ຂ່າວຕ່າງປະເທດລາຍງານໃນວັນທີ 14 ຕຸລາ ຜ່ານມາວ່າ:ກະ​ຊວງ​ການ​ຄ້າ​ແລະ​ອຸດ​ສາ​ຫະ​ກຳ​ຂອງ​ສິງ​ກະ​ໂປ ລາຍງານໂຕເລກຄາດຄະເນການຂະຫຍາຍຕົວຂອງ​ເສດ​ຖະ​ກິດ​ສິງ​ກະ​ໂປ ໃນໄຕມາດ​ສາມ (ກໍລະກົດ - ກັນຍາ) ຂອງ​ປີ 2024 ຢູ່ທີ່ 4.1% ເມື່ອ​ທຽບເປັນປີຕໍ່​ປີ ຊຶ່ງເພີ່ມຂຶ້ນຈາກການຂະຫຍາຍຕົວ 2.9% ໃນໄຕມາດສອງ.

ບົດລາຍງານລະບຸວ່າ: ຂະແໜງການຜະລິດໃນໄຕມາດສາມ ຂະຫຍາຍຕົວ 7.5% ເມື່ອທຽບເປັນປີຕໍ່ປີ ຊຶ່ງຟື້ນຈາກການຫົດຕົວ1.1% ໃນໄຕມາດສອງ, ໂດຍກຸ່ມການຜະລິດທັງໝົດ ຍົກເວັ້ນກຸ່ມການຜະລິດທາງຊີວະການແພດ ມີການຂະຫຍາຍຕົວເພີ່ມຂຶ້ນໃນໄຕມາດສາມ.

ດ້ານຂະແໜງການກໍ່ສ້າງຂະຫຍາຍຕົວ 3.1% ເມື່ອທຽບເປັນປີຕໍ່ປີ ດ້ວຍແຮງໜຸນຈາກຜົນຜະລິດການກໍ່ສ້າງຂອງເອກະຊົນ, ແຕ່ວ່າການຂະຫຍາຍຕົວໃນໄຕມາດສາມຕໍ່າກວ່າການຂະຫຍາຍຕົວ 4.8% ໃນໄຕມາດສອງ.

ສ່ວນຂະແໜງອຸດສາຫະກໍາການບໍລິການໃນໄຕມາດສາມ ຂະຫຍາຍຕົວ 3.3% ເມື່ອທຽບເປັນປີຕໍ່ປີ ຊຶ່ງຕໍ່າກວ່າການຂະຫຍາຍຕົວ 3.6% ໃນໄຕມາດສອງ.