ໃນວັນທີ 9 ຕຸລາຜ່ານມາ, ຄະນະຜູ້ແທນພະແນກຍຸຕິທໍາແຂວງກວາງບິ່ງ ສສ ຫວຽດນາມ ໄດ້ເຄື່ອນໄຫວພົບປະຢ້ຽມຢາມ ແລະ ເຮັດວຽກຮ່ວມກັບ ຄະນະຜູ້ແທນພະແນກຍຸຕິທໍາ ແຂວງຄໍາມ່ວນ ສປປ ລາວ. ການພົບປະໄດ້ຈັດຂຶ້ນ ທີ່ໂຮງແຮມທ່າແຂກໃໝ່, ຝ່າຍແຂວງຄຳມ່ວນ ນໍາໂດຍ ທ່ານ ວຽງວິໄລ ພົມມະວົງ ຮອງຫົວໜ້າພະແນກຍຸຕິທໍາແຂວງ ແລະ ຝ່າຍແຂວງກວາງບິ່ງ ນໍາໂດຍ ທ່ານ ເຈື່ອງ ກວາງ ສານ ຮອງຫົວໜ້າພະແນກຍຸຕິທໍາແຂວງກວາງບິ່ງ ພ້ອມດ້ວຍຄະນະນໍາ, ມີບັນດາຂະແໜງການ, ໜ່ວຍງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ການພົບປະຄັ້ງນີ້, ແມ່ນເຕັມໄປດ້ວຍບົນຈິດໃຈມິດຕະພາບການຮ່ວມມືອັນສະໜິດສະໜົມ ແລະ ຄວາມສາມັກຄີພິເສດ ລະຫວ່າງ ພະແນກຍຸຕິທໍາສອງແຂວງຄໍາມ່ວນ-ແຂວງກວາງບິ່ງ, ໂອກາດນີ້ ຫົວໜ້າຄະນະຜູ້ແທນທັງສອງຝ່າຍກໍໄດ້ແຈ້ງສະພາບການພັດທະນາເສະຖະກິດ-ສັງຄົມຂອງແຂວງ ແລະ ຂອງພະແນກໃຫ້ກັນຊາບໂດຍລວມ, ຕະຫຼອດຮອດຜົນການພົວພັນຮ່ວມມືຕາມເນື້ອໃນບົດບັນທຶກທີ່ໄດ້ລົງນາມຮ່ວມກັນໃນໄລຍະຜ່ານມາ ທັງໄດ້ປຶກສາຫາລື ແລກປ່ຽນບົດຮຽນດ້ານຕ່າງໆ ຂອງຂະແໜງການຍຸຕິທໍາ ເພື່ອຕົກລົງຮັບຮອງເນື້ອໃນການຮ່ວມມືໃນຕໍ່ໜ້າ. ເປັນຕົ້ນສອງຝ່າຍ ເຫັນດີສືບຕໍ່ເພີ່ມທະວີການຮ່ວມມື ຊ່ວຍເຫຼືອທາງດ້ານຍຸຕິທຳ ເພື່ອຍົກສູງໃນການພົວພັນຮ່ວມມືບັນດາວຽກງານຕ່າງໆຂອງຂະແໜງການຮ່ວມກັນ,ປະກອບສ່ວນຮັກສາຄວາມສະຫງົບ ຄວາມປອດທາງໄພສັງຄົມ ແລະ ໃນຂົງເຂດ, ແລກປ່ຽນຂໍ້ມູນຂ່າວສານ, ບົດຮຽນໃນການຄຸ້ມຄອງລັດຕໍ່ກັບການເຄື່ອນໄຫວ ການປະຕິຮູບຂອດບໍລິຫານ, ການປະຕິຮູບດ້ານຍຸຕິທຳ, ສ້າງກົດໝາຍ, ໂຄສະນາເຜີຍແຜ່ກົດໝາຍ, ຄຸ້ມຄອງລັດກ່ຽວກັບພົນລະເຮືອນ, ສັນຊາດ, ແລກປ່ຽນຂໍ້ມູນຂ່າວສານ, ບົດຮຽນກ່ຽວກັບການແກ້ໄຂຄະດີດ້ານກົດໝາຍທີ່ຂຶ້ນກັບຂົງເຂດຄຸ້ມຄອງຂອງສອງຝ່າຍ, ທີ່ສໍາຄັນແມ່ນສືບຕໍ່ປະຕິບັດການເຄື່ອນໄຫວພົບປະແລກປ່ຽນບົດຮຽນ ຂອງຄະນະຜູ້ແທນພະແນກຍຸຕິທໍາ ທັງສອງແຂວງ ໃນການເດີນທາງໄປຢ້ຽມຢາມ ແລະ ເຮັດວຽກຮ່ວມກັນ 2 ປີ/ຄັ້ງ ເພື່ອເພີ່ມທະວີສາຍພົວພັນມິດຕະພາບ ການຮ່ວມມື ທັງສອງຝ່າຍ ໃຫ້ນັບມື້ນັບແໜ້ນແຟ້ນຍິ່ງຂຶ້ນ.

(ຂ່າວ : ມະນີວັນ)