ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ8 ຕຸລາ ຜ່ານມາ, ເນື່ອງໃນໂອກາດກອງປະຊຸມສຸດຍອດອາຊຽນຄັ້ງທີ44, 45 ແລະບັນດາກອງປະຊຸມທີ່ກ່ຽວຂ້ອງຢູ່ນະຄອນຫຼວງວຽງຈັນ ສປປ ລາວ, ທ່ານຟ້າມມິງຈິງນາຍົກລັດຖະມົນຕີຫວຽດນາມໄດ້ພົບປະເຈລະຈາກັບທ່ານເຟີດີນານ ໂຣມູນເດັດສ ມາກ໋ອດປະທານາທິບໍດີຟີລິບປິນ.
ຂ່າວລະບຸວ່າ: ໃນການແລກປ່ຽນກ່ຽວກັບບັນດາຈຸດສຸມຂອງການຮ່ວມມືໃນໄລຍະຈະມາເຖິງ, ທ່ານຟ້າມມິງຈິງສະເໜີໃຫ້2 ຝ່າຍຊຸກຍູ້ການຮ່ວມມືດ້ານກະສິກຳແລະເສດຖະກິດ - ການຄ້າໃຫ້ສອດຄ່ອງກັບຄວາມສາມາດບົ່ມຊ້ອນຂອງ2 ປະເທດ, ເປີດປະຕູຕະຫຼາດໃຫ້ແກ່ສິນຄ້າຂອງກັນໃຫ້ຫຼາຍຂຶ້ນກວ່າເກົ່າ, ບັນລຸເປົ້າໝາຍຍົກວົງເງິນການຄ້າ2 ສົ້ນຂຶ້ນ40 ຕື້ໂດລາໃນປີ2050 ໂດຍໄວ. ທ່ານສະເໜີໃຫ້2 ຝ່າຍຕັ້ງໜ້າຄົ້ນຄວ້າ, ເປີດກວ້າງການຮ່ວມມືສູ່ບັນດາຂົງເຂດໃໝ່, ຮັບໃຊ້ບາດກ້າວບຸກທະລຸຍຸດທະສາດຄື: ເສດຖະກິດດີຈີຕອນ, ເສດຖະກິດສີຂຽວ, ການຫັນປ່ຽນພະລັງງານ.
ສ່ວນທ່ານເຟີດີນານ ໂຣມູນເດັດສ ມາກ໋ອດສະເໜີໃຫ້ຫວຽດນາມສືບຕໍ່ຊ່ວຍເຫຼືອຟີລິບປິນຄ້ຳປະກັນສະບຽງອາຫານ, ພ້ອມກັນຜັນຂະຫຍາຍບັນດາບົດບັນທຶກຊ່ວຍຈຳການຮ່ວມມືດ້ານກະສິກຳແລະການຮ່ວມມືດ້ານການຄ້າເຂົ້າສານທີ່ໄດ້ລົງນາມໃນຕົ້ນປີ2024 ນີ້.
ການນຳ2 ທ່ານເຫັນດີນຳການພົວພັນລະຫວ່າງ2 ປະເທດໃຫ້ສືບຕໍ່ກ້າວເຂົ້າສູ່ລວງເລິກ, ແທດຈິງ, ຍືນຍົງ, ປະກອບສ່ວນຢ່າງຕັ້ງໜ້າໃຫ້ແກ່ປະຊາຄົມອາຊຽນທີ່ໝັ້ນຄົງເຂັ້ມແຂງ, ເພື່ອສັນຕິພາບ, ສະຖຽນລະພາບແລະການພັດທະນາ. ກ່ຽວກັບການຮ່ວມມືທາງທະເລ, 2 ຝ່າຍເຫັນດີສືບຕໍ່ໃຫ້ຄຳປຶກສາ, ສົມທົບກັນຢ່າງແໜ້ນແຟ້ນກ່ຽວກັບບັນດາບັນຫາທາງທະເລ, ເພີ່ມທະວີການຮ່ວມມືທາງທະເລ. ການນຳ2 ທ່ານໄດ້ເຫັນດີສືບຕໍ່ສະໜັບສະໜູນຊຶ່ງກັນແລະກັນຢູ່ບັນດາເວທີປາໄສສາກົນ, ພິເສດແມ່ນອາຊຽນແລະສະຫະປະຊາຊາດ.