ຕັ້ງໜ້າປະຕິບັດແນວຄິດປະຊາຄົມຮ່ວມຊາຕາກໍາມວນມະນຸດ

ນໍາພາອາຊີຕາເວັນອອກ ແລະ ສາຍພົວພັນຈີນ-ລາວ ພັດທະນາກ້າວເຂົ້າສູ່ລວງເລິກ

 

ບົດຄວາມຂອງ ທ່ານ ນາງ ຟາງຫົງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ

ວັນທີ 1 ຕຸລາຜ່ານມາ, ເປັນວັນສະຖາປະນາ ສາທາລະນະລັດປະຊາຊົນຈີນ ຄົບ ຮອບ 75 ປີ. 75 ປີທີ່ຜ່ານມາ, ພັກກອມມູນິດຈີນ ໄດ້ເຕົ້າໂຮມ ແລະ ນຳພາປະຊາຊົນບັນ ດາເຜົ່າໃນທົ່ວປະເທດຈີນ ສ້າງສິ່ງມະຫັດສະຈັນສອງຢ່າງຄື: ເສດຖະກິດພັດທະນາຢ່າງວ່ອງໄວ ແລະ ສັງຄົມມີຄວາມໝັ້ນຄົງໃນໄລຍະຍາວ. ປະເທດຈີນ ມີການປ່ຽນແປງ, ການຟື້ນຟູປະເທດຊາດຈີນ ໄດ້ເຂົ້າສູ່ຂະບວນການປະຫວັດສາດ ທີ່ປ່ຽນແປງບໍ່ໄດ້. ໃນການສະແຫວງຫາການພັດທະນາຂອງຕົນ, ປະເທດຈີນ ກໍໄດ້ຄໍານຶງເຖິງທົ່ວໂລກຕະຫຼອດ, ສະໜອງກາລະໂອກາດໃໝ່ໃຫ້ໂລກ ໃນການພັດທະນາໃໝ່ຂອງຕົນ, ປະກອບສ່ວນອັນໃຫຍ່ຫຼວງໃຫ້ສັນຕິພາບ ການພັດທະນາ ແລະ ຄວາມຈະເລີນຮຸ່ງເຮືອງຂອງໂລກ. ໂດຍສະເພາະ ໃນຍຸກສະໄໝໃໝ່, ສະຫາຍ ສີຈິ້ນຜິງ ເລຂາທິການໃຫຍ່ ປະທານປະເທດຈີນ ໄດ້ສະເໜີສ້າງປະຊາຄົມຮ່ວມຊາຕາກໍາຂອງມວນມະນຸດ ຢ່າງປະດິດສ້າງ, ຮຽກຮ້ອງໃຫ້ປະຊາຊົນທຸກປະເທດຮ່ວມກັນ, ສ້າງໂລກທີ່ມີສັນຕິພາບຍາວນານ ຄວາມໝັ້ນຄົງທົ່ວເຖິງ ວັດທະນາຖາວອນຮ່ວມກັນ. ເປີດກວ້າງ ແລະ ເປັນເອກະພາບກັນ ໃຫ້ມີຄວາມສະອາດຄວາມງາມ. ນີ້ແມ່ນແຜນການຂອງສະຫາຍ ສີຈິ້ນຜິງ ໃນການຕອບບັນຫາຍຸກສະໄໝທີ່ວ່າ; "ເຮົາຄວນສ້າງໂລກແບບໃດ ແລະ ຈະສ້າງໂລກນີ້ແນວໃດ?", ສະຫາຍ ສີຈິ້ນຜິງ ຍັງສະເໜີ ການຫັນເປັນຫຼາຍຂົ້ວໃນໂລກ ທີ່ສະເໝີພາບ ແລະ ສະຖຽນລະພາບ, ການຫັນເປັນໂລກາພິວັດຂອງເສດຖະກິດທີ່ມີຜົນປະ ໂຫຍດຮ່ວມກັນ. ອັນນີ້ສອດຄ່ອງກັບຄວາມປາຖະໜາຮ່ວມຂອງປະເທດສ່ວນຫຼາຍໃນໂລກປັດຈຸບັນ.

ປະເທດຈີນ ແລະ ປະເທດລາວ ມີພູຜາ, ແມ່ນ້ຳອັນດຽວກັນ, ທັງຢຶດໝັ້ນການນຳພາຂອງພັກ ແລະ ເດີນຕາມເສັ້ນທາງສັງຄົມນິຍົມ, ເປັນຄູ່ຮ່ວມຊາຕາກໍາ ທີ່ມີຄວາມໝາຍຍຸດທະສາດ. ສະຫາຍ ສີຈິ້ນຜິງ ຊີ້ອອກວ່າ: ນໍ້າໃຈຄູ່ຮ່ວມຊາຕາກໍາ ຈີນ-ລາວ ໄດ້ຮັບການສ້າງຕັ້ງຂຶ້ນໃນໄລຍະການຕໍ່ສູ້ກູ້ຊາດ ແລະ ປົດປ່ອຍປະເທດຊາດ. ເດັກນ້ອຍຂອງນັກປະຕິວັດລາວ 1074 ຄົນ ໄດ້ໄປອາໄສ ແລະ ສຶກສາຮໍ່າຮຽນຢູ່ໂຮງຮຽນ "67" ທີ່ເມືອງໜານໜິງ ເຂດປົກຄອງຕົນເອງເຜົ່າຈວ້າງກວາງຊີ, ຄະນະຊ່ຽວຊານທະຫານຈີນ ໄດ້ແບ່ງປັນຄວາມທຸກຍາກກັບທະຫານ ແລະ ພົນລະເຮືອນລາວຢູ່ "ຖ້ຳຈີນ" ແຂວງຫົວພັນ. ນີ້ແມ່ນພະຍານປະຫວັດສາດທີ່ຈີນ ແລະ ລາວ ຕໍ່ສູ້ແບບຄຽງບ່າຄຽງໄລ່ກັນ ແລະ ມີໂຊກຊາຕາກຳຮ່ວມກັນ.

ຫຼັງຈາກ ສະຫາຍ ສີຈິ້ນຜິງ ໄດ້ສະເໜີຂໍ້ລິເລີ່ມສ້າງປະຊາຄົມຮ່ວມຊາຕາກໍາຂອງມວນມະນຸດ, ລາວ-ຈີນ ໄດ້ມີຄວາມເຫັນເປັນເອກະພາບດ້ານການເມືອງ ກ່ຽວກັບການສ້າງຄູ່ຮ່ວມຊາຕາກໍາ, ທັງໄດ້ເດີນຢູ່ແຖວໜ້າໃນການສ້າງປະຊາຄົນຮ່ວມຊາຕາກໍາມວນມະນຸດ. ປີ 2019,ສະຫາຍ ສີຈິ້ນຜິງ ແລະ ການນໍາຝ່າຍລາວ ໄດ້ຮ່ວມກັນລົງນາມໃນແຜນແມ່ນບົດ ວ່າດ້ວຍການສ້າງຄູ່ຮ່ວມຊາຕາກໍາ ລາວ-ຈີນ, ນີ້ແມ່ນເອກະສານຮ່ວມມືວ່າດ້ວຍຄູ່ຮ່ວມຊາຕາກໍາສະບັບທໍາອິດ ທີ່ການນໍາສອງຝ່າຍຮ່ວມລົງນາມ, ເປັນການນໍາພາການສ້າງຄູ່ຮ່ວມຊາຕາກໍາ ລາວ-ຈີນ ຍາດໄດ້ໝາກຜົນຢ່າງໃຫຍ່ຫຼວງ. ປີ 2022-2023, ສະຫາຍ ສີຈິ້ນຜິງ ເລຂາທິການໃຫຍ່ພັກກອມມູນິດຈີນ ໄດ້ພົບປະກັບ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ 2 ຄັ້ງ, ໄດ້ກໍານົດພ້ອມກັນສ້າງຄູ່ຮ່ວມຊາຕາກໍາ ລາວ-ຈີນ ໃຫ້ມີມາດຕະຖານສູງ, ມີຄຸນນະພາບສູງ, ມີລະດັບສູງ. ສືບຕໍ່ລົງນາມແຜນແມ່ບົດສະບັບໃໝ່ ທີ່ມີການກໍານົດ 5 ປີ, ໄດ້ກາຍເປັນການຊີ້ນໍາໃຫ້ແກ່ການຮ່ວມມືຍຸດທະສາດຮອບດ້ານ ລາວ-ຈີນ ແລະ ການສ້າງຄູ່ຮ່ວມຊາຕາກໍາ ລາວ-ຈີນ ໃນຍຸກໃໝ່.

ການລົງເລິກຊຸກຍູ້ການສ້າງຄູ່ຮ່ວມຊາຕາກໍາ ລາວ-ຈີນ, ການຮ່ວມມື ລາວ-ຈີນ ຢ່າງແທ້ຈິງ ໄດ້ຮັບໝາກຜົນຢ່າງບຸກທະລຸຕໍ່ເນື່ອງ. ຈີນ ເປັນແຫຼ່ງການລົງທຶນອັນດັບໜຶ່ງຂອງລາວ ແລະ ເປັນຄູ່ການຄ້າຕົ້ນຕໍ ເປັນເວລາຫຼາຍປີ. ສິນຄ້າກະສິກຳຂອງລາວຫຼາຍກວ່າ 80% ແມ່ນສົ່ງອອກໄປຈີນ, ຜະລິດຕະພັນກະສິກໍາ ຈໍານວນ 33 ປະເພດ ໄດ້ລົງນາມໃນອະນຸສັນຍາ ເພື່ອສົ່ງອອກໄປຈີນ. ປີ 2023, ຍອດມູນຄາການຄ້າ ລະຫວ່າງ ຈີນ-ລາວ ໄດ້ບັນລຸ 7,1 ຕື້ໂດລາ, ເພີ່ມຂຶ້ນ 26,7% ເມື່ອທຽບໃສ່ໄລຍະດຽວກັນຂອງປີ 2022. ລາວ ໄດ້ກາຍເປັນປະເທດອາຊຽນ ທີ່ມີການເຕີບໂຕໄວທີ່ສຸດໃນການຄ້າສອງຝ່າຍ. ເສັ້ນທາງລົດໄຟ ລາວ-ຈີນ ຖືເປັນເສັ້ນທາງເຊື່ອມຕໍ່ກັນ, ເສັ້ນທາງແຫ່ງໄຊຊະນະທັງສອງຝ່າຍ ແລະ ເສັ້ນທາງແຫ່ງມິດ ຕະພາບ, ເຮັດໃຫ້ຄວາມໄຝ່ຝັນຂອງລາວ ກາຍເປັນຈິງ, ຈາກປະເທດທີ່ບໍ່ມີທາງອອກສູ່ທະເລ ກາຍເປັນປະເທດທີ່ສາມາດເຊື່ອມຈອດກັບທະເລ, “ເສັ້ນທາງຄໍາ” ທາງດ້ານການຂົນສົ່ງສາກົນທີ່ມີປະສິດທິພາບ ແລະ ສະດວກວ່ອງໄວ ຖືກສ້າງຂຶ້ນ ລະຫວ່າງ ລາວ-ຈີນ ແລະ ທົ່ວພາກພື້ນອາຊີຕາເວັນອອກສ່ຽງໃຕ້. ໃນແຕ່ລະມື້, ລົດໄຟໂດຍສານສາກົນ “ຟູຊິງ” ຈາກຄຸນໝິງ ແລະ “ລ້ານຊ້າງ” ຈາກນະຄອນຫຼວງວຽງຈັນ “ແລ່ນທັງສອງທິດ”, ໄປມາບໍ່ຂາດສາຍ, ໄດ້ໄຫຼເຂົ້າສູ່ຊີວິດປະຈຳວັນຂອງປະຊາຊົນສອງປະເທດຢ່າງເລິກເຊິ່ງ, ກາຍເປັນສັນຍາລັກສໍາຄັນ ແຫ່ງຄູ່ຮ່ວມຊາຕາກໍາ ລາວ-ຈີນ. ເສັ້ນທາງດ່ວນ ລາວ-ຈີນ ຈາກວຽງຈັນ-ວັງວຽງ ໄດ້ເປີດໃຊ້ຢ່າງເປັນທາງການ, ຂົງເຂດການຮ່ວມມືດ້ານໄຟຟ້າ, ພະລັງງານ ແລະ ບໍ່ແຮ່ ໄດ້ສືບຕໍ່ຢ່າງຕໍ່ເນື່ອງ ແລະ ລົງເລິກ, ໂຮງໝໍມິດຕະພາບຫຼວງພະບາງ, ໂຮງໝໍມະໂຫສົດ ແລະ ວິທະຍາໄລວິຊາຊີບລົດໄຟ ຊຶ່ງເປັນໂຄງການດໍາລົງຊີວິດຂອງປະຊາຊົນ ໄດ້ນໍາໃຊ້ຢ່າງເປັນທາງການ, ໄດ້ມີບົດບາດອັນຕັ້ງໜ້າໃນການສືບຕໍ່ຮັດແໜ້ນສາຍພົວພັນມິດຕະພາບທີ່ເປັນມູນເຊື້ອລະຫວ່າງ ຈີນ-ລາວ ໃຫ້ເລິກເຊິ່ງ ແລະ ມີຜົນດີຕໍ່ປະຊາຊົນສອງປະເທດ.

ພ້ອມດຽວກັນ, ການແລກປ່ຽນວັດທະນະທໍາ ແລະ ສັງຄົມ ມີຄວາມໃກ້ຊິດກວ່າ ໂດຍສະເພາະ ພາຍຫຼັງເສັ້ນທາລົດໄຟ ຈີນ-ລາວ ໄດ້ເປີດບໍລິການ, ຜູ້ໂດຍສານສາມາດໄປຄຸນໝິງໄດ້ກິນເຂົ້າປຸ້ນໃນຕອນເຊົ້າແລ້ວອອກເດີນທາງ, ຕອນບ່າຍ ກໍສາມາດກັບມາຫຼວງພະບາງ ຊົມຫໍພິພິທະພັນພະລາຊະວັງ, ໄປວຽງຈັນດື່ມເບຍລາວໃນຕອນແລງ. ໃນ 6 ເດືອນຕົ້ນປີນີ້, ມີນັກທ່ອງທ່ຽວຈີນ ມາທ່ຽວລາວ ມີ 560,000 ຄົນ ຊຶ່ງຫຼາຍກວ່າກ່ອນໄລຍະການລະບາດໂຄວິດ-19. ຊາວໜຸ່ມຂອງສອງປະເທດ ມີຄວາມໃກ້ຊິດກັນຫຼາຍຂຶ້ນ, ຝ່າຍຈີນ ໄດ້ສົ່ງຊາວໜຸ່ມອາສາສະໝັກ 12 ຊຸດ ມາສຶກສາຢູ່ລາວ, ນັກສຶກສາຈີນ ຫຼາຍຮ້ອຍຄົນຮຽນຢູ່ລາວ ແລະ ນັກສຶກສາລາວ ຫຼາຍພັນຄົນ ໄດ້ໄປຮຽນຢູ່ຈີນ. ຢູ່ມະຫາວິທະຍາໄລແຫ່ງຊາດລາວ, ພາສາຈີນ ແມ່ນສາຂາວິຊາໜຶ່ງ ທີ່ໄດ້ຮັບຄວາມນິຍົມຫຼາຍທີ່ສຸດ, ຄອບຄົວຈີນ ແລະລາວ ຈໍນວນວຫຼາຍໄດ້ສ້າງ TIKTOK ຊຶ່ງກາຍເປັນຂົວເຊື່ອມຕໍ່ລະຫວ່າງຈີນກັບລາວ.

ລາວເປັນປະທານໝູນວຽນຂອງອາຊຽນໃນປີນີ້ ແລະ ມີບົດບາດສຳຄັນໃນການຊຸກຍູ້ການຮ່ວມມື ຈີນ-ອາຊຽນ. ຝ່າຍຈີນ ຈະສືບຕໍ່ສະໜັບສະໜູນລາວ ຢ່າງເຕັມທີ່ ໃນການປະຕິບັດໜ້າທີ່ປະທານໝູນວຽນຂອງອາຊຽນ ແລະ ຈັດກອງປະຊຸມຜູ້ນຳໃຫ້ໄດ້ດີ. ຈີນ ແລະອາຊຽນ ເປັນບ້ານໃກ້ເຮືອນຄຽງ ແລະ ຄູ່ຮ່ວມມືສະໜິດແໜ້ນ ທີ່ຊ່ວຍເຫຼືອຊຶ່ງກັນ ແລະ ກັນ, ເປັນປະຊາຄົມຮ່ວມຊາຕາກຳ ທີ່ແບ່ງປັນຄວາມທຸກຍາກ ແລະ ຂະບວນວິວັດອັນດຽວກັນ.

ການສ້າງຄູ່ຮ່ວມຊາຕາກຳ ຈີນ-ລາວ ແລະ ຈີນ-ອາຊຽນ ໄດ້ຢືນຢັນໃຫ້ໂລກຮູ້ວ່າ: ການສ້າງຄູ່ຮ່ວມຊາຕາກຳມີຄວາມເປັນໄປໄດ້ຄວາມເຊື່ອໃຈ ແລະ ມີອະນາຄົດໃຫຍ່ຫຼວງ. ກອງປະຊຸມຄົບຄະນະ ຄັ້ງທີ 3 ຂອງຄະນະກຳມະການສູນກາງພັກຄອມມູນິດຈີນສະໃໝທີ XX ໄດ້ກຳນົດມາດຕະການດ້ານການລົງເລິກ ການປະຕິຮູບຢ່າງຮອບດ້ານຕື່ມອີກ ເພື່ອຊຸກຍູ້ຄວາມທັນສະໄໝແບບຈີນ. ຝ່າຍຈີນ ຍິນດີກຳໂອກາດໃໝ່ກັບປະເທດລາວ ແລະ ປະເທດອາຊຽນອື່ນ, ເປີດກ້ວາງການຮ່ວມມືໃນຂະແໜງການໃໝ່, ເພີ່ມກຳລັງແຮງເຂົ້າໃນການພັດທະນາຂອງຕົນເອງ ແລະ ການສ້າງຄູ່ຮວ່ມຊາຕາກຳຮ່ວມກັນ, ສ້າງຜົນປະໂຫຍດຕົວຈິງ ໃໝ່ ໃຫ້ແກ່ປະຊາຊົນໃນພາກພື້ນ.

ໃນການລົງນາມແຜນແມ່ບົດການສ້າງຄູ່ຮ່ວມຊາຕາກຳ ຈີນ-ລາວ ສະບັບໃໝ່ ຄົບ ຮອບ 1 ປີ, ອີງຕາມການເຊື້ອເຊີນຂອງສະຫາຍ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ, ສະຫາຍ ຫຼີສຽງ ນາຍົກລັດຖະມົນຕີ ແຫ່ງ ສປ ຈີນ ຈະເດີນທາງມາເຂົ້າຮ່ວມກອງປະຊຸມສຸດຍອດ ຈີນ-ອາຊຽນ ຄັ້ງທີ 27, ກອງປະຊຸມສຸດຍອດ ອາຊຽນ-ຈີນ-ຍີ່ປຸ່ນແລະ ສ ເກົາຫຼີ ຄັ້ງທີ 27, ກອງປະຊຸມສຸດຍອດອາຊີຕາເວັນອອກ ຄັ້ງທີ 19 ແລະ ຈະຢ້ຽມຢາມ ສປປ ລາວ ຢ່າງເປັນທາງການ. ນີ້ແມ່ນນາຍົກລັດຖະມົນຕີຈີນ ມາເຂົ້າຮ່ວມກອງປະຊຸມ ແລະ ຢ້ຽມຢາມ ສປປ ລາວ ອີກເທື່ອໜຶ່ງ ພາຍຫຼັງ ປີ 2016 ຊຶ່ງມີຄວາມໝາຍສຳຄັນຕໍ່ຈີນ-ລາວ ຮ່ວມກັນປົກປັກຮັກສາທິດທາງອັນຖືກຕ້ອງຂອງການຮ່ວມມືອາຊີຕາເວັນອອກ ແລະ ລົງເລິກການກໍ່ສ້າງຄູ່ຮ່ວມຊາຕາກຳ.

ໃນໄລຍະຢ້ຽມຢາມລາວ ຢ່າງເປັນທາງການ, ສະຫາຍ ຫຼີສຽງ ຈະແລກປ່ຽນຄຳຄິດເຫັນຢ່າງເລິກເຊິ່ງກັບຜູ້ນຳລາວ ກ່ຽວກັບການຜັນຂະຫຍາຍຄຳເຫັນເປັນເອກະພາບກັນ ທີ່ຜູ້ນຳສູງສຸດ ຈີນ-ລາວ ໄດ້ບັນລຸ, ລົງເລິກການຮ່ວມມືຍຸດທະສາດຮອບດ້ານ ແລະ ສ້າງຄູ່ຮ່ວມຊາຕາກຳ ຈີນ-ລາວ, ເປັນສັກຂິພິຍານໃນການລົງນາມເອກະສານຮ່ວມມືສອງຝ່າຍ. ຝ່າຍຈີນເຊື່ອວ່າ: ພາຍໃຕ້ຄວາມພະຍາຍາມຮ່ວມກັນຂອງສອງຝ່າຍ, ການເຂົ້າຮ່ວມກອງປະຊຸມ ແລະ ຢ້ຽມຢາມຂອງ ສະຫາຍ ຫຼີສຽງ ຄັ້ງນີ້ ແນ່ນອນຈະໄດ້ຜົນປະໂຫຍດຢ່າງດີງາມ, ເພີ່ມກຳລັງເຂັ້ມແຂງໃຫ້ແກ່ສາຍພົວພັນສອງຝ່າຍ ແລະ ການສ້າງຄູ່ຮ່ວມຊາຕາກຳຈີນ-ອາຊຽນ.