍທີ່ຄິດໄລ່ຕາມຫົວຄົນຂອງແມ່ຍິງແມ່ນ80.88ປີ, ເພີ່ມຂຶ້ນ11.61ປີເມື່ອທຽບໃສ່ປີ1981. ອັດຕາການເສຍຊີວິດຂອງແມ່ມານແລະຈາກການເກີດລູກໄດ້ຫຼຸດລົງຢ່າງຕໍ່ເນື່ອງ, ຄວາມແຕກໂຕນລະຫວ່າງຕົວເມືອງແລະຊົນນະບົດໄດ້ຮັດແຄບລົງຢ່າງບໍ່ຢຸດຢັ້ງ.