ວິທະຍຸກະຈາຍສຽງຫວຽດນາມລາຍງານ ໃນທ້າຍອາທິດຜ່ານມາວ່າ: ລາງວັນໂນເບລ ປີ 2024 ໄດ້ສ້າງຂີດໝາຍທີ່ສຳຄັນໃຫ້ແກ່ອາຊີ. ຂະນະທີ່ລາງວັນໂນເບລ ສາຂາວັນນະຄະດີ ແລະ ສັນຕິພາບ ໄດ້ມອບໃຫ້ ສ ເກົາຫຼີ ແລະ ຍີ່ປຸ່ນ ຊຶ່ງໄດ້ສ້າງຄວາມພາກພູມໃຈໃຫ້ແກ່ປະຊາຊົນຂອງສອງປະເທດ.

ທ່ານ ຮັນ ຄັງ ໄດ້ກາຍເປັນນັກປະພັນວັນນະຄະດີຄົນທຳອິດຂອງ ສ ເກົາຫຼີ ກໍຄືອາຊີ ທີ່ໄດ້ຮັບລາງວັນ ໂນເບລ ສາຂາວັນນະຄະດີ. ເຫດການດັ່ງກ່າວ ໄດ້ສ້າງກະແສນິຍົມປຶ້ມທີ່ບໍ່ເຄີຍມີມາກ່ອນ ໃນຂະແໜງຈຳໜ່າຍປຶ້ມຂອງ ສ ເກົາຫຼີ.

ໃນຂະນະດຽວກັນ, ທີ່ຍີ່ປຸ່ນ ພາຍຫຼັງໄດ້ຮັບຂ່າວວ່າ: ລາງວັນ ໂນເບລ ສາຂາສັນຕິພາບ 2024 ໄດ້ມອບໃຫ້ສະຫະພັນບັນດາອົງການຜູ້ປະສົບເຄາະຮ້າຍຈາກລະເບີດປະລະມານູ (Nihon Hidankyo), ໃນວັນທີ 11 ຕຸລາ ຜ່ານມາ, ທ່ານ ທານາກາ ເທຣູມິ ກຳມະການຜູ້ຕາງໜ້າ Nihon Hidankyo ໄດ້ກ່າວວ່າ: ນີ້ແມ່ນໝາກຜົນຂອງວິວັດການທີ່ແກ່ຍາວເປັນເວລາ 20 - 30 ປີ ທີ່ Nihon Hidankyo ໄດ້ຮຽກຮ້ອງ, ຕໍ່ສູ້ ກ່ຽວກັບການດັບສູນອາວຸດນິວເຄລຍຢ່າງສິ້ນເຊິງ. ອາວຸດນິວເຄລຍບໍ່ສາມາດຄົງຕົວພ້ອມກັບມວນມະນຸດໄດ້. ພວກເຮົາມີຄວາມພູມໃຈທີ່ສຸດທີ່ສະພາ Nobel ແລະ ໂລກ ໄດ້ຮັບຟັງ.