ສຳນັກຂ່າວສານຫວຽດນາມ ປະຈຳ ນະຄອນຫຼວງບຣັສເຊວປະເທດແບນຊິກ ລາຍງານວ່າ: ຄະນະກຳມະການເອີຣົບ (EC) ຫາກໍສະເໜີໃຫ້ໜັງສືຜ່ານແດນ ແລະ ບັດປະຈຳຕົວເປັນດີຈີຕອນ ຜ່ານແອັບພລິເຄຊັນ"ການທ່ອງທ່ຽວດິີຈີຕອນຂອງສະຫະພາບເອີຣົບ".

ຂ່າວລະບຸວ່າ: ນີ້ແມ່ນສ່ວນໜຶ່ງຂອງຄວາມພະຍາຍາມເພື່ອປັບປຸງການເດີນທາງເຂົ້າ-ອອກໃນຂອບເຂດ ເຊງເກັນ (Schengen), ຊ່ວຍໃຫ້ຜູ້ໂດຍສານປະຢັດເວລາ ແລະ ເພີ່ມທະວີຄວາມປອດໄພຢູ່ເຂດຊາຍແດນ. ໂດຍຈຳນວນນັກທ່ອງທ່ຽວຂ້າມຊາຍແດນເອີຣົບ ບັນລຸເກືອບ 600 ລ້ານເທື່ອຄົນໃນແຕ່ລະປີ, ການຄວບຄຸມດ້ວຍວິທີແບບເກົ່າຢູ່ບັນດາດ່ານຊາຍແດນຈຶ່ງມີພາລະຫຼາຍເກີນໄປ ແລະ ເສຍເວລາດົນ. ສະຫະພາບເອີຣົບ (ອີຢູ) ຮັບຮູ້ໄດ້ບັນຫານີ້ ຈຶ່ງໄດ້ຕັດສິນໃຈນຳໃຊ້ເຕັກໂນໂລຊີເຂົ້າໃນຂະບວນການຄວບຄຸມຊາຍແດນໃຫ້ທັນສະໄໝ, ໃນຂະນະດຽວກັນກໍໄດ້ຍົກລະດັບປະສົບການກ່ຽວກັບເຕັກນິກໂນໂລຊີໃຫ້ກັບບັນດາປະຊາຊົນ.

ແອັບພລິເຄຊັນນີ້ອະນຸຍາດໃຫ້ຜູ້ນຳໃຊ້ສ້າງ ແລະ ຈັດເກັບໜັງສືຜ່ານແດນດີຈີຕອນ ຫຼື ບັດປະຈຳຕົວຂອງເຂົາເຈົ້າຢູ່ໃນໂທລະສັບມືຖື. ຂໍ້ມູນທີ່ເກັບໄວ້ຈະປະກອບມີຮູບໃບໜ້າ ແລະ ຂໍ້ມູນສ່ວນຕົວທີ່ຈໍາເປັນ, ແຕ່ຈະບໍ່ລວມເອົາລາຍນິ້ວມື. ກ່ອນອອກເດີນທາງສາມາດສົ່ງຂໍ້ມູນນີ້ໃຫ້ເຈົ້າໜ້າທີ່ຊາຍແດນກວດກາລ່ວງໜ້າໄດ້. ຊ່ວຍຫຼຸດຜ່ອນເວລາລໍຖ້າຢູ່ດ່ານຊາຍແດນ, ສ້າງເງື່ອນໄຂສະດວກໃນການເດີນທາງ.

ແອັບພລິເຄຊັນນີ້ຈະຊ່ວຍຢັ້ງຢືນຕົວຕົນທີ່ແທ້ຈິງຂອງຜູ້ຖືບັດ, ປ້ອງກັນການນຳໃຊ້ເອກະສານປອມ ແລະ ກວດຫາອາຊະຍາກຳຂ້າມຊາດຢ່າງມີປະສິດທິພາບ. ພົນລະເມືອງ EU ສາມາດເດີນທາງໄປມາລະຫວ່າງປະເທດສະມາຊິກໄດ້ຢ່າງງ່າຍດາຍໂດຍໃຊ້ແອັບພລິເຄຊັນນີ້.

ການຫັນເປັນດີຈີຕອນຂອງໜັງສືຜ່ານແດນ ແລະ ບັດປະຈໍາຕົວ ແມ່ນສ່ວນໜຶ່ງຂອງຍຸດທະສາດຂອງ EU ທີ່ກວ້າງຂວາງເພື່ອສ້າງສັງຄົມດີຈີຕອນ ທີ່ການບໍລິການສາທາລະນະຖືກຈັດສົ່ງຢ່າງໄວວາ ແລະ ມີປະສິດທິພາບ.