ທ່ານ ຈັດສຕິນ ທຣູໂດ, ນາຍົກລັດຖະມົນຕີການາດາ ໄດ້ຢ້ຽມຢາມສໍານັກງານໃຫຍ່ຂອງຄະນະກໍາມາທິການແມ່ນໍ້າຂອງສາກົນ ທີ່ ນະຄອນຫຼວງວຽງຈັນ, ສປປ ລາວ ເມື່ອວັນທີ 11 ຕຸລາຜ່ານມາ ເຊິ່ງຖືວ່າເປັນຫົວຫນ້າລັດຖະບານຜູ້ທໍາອິດ ຈາກຄູ່ຮ່ວມພັດທະນາ ຂອງ ຄະນະກໍາມາທິການແມ່ນໍ້າຂອງສາກົນ ທີ່ໄດ້ມາຢ້ຽມຢາມສຳນັກງານດັ່ງກ່າວ.

ການຢ້ຽມຢາມໃນຄັ້ງນີ້ ເນື່ອງໃນໂອກາດທີ່ ທ່ານ ນາຍົກລັດຖະມົນຕີການາດາ ໄດ້ເດີນທາງມາເຂົ້າຮ່ວມກອງປະຊຸມສຸດຍອດອາຊຽນການາດາ ສະໄໝພິເສດ ວ່າດ້ວຍການເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ ແລະ ກອງປະຊຸມທີ່ກ່ຽວຂ້ອງອື່ນໆ ຈັດຂຶ້ນເມື່ອບໍ່ດົນມານີ້ ທີ່ ນະຄອນຫຼວງວຽງຈັນ.

ການລົງຢ້ຽມຢາມ ສໍານັກງານໃຫຍ່ຂອງຄະນະກໍາມາທິການແມ່ນໍ້າຂອງສາກົນ ຄັ້ງນີ້ ເນັ້ນຢ້ຳເຖິງຄໍາໝາຍໝັ້ນທີ່ນັບມື້ນັບເຕີບໃຫຍ່ຂະຫຍາຍຕົວ ຂອງປະເທດ ການາດາ ຕໍ່ກັບການຄຸ້ມຄອງແມ່ນໍ້າຂອງແບບຍືນຍົງ ເຊິ່ງເປັນການສະໜັບສະໜູນການຫາລ້ຽງຊີບຂອງປະຊາຊົນຫຼາຍລ້ານຄົນໃນພາກພື້ນອາຊີຕາເວັນອອກສຽງໃຕ້.

ໃນລະຫວ່າງການຢ້ຽມຢາມ ທ່ານນາຍົກລັດຖະມົນຕີ ຈັດສຕິນ ທຣູໂດ ໄດ້ລົງພົບປະກັບຊາວປະມົງ ແລະ ຊາວກະສິກອນໃນທ້ອງຖິ່ນທີ່ອາໄສແມ່ນ້ຳເພື່ອຫາລ້ຽງຊີບ ພ້ອມກັບທ່ານນາງ ແມຣີ ອິງ, ລັດຖະມົນຕີວ່າການກະຊວງສົ່ງເສີມການສົ່ງອອກ, ການຄ້າສາກົນ ແລະ ການພັດທະນາເສດຖະກິດ, ແລະ ທ່ານ ອານຸລັກ ກິດຕິຄຸນ, ຫົວໜ້າກອງເລຂາ ຄະນະກໍາມາທິການແມ່ນໍ້າຂອງສາກົນ. ໃນການລົງຢ້ຽມຢາມ, ທ່ານນາຍົກລັດຖະມົນຕີການາດາ ໄດ້ພົບປະ, ສົນທະນາ ແລະ ແລກປ່ຽນໂດຍກົງກັບຊາວປະມົງ ແລະ ຊາວກະສິກອນ ພ້ອມທັງຮັບຟັງເລື່ອງລາວກ່ຽວກັບ ແມ່ນໍ້າຂອງທີ່ຫຼໍ່ລ້ຽງຊີວິດປະຈໍາວັນຂອງເຂົາເຈົ້າ. ທ່ານນາຍົກລັດຖະມົນຕີ ຮັບຊາບໂດຍກົງ ຈາກຊາວປະມົງ ແລະ ຊາວກະສິກອນ ກ່ຽວກັບສິ່ງທ້າທາຍທີ່ເຂົາເຈົ້າປະເຊີນ ຍ້ອນການປ່ຽນແປງຂອງດິນຟ້າອາກາດ ແລະ ສິ່ງແວດລ້ອມ ລວມທັງບັນຫາການຄຸ້ມຄອງນໍ້າຂ້າມຊາຍແດນ.

ທ່ານ ນາຍົກລັດຖະມົນຕີ ຈັດສຕິນ ທຣູໂດ ໄດ້ຍ້ອງຍໍບົດບາດຂອງຄະນະກໍາມາທິການແມ່ນໍ້າຂອງສາກົນ ໃນການຊຸກຍູ້ການປະສານສົມທົບກັນລະຫວ່າງບັນດາປະເທດແມ່ນ້ຳຂອງ - ກຳປູເຈຍ, ສປປ ລາວ, ໄທ ແລະ ຫວຽດນາມ ແລະ ຄວາມພະຍາຍາມຂອງຄະນະກໍາມາທິການແມ່ນໍ້າຂອງສາກົນ ໃນການຮັບປະກັນໃຫ້ບັນດາຊຸມຊົນທີ່ດຳລົງຊີວິດຢູ່ລຽບຕາມແມ່ນ້ຳຂອງ ສືບຕໍ່ໄດ້ຮັບຜົນປະໂຫຍດຈາກຊັບພະຍາກອນທີ່ອຸດົມສົມບູນຂອງແມ່ນໍ້າຂອງ.

ທ່ານ ຈັດສຕິນ ທຣູໂດ ໄດ້ກ່າວວ່າ: “ການາດາ ຮັບຮູ້ເຖິງຄວາມສຳຄັນອັນຈໍາເປັນຂອງແມ່ນ້ຳຂອງ ເຊິ່ງບໍ່ເປັນພຽງແຕ່ເປັນແຫຼ່ງກໍາເນີດຂອງການພັດທະນາເທົ່ານັ້ນ, ແຕ່ຍັງເປັນເໝືອນສາຍເລືອດທີ່ຫຼໍ່ລ້ຽງຊີວິດຂອງປະຊາຊົນນັບລ້ານຄົນ,”. “ຄະນະກຳມາທິການແມ່ນ້ຳຂອງສາກົນ ກໍາລັງໄດ້ເຮັດວຽກງານທີ່ສຳຄັນ ໂດຍການເຕົ້າໂຮມເອົາບັນດາປະເທດຕ່າງໆ ເຂົ້າມາຮ່ວມກັນຄຸ້ມຄອງ ແລະ ປົກປັກຮັກສາຊັບພະຍາກອນທີ່ໃຊ້ຮ່ວມກັນນີ້. ການາດາ ມີຄວາມຍິນດີສະໜັບສະໜູນພາລະກິດດັ່ງກ່າວ, ແລະ ພວກເຮົາພ້ອມທີ່ຈະສືບຕໍ່ຮ່ວມມືກັບ ຄະນະກຳມາທິການແມ່ນ້ຳຂອງສາກົນ ເພື່ອປົກປັກຮັກສາແມ່ນ້ຳຂອງໃຫ້ແກ່ຄົນຮຸ່ນຫຼັງ.”

ໃນໄລຍະຜ່ານມາ ການາດາ ເປັນຄູ່ຮ່ວມມືພັດທະນາຢ່າງເປັນທາງການກັບ ຄະນະກຳມາທິການແມ່ນ້ຳຂອງສາກົນ, ໂດຍການປະກອບສ່ວນເປັນເງິນຈຳນວນ 2 ລ້ານໂດລາການາດາ (ປະມານ 1,5 ລ້ານໂດລາສະຫະລັດ) ໂດຍຜ່ານກະຊວງການຕ່າງປະເທດການາດາ, ເຊິ່ງເປັນກະຊວງທີ່ຮັບຜິດຊອບວຽກງານພົວພັນທາງການທູດ, ການຄ້າລະຫວ່າງປະເທດ ແລະ ການຊ່ວຍເຫຼືອເພື່ອການພັດທະນາ. ເງິນສະໜັບສະໜູນດັ່ງກ່າວ ມີເປົ້າໝາຍນໍາໃຊ້ກັບບັນດາຂໍ້ລິເລີ່ມທີ່ສຳຄັນຕ່າງໆຂອງ ຄະນະກຳມາທິການແມ່ນ້ຳຂອງສາກົນ ລວມທັງການຄຸ້ມຄອງນ້ຳຜ່ານຊາຍແດນ, ການຕິດຕາມ ແລະ ການພະຍາກອນແມ່ນໍ້າ ໂດຍມີຈຸດສຸມພິເສດໃນການເພີ່ມທະວີຄວາມທົນທານຂອງຊຸມຊົນ ຕໍ່ກັບສິ່ງທ້າທາຍທີ່ກ່ຽວຂ້ອງກັບແມ່ນ້ຳ.

ທ່ານ ອານຸລັກ ກິດຕິຄຸນ, ຫົວຫນ້າກອງເລຂາ ຄະນະກໍາມາທິການແມ່ນໍ້າຂອງສາກົນ ໄດ້ກ່າວວ່າ: “ພວກເຮົາຮູ້ສຶກເປັນກຽດທີ່ໄດ້ຕ້ອນຮັບການຢ້ຽມຢາມຂອງ ທ່ານນາຍົກລັດຖະມົນຕີ ຈັດສຕິນ ທຣູໂດ, ເຊິ່ງເປັນປະຫວັດສາດໜ້າໃໝ່ໃນການຮ່ວມມືຂອງພວກເຮົາ ກັບ ການາດາ. “ການຊ່ວຍເຫຼືອຂອງການາດາ ເກີດຂຶ້ນໃນໄລຍະທີ່ພວກເຮົາເພີ່ມທະວີຄວາມພະຍາຍາມໃນການຄຸ້ມຄອງຊັບພະຍາກອນນ້ຳ ຂອງແມ່ນໍ້າຂອງ ເພື່ອຜົນປະໂຫຍດສູງສຸດ ຂອງປະຊາຊົນທັງໝົດໃນພາກພື້ນ. ພວກເຮົາຕັ້ງໜ້າສືບຕໍ່ການເປັນຄູ່ຮ່ວມມືທີ່ມີຄຸນຄ່າດັ່ງກ່າວນີ້ ໃນໄລຍະທີ່ພວກເຮົາພວມຮັບມືກັບສິ່ງທ້າທາຍໃນການຄຸ້ມຄອງຊັບພະຍາກອນນ້ຳແບບຍືນຍົງຮ່ວມກັນ.”

ຄະນະກໍາມາທິການແມ່ນໍ້າຂອງສາກົນ ແມ່ນອົງການຈັດຕັ້ງລະຫວ່າງລັດຖະບານ ທີ່ສ້າງຕັ້ງຂຶ້ນໃນປີ 1995 ເພື່ອຊຸກຍູ້ການເຈລະຈາ ແລະ ການຮ່ວມມືໃນພາກພື້ນໃນເຂດອ່າງແມ່ນໍ້າຂອງຕອນລຸ່ມ. ອີງຕາມສັນຍາແມ່ນ້ຳຂອງ ລະຫວ່າງກຳປູເຈຍ, ສປປ ລາວ, ໄທ ແລະ ຫວຽດນາມ, ຄະນະກໍາມາທິການແມ່ນໍ້າຂອງສາກົນ ຖືເປັນທັງເວທີການທູດດ້ານນ້ຳຂອງພາກພື້ນ ແລະ ເປັນສູນລວມຂໍ້ມູນຄວາມຮູ້ຂອງພາກພື້ນ ເພື່ອຄຸ້ມຄອງຊັບພະຍາກອນນ້ຳ ແລະ ສະໜັບສະໜູນການພັດທະນາແບບຍືນຍົງຂອງພາກພື້ນ.

ຂ່າວ: MRC