ຂ່າວສານຫວຽດນາມລາຍງານວ່າ: ໃນວັນທີ 8 ຕຸລາ ຜ່ານມາບໍລິສັດ Foxconn (ບໍລິສັດເຕັກໂນໂລຊີໃຫຍ່ຂອງແຄ້ວນໄຕ້ຫວັນ) ເປີດເຜີຍວ່າ:ບໍລິສັດກຳລັງສ້າງໂຮງງານເພື່ອຜະລິດຊຸບເປີຊິບ GB200 ຂອງ Nvidia ທີ່ອອກແບບມາເພື່ອໃຊ້ໃນເຊີເວີ ເອໄອ (AI Server) ຊຶ່ງໂຮງງານແຫ່ງນີ້ຈະເປັນໂຮງງານຜະລິດ GB200 ທີ່ໃຫຍ່ທີ່ສຸດໃນໂລກ.

ຂ່າວລະບຸວ່າ: ທ່ານ ເບນຈາມິນ ຕິງ ຮອງປະທານອາວຸໂສຝ່າຍທຸລະກິດໂຊລູຊັນຄລາວ ຂອງ Foxconn ໃຫ້ຮູ້ວ່າ: ການສ້າງໂຮງງານຂະໜາດໃຫຍ່ດັ່ງກ່າວແມ່ນເພື່ອຊ່ວຍຕອບສະໜອງຄວາມຕ້ອງການທີ່ມີຢ່າງມະຫາສານຕໍ່ແພລັດຟອມແບັກເວລ (Blackwell) ຊຶ່ງແມ່ນຊິບຂອງ Nvidia ທີ່ເປັນທີ່ນິຍົມຂອງຜູ້ພັດທະນາປັນຍາປະດິດ (AI). ທ່ານຍັງໃຫ້ຮູ້ວ່າ: Foxconn ຈະເປັນຜູ້ທໍາອິດທີ່ຈັດສົ່ງຊຸບເປີຊິບ GB200 ແລະ ລະບົບຕ່ອງໂສ້ການສະໜອງຂອງບໍລິສັດແມ່ນກຽມພ້ອມສໍາລັບການປະຕິວັດ AI. ຂີດຄວາມສາມາດໃນການຜະລິດຂອງບໍລິສັດ ໄດ້ແກ່ເຕັກໂນໂລຊີການລະບາຍຄວາມຮ້ອນດ້ວຍທາດແຫຼວຂັ້ນສູງ ແລະ ການກະຈາຍຄວາມແບບພິເສດ ຊຶ່ງມີຄວາມຈຳເປັນໃນການເສີມສ້າງໂຄງສ້າງພື້ນຖານຂອງເຊີເວີ GB200.