(ສພຊ) - ໃນວັນທີ 8 ຕຸລາ ຜ່ານມາ ທີ່ສະພາແຫ່ງຊາດ, ສະຫາຍ ພົທ. ສຸວອນ ເລືອງບຸນມີ ກໍາມະການສູນກາງພັກ ຮອງປະທານສະພາແຫ່ງຊາດ ໄດ້ພົບປະກັບ ສະຫາຍ ພົທ. ເຈິ່ນ ກວາງ ເຟືອງ (Trần Quang Phương) ກໍາມະການສູນກາງພັກກອມມູນິດຫວຽດນາມ ຮອງປະທານສະພາແຫ່ງຊາດ ໃນໂອກາດນໍາພາຄະນະຜູ້ແທນສະພາແຫ່ງຊາດຫວຽດນາມ ຢ້ຽມຢາມ ແລະ ເຂົ້າຮ່ວມກອງປະຊຸມຜູ້ນໍາອາຊຽນ-ໄອປາ ຄັ້ງທີ 13 ໃນຂອບກອງປະຊຸມສຸດຍອດອາຊຽນ ຄັ້ງທີ 44 ແລະ 45 ທີ່ ສປປ ລາວ ເປັນເຈົ້າພາບ ແລະ ຢູ່ໃນບັນຍາກາດທີ່ສະພາແຫ່ງຊາດລາວ ພວມຂຸ້ນຂ້ຽວສຸມໃສ່ກະກຽມການເປັນເຈົ້າພາບກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45.

ໃນການພົບປະ, ສອງຝ່າຍໄດ້ສະເໜີທິດທາງການພົວພັນຮ່ວມມືໃນຕໍ່ໜ້າຄື: ສືບຕໍ່ຈັດຕັ້ງປະຕິບັດເນື້ອໃນຈິດໃຈຂອງບົດບັນທຶກວ່າດ້ວຍການຮ່ວມມືລະຫວ່າງສອງສະພາແຫ່ງຊາດ ລາວ-ຫວຽດນາມ ໃຫ້ເປັນຮູບປະທໍາຫຼາຍຂຶ້ນຕື່ມ; ສ້າງແຜນການຕິດຕາມກວດກາຮ່ວມບັນດາໂຄງການພື້ນຖານໂຄງລ່າງ ແລະ ການຊ່ວຍເຫຼືອຕ່າງໆໃນຂົງເຂດປ້ອງກັນຊາດ-ປ້ອງກັນຄວາມສະຫງົບ (ປກຊ-ປກສ) ທີ່ຝ່າຍຫວຽດນາມໃຫ້ການຊ່ວຍເຫຼືອລາວ; ຊຸກຍູ້ການຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງ ລະຫວ່າງສອງລັດຖະບານ ກໍຄືຜົນກອງປະຊຸມຂອງການນໍາຂັ້ນສູງສອງພັກ, ສອງລັດ ແລະ ບັນດາໂຄງການຮ່ວມມືຂອງສອງປະເທດ ໂດຍສະເພາະການພົວພັນຮ່ວມມືທາງດ້ານເສດຖະກິດ, ການຄ້າ ແລະ ການລົງທຶນ ລະຫວ່າງສອງປະເທດ ໃຫ້ຂະຫຍາຍຕົວສູງຂຶ້ນ ສົມຄູ່ກັບການພົວພັນຮ່ວມມືດ້ານການເມືອງ; ສະໜັບສະໜູນໃຫ້ຄະນະຮັບຜິດຊອບລະດັບຊາດທັງສອງຝ່າຍ ໃນການສ້າງປຶ້ມ 50 ປີ ແຫ່ງສາຍພົວພັນລະຫວ່າງສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດແຫ່ງ ສສ ຫວຽດນາມ, ການຮ່ວມມືຮອບດ້ານ ແລະ ພັດທະນາ ໃຫ້ສໍາເລັດຕາມທີ່ໄດ້ກໍານົດໄວ້ ເພື່ອເປັນມໍລະດົກໃຫ້ຄົນຮຸ່ນໜຸ່ມໄດ້ສຶກສາ, ສືບທອດ ແລະ ປົກປັກຮັກສາສາຍພົວພັນແບບພິເສດລາວ -ຫວຽດນາມ ມີໜຶ່ງດຽວໃນໂລກ ໃຫ້ໝັ້ນຄົງຕະຫຼອດໄປ; ແລກປ່ຽນບົດຮຽນກ່ຽວກັບການສ້າງກົດໝາຍ ແລະ ນິຕິກໍາໃຕ້ກົດໝາຍໃນຂົງເຂດວຽກງານ ປກຊ-ປກສ ແລະ ຊຸກຍູ້ຕິດຕາມວຽກງານຂົງເຂດອື່ນໆ; ສະໜັບສະໜູນ ແລະ ຮ່ວມມືກັນໃນການເຄື່ອນໄຫວໃນອົງການລັດຖະສະພາພາກພື້ນ ແລະ ສາກົນ.

(ຂ່າວ-ພາບ: ອານຸສອນ ພູມມີທອນ)