ຂ່າວຕ່າງປະເທດລາຍງານ ໃນວັນທີ 7 ກັນຍາ ຜ່ານມາ, ສາທາລະນະລັດປະຊາທິປະໄຕ ກົງໂກ ຫຼື DR Congo ໄດ້ເປີດໂຄງການສັກວັກຊິນປ້ອງກັນພະຍາດໝາກສຸກລີງ ຫຼືMpox ໃນວັນທີ 5 ຕຸລາຜ່ານມາ ທີ່ເມືອງໂກມາ ແຂວງກີວູເໜືອ.

ພະແນກສາທາລະນະສຸກ ລະບຸວ່າ:ໂຄງການດັ່ງກ່າວແມ່ນແນໃສ່ສັກວັກຊິນໃຫ້ພະນັກງານສາລະນະສຸກ ແລະພະນັກງານແຖວໜ້າເປັນຫຼັກກ່ອນ ລວມທັງຜູ້ທີ່ສຳຜັດກັບຄົນເຈັບທີ່ຖືກຢືນຢັນແລະກຸ່ມຄົນທີ່ມີຄວາມສ່ຽງສູງອື່ນໆ.

ທ່ານ ໂຣແມັງ ມູໂບຍາອີຫົວໜ້າພະນັກງານກະຊວງສາທາລະນະສຸກ ໃຫ້ຄຳໝັ້ນສັນຍາວ່າ: DR Congo ຈະຕໍ່ສູ້ຢ່າງເຕັມທີ່ກັບພະຍາດທີ່ສາມາດປ້ອງກັນ ແລະປິ່ນປົວໄດ້ຊະນິດນີ້.

ອົງການອະນາໄມໂລກໄດ້ປະກາດວ່າ:DR Congo ເປັນສູນກາງຂອງການລະບາດຂອງ Mpoxໃນປັດຈຸບັນ, ໂດຍກວມອັດຕາສ່ວນ90% ຂອງຄົນເຈັບພະຍາດ Mpox ທັງໝົດໃນພາກພື້ນອາຟຣິກາ.

ພະຍາດ Mpox ແມ່ນການຕິດເຊື້ອໄວຣັດທີ່ເກີດຈາກໄວຣັດໝາກສຸກລີງ ຊຶ່ງແຜ່ລາມຜ່ານການສຳຜັດໃກ້ຊິດ ແລະ ເຮັດໃຫ້ຄົນເຈັບມີອາການເປັນໄຂ້, ຕ່ອມນ້ຳເຫຼືອງບວມ, ເຈັບຄໍ, ປວດກ້າມຊີ້ນ, ມີຕຸ່ມຂຶ້ນຕາມຜິວໜັງ ແລະ ເຈັບຫຼັງ.