ວິທະຍຸກະຈາຍສຽງຫວຽດນາມ ລາຍງານໃນວັນທີ 14 ຕຸລາ ຜ່ານມາວ່າ: ໃນຂອບເຂດການຢ້ຽມຢາມ ຫວຽດນາມ ຢ່າງເປັນທາງການຂອງທ່ານ ຫຼີສຽງ ນາຍົກລັດຖະມົນຕີ ຈີນ,ໃນຕອນບ່າຍຂອງວັນທີ 13 ຕຸລາ ຜ່ານມາຢູ່ນະຄອນຫຼວງຮ່າໂນ້ຍ, ທ່ານ ຟ້າມມິງຈິງ ນາຍົກລັດຖະມົນຕີ ຫວຽດນາມ ພ້ອມດ້ວຍທ່ານ ຫຼີສຽງ ນາຍົກລັດຖະມົນຕີ ຈີນ ໄດ້ເຂົ້າຮ່ວມກອງປະຊຸມໂອ້ລົມສົນທະນາວິສາຫະກິດ ຫວຽດນາມ - ຈີນ ດ້ວຍຫົວຂໍ້: “ເພີ່ມທະວີການຮ່ວມມືຕ່າງຝ່າຍຕ່າງມີຜົນປະໂຫຍດ, ຮ່ວມມືກັນສ້າງອະນາຄົດ”.

ໃນການໂອ້ລົມສົນທະນາ,ເນັ້ນໜັກເຖິງການກຳນົດທິດດຶງດູດການລົງທຶນຕ່າງປະເທດ, ໃນນັ້ນ ມີການລົງທຶນທີ່ມີຄຸນນະພາບສູງຈາກ ຈີນ, ທ່ານ ຟ້າມມິງຈິງ ຢັ້ງຢືນວ່າ:ລັດຖະບານ ຫວຽດນາມ ໃຫ້ຄຳໝັ້ນສັນຍາຮັບປະກັນຂົງເຂດເສດຖະກິດທີ່ມີເງິນລົງທຶນຕ່າງປະເທດ ແມ່ນພາກສ່ວນສຳຄັນຂອງເສດຖະກິດ ຫວຽດນາມ; ຮັບປະກັນບັນດາສິດ, ຜົນປະໂຫຍດອັນຊອບທຳ, ຖືກຕ້ອງຕາມກົດໝາຍຂອງບັນດານັກລົງທຶນ; ຮັບປະກັນສະຖຽນລະພາບດ້ານການເມືອງ, ຄວາມເປັນລະບຽບຮຽບຮ້ອຍຄວາມສະຫງົບປອດໄພໃນສັງຄົມ; ຮັກສາສະຖຽນລະພາບດ້ານນະໂຍບາຍ, ປົວແປງສະພາບແວດລ້ອມດຳເນີນທຸລະກິດຢ່າງບໍ່ຢຸດຢັ້ງເພື່ອໃຫ້ບັນດານັກລົງທຶນມີຄວາມອຸ່ນອ່ຽນໃຈດຳເນີນທຸລະກິດ, ເຄື່ອນໄຫວຍາວນານຢູ່ ຫວຽດນາມ; ສ້າງພື້ນຖານໂຄງລ່າງລຸລ່ວງ; ກົນໄກປອດໂປ່ງ; ການຄຸ້ມຄອງອັດສະລິຍະ; ພ້ອມດຽວກັນນັ້ນ ວິສາຫະກິດ ກັບລັດ ແລະ ປະຊາຊົນ ພ້ອມກັນຮັບຟັງ ແລະ ເຂົ້າໃຈຊຶ່ງກັນ ແລະ ກັນ; ພ້ອມກັນແບ່ງປັນວິໄສທັດ ແລະ ການກະທຳເພື່ອຮ່ວມມື, ໜູນຊ່ວຍຊຶ່ງກັນ ແລະ ກັນ ພ້ອມກັນພັດທະນາຢ່າງວ່ອງໄວ ແລະ ຍືນຍົງ; ພ້ອມກັນເຮັດ, ພ້ອມກັນມີໄຊ, ພ້ອມກັນຊົມໃຊ້, ພ້ອມກັນພັດທະນາ; ພ້ອມກັນແບ່ງປັນຄວາມມ່ວນຊື່ນ, ຄວາມສຸກ ແລະ ຄວາມເອກອ້າງທະນົງໃຈ.

ສ່ວນທ່ານ ຫຼີສຽງ ຊີ້ແຈ້ງ 3 ເນື້ອໃນຈຸດສຸມ, ນັ້ນແມ່ນສືບຕໍ່ເຊື່ອມຕໍ່ຍຸດທະສາດພັດທະນາລະຫວ່າງສອງປະເທດ, ເອົາໃຈໃສ່ເຖິງການເຊື່ອມຕໍ່ກັນຢ່າງລຸລ່ວງລະຫວ່າງສອງປະເທດ. ປັດຈຸບັນ, ສອງປະເທດພວມຕັ້ງໜ້າຜັນຂະຫຍາຍການວາງແຜນຜັງເຊື່ອມຕໍ່ ຂໍ້ລິເລີ່ມ “ສອງແລວ, ໜຶ່ງເສັ້ນທາງເສດຖະກິດ”; ຕັ້ງໜ້າເຊື່ອມຕໍ່ພື້ນຖານໂຄງລ່າງຄົມມະນາຄົມທາງບົກ, ທາງລົດໄຟ, ດ່ານຊາຍແດນ, ທ່າກ່ຳປັ່ນ, ການບິນ; ຊຸກຍູ້ການໄປມາ, ພົວພັນແລກປ່ຽນປະຊາຊົນ; ຮ່ວມມືກັນຈັດຕັ້ງປະຕິບັດນະໂຍບາຍອຸດສາຫະກຳ. ທ່ານຫຼີສຽງ ໄດ້ຍົກຄວາມປາຖະໜາ 3 ປະການຄື: ເອົາໃຈໃສ່ບັນດານະໂຍບາຍໃຫຍ່ທີ່ສຳຄັນ, ເປັນເຈົ້າການກວ່າເກົ່າເພື່ອເຊື່ອມໂຍງການພັດທະນາປະເທດຊາດ, ບັນດາການເຊື່ອມຕໍ່ຍຸດທະສາດ; ໝູນໃຊ້ບັນດາຂໍ້ຕົກລົງສອງຝ່າຍ ແລະ ຫຼາຍຝ່າຍໃຫ້ເປັນຢ່າງດີ; ລະດົມບັນດາແຫຼ່ງກຳລັງ; ຊຸກຍູ້ການພັດທະນາຢ່າງກົມກຽວລະຫວ່າງຂະແໜງອາຊີບອຸດສາຫະກຳ; ຊອກຫາບັນດາຄູ່ຮ່ວມມືໃນລະບົບມູນຄ່າ. ຈີນ ສົ່ງເສີມວິສາຫະກິດ ຈີນ ເຊື່ອມຕໍ່ກັບວິສາຫະກິດ ຫວຽດນາມ.