ວິທະຍຸກະຈາຍສຽງຫວຽດນາມລາຍງານວ່າ: ໃນກອງປະຊຸມຖະແຫຼງຂ່າວຂອງລັດຖະບານ ທີ່ຈັດຂຶ້ນໃນວັນທີ7 ຕຸລາ ຜ່ານມາຢູ່ນະຄອນຫຼວງຮ່າໂນ້ຍ, ທ່ານ ເຈິ່ນກວັກເຟືອງ ຮອງລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ໃຫ້ຮູ້ວ່າ: ພາຍຸ Yagi ພັດຖະຫຼົ່ມ ຫວຽດນາມ ໃນວັນທີ 7 ກັນຍາ ຜ່ານມາ ເຮັດໃຫ້ GDP ຂອງ ຫວຽດນາມ ຫຼຸດລົງປະມານ 0.15 ຄະແນນສ່ວນຮ້ອຍ. ເຖິງຢ່າງໃດກໍຕາມ, ລວມຍອດຜະລິດຕະພັນພາຍໃນປະເທດ (GDP) ໃນໄຕມາດທີ 3 ຄາດວ່າຈະເພີ່ມຂຶ້ນ 7.4% ແລະ GDP ໃນໄລຍະ 9 ເດືອນເພີ່ມຂຶ້ນ 6.82% ເມື່ອທຽບໃສ່ໄລຍະດຽວກັນຂອງປີ 2023, ກະຊວງແຜນການ ແລະ ການລົງທຶນ ຫວຽດນາມ ສືບຕໍ່ລາຍງານຕໍ່ລັດຖະບານຮັກສາເປົ້າໝາຍສູ້ຊົນບັນລຸລະດັບການຂະຫຍາຍຕົວຂອງປີ 2024 ແມ່ນ 7%.

ກ່ຽວກັບມາດຕະການແກ້ໄຂ, ທ່ານ ເຈິ່ນກວັກເຟືອງ ໃຫ້ຮູ້ວ່າ, ໃນບົດລາຍງານກະຊວງແຜນການ ແລະ ການລົງທຶນ ຫວຽດນາມ ໄດ້ສະເໜີຕໍ່ນາຍົກລັດຖະມົນຕີ ວ່າ: 2 ບໍລິເວນຈຸດສຸມທີ່ບັນລຸລະດັບເຕີບໂຕສູງກວ່າ ແມ່ນຈະປະກອບສ່ວນສົ່ງຜົນດີຕໍ່ລະດັບການເຕີບໂຕເສດຖະກິດຂອງທົ່ວປະເທດ, ນັ້ນແມ່ນ, ຮ່າໂນ້ຍ ແລະ ນະຄອນໂຮ່ຈິມິນ. ໃນໄລຍະຈະມາເຖິງທາງກະຊວງຈະສົມທົບກັບຫ້ອງວ່າການລັດຖະບານ ສ້າງມະຕິກອງປະຊຸມສະໄໝສາມັນຂອງລັດຖະບານໃຫ້ສົມບູນແບບ, ເພື່ອຜັນຂະຫຍາຍການປະຕິບັດບັນດາການຊີ້ນຳຂອງລັດຖະບານ ແລະນາຍົກລັດຖະມົນຕີ.