ໃນວັນທີ 16 ຕຸລາ ນີ້, ກະຊວງການຕ່າງປະເທດ ໄດ້ຈັດພິທີປາຖະກະຖາເພື່ອສະເຫຼີມສະຫຼອງວັນການທູດລາວ ຄົບຮອບ 79 ປີ (12 ຕຸລາ 1945 – 12 ຕຸລາ 2024) ໂດຍໃຫ້ກຽດເປັນປະທານ ແລະ ຂຶ້ນບັນຍາຍຂອງ ທ່ານ ສະເຫຼີມໄຊ ກົມມະສິດ ກໍາມະການກົມການເມືອງສູນກາງພັກ ເລຂາຄະນະພັກກະຊວງ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ; ມີບັນດາຄະນະພັກ-ຄະນະນໍາກະຊວງ, ອະດີດທູດອາວຸໂສ, ພະນັກງານບໍານານ, ຄະນະກົມ ແລະ ບັນດາພະນັກງານ-ລັດຖະກອນ ພາຍໃນກະຊວງການຕ່າງປະເທດເຂົ້າຮ່ວມຢ່າງພ້ອມພຽງ.

ການປາຖະກະຖາໃນຄັ້ງນີ້ ແມ່ນເພື່ອລະນຶກເຖິງຜົນງານ ແລະ ຄຸນງາມຄວາມດີຂອງບັນພະບູລຸດ ກໍຄື ຫວນຄືນປະຫວັດສາດຂອງຊາດລາວທີີ່ປະຊາຊົນລາວ ມີຄວາມເອກອ້າງທະນົງໃຈ ຕໍ່ມູນເຊື້ອຮັກຊາດ, ມີຄວາມສາມັກຄີ ທີ່ເປັນປຶກແຜ່ນ ແລະ ອົງອາດກ້າຫານ, ເດັດດ່ຽວຕໍ່ສູ້ປົດປ່ອຍປະເທດຊາດ ກໍຄືການປົກປັກຮັກສາ ແລະ ສ້າງສາພັດທະນາປະເທດຊາດ, ທັງຍັງເປັນໂອກາດອັນດີ ສຳລັບພະນັກງານກະຊວງການຕ່າງປະເທດ ໂດຍສະເພາະ ນັກການທູດໜຸ່ມນ້ອຍຈະໄດ້ຮຽນຮູ້ຄຸນສົມບັດ, ກໍາໄດ້ປະຫວັດສາດ, ຄຸນງາມຄວາມດີ, ຄວາມອົງອາດກ້າຫານ ແລະ ຄວາມສາມັກຄີອັນໜຽວແໜ້ນ ແລະ ຄວາມເສຍສະຫຼະອັນສູງສົ່ງຂອງບັນພະບູລຸດຂອງຊາດເຮົາເພື່ອນໍາໄປຈັດຕັ້ງຜັນຂະຫຍາຍນໍາໃຊ້ເຂົ້າໃນການເຄື່ອນໄຫວວຽກງານການຕ່າງປະເທດໃຫ້ແທດເໝາະ ແລະ ສອດຄ່ອງກັບແນວທາງການພັດທະນາເສດຖະກິດ-ສັງຄົມ ຂອງ ພັກ-ລັດ ກໍຄື ເພື່ອຮັບປະກັນຄຸນນະພາບຂອງການປະຕິບັດໜ້າທີ່ການເມືອງການທູດຂອງຕົນ ໃຫ້ໄດ້ຮັບໝາກຜົນດີຍິ່ງໆຂຶ້ນ. ພ້ອມນັ້ນ, ກໍເປັນການສະເຫຼີມສະຫຼອງ ແລະ ຍ້ອງຍໍຜົນງານການເຄື່ອນໄຫວວຽກງານການຕ່າງປະເທດ ກໍຄືການຈັດຕັ້ງປະຕິບັດນະໂຍບາຍການຕ່າງປະເທດຂອງລາວ ທີ່ສອດຄ່ອງກັບສະພາບເງື່ອນໄຂຕົວຈິງໃນແຕ່ລະໄລຍະ ຕະຫຼອດ 79 ປີ ຜ່ານມາ.

ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ຍົກໃຫ້ເຫັນເຖິງປະຫວັດຄວາມເປັນມາ ແລະ ຄວາມໝາຍຄວາມສໍາຄັນ ຂອງວັນການທູດລາວ, ລວມເຖິງຜົນສໍາເລັດຂອງການເຄື່ອນໄຫວ ວຽກງານການຕ່າງປະເທດຂອງພັກ, ລັດຖະບານ ຕະຫຼອດ 79 ປີ ຊຶ່ງມາຮອດປັດຈຸບັນ, ສປປ ລາວ ໄດ້ສ້າງຕັ້ງສາຍພົວພັນການທູດກັບ 150 ປະເທດ, ມີສໍານັກງານຕາງໜ້າການທູດຂອງ ສປປ ລາວ ຢູ່ຕ່າງປະເທດ ຈໍານວນ 42 ແຫ່ງ (ໃນນັ້ນມີສະຖານເອກອັກຄະລັດຖະທູດ 28 ແຫ່ງ, ສໍານັກງານຜູ້ຕາງໜ້າຖາວອນ 3 ແຫ່ງ, ສະຖານກົງສູນໃຫຍ່ 10 ແຫ່ງ ແລະ ຫ້ອງການກົງສູນ 1 ແຫ່ງ); ມີກົງສູນກິດຕິມະສັກຂອງ ສປປ ລາວ ຢູ່ຕ່າງປະເທດ 17 ປະເທດ ແລະ ກົງສູນກິດຕິມະສັກຕ່າງປະເທດຢູ່ ສປປ ລາວ 15 ປະເທດ; ມີດ່ານສາກົນ 28 ແຫ່ງ; ມີການພົວພັນກັບພັກການເມືອງຕ່າງໆໃນໂລກ 140 ພັກໃນ 84 ປະເທດ ແລະ ມີ 19 ສະມາຄົມມິດຕະພາບກັບຕ່າງປະເທດ ແລະ 1 ຄະນະສັນຕິພາບ ແລະ ສາມັກຄີລາວກັບຕ່າງປະເທດ.

ພ້ອມກັນນີ້, ທ່ານ ສະເຫຼີມໄຊ ກົມມະສິດ ຍັງຍົກໃຫ້ເຫັນເຖິງຜົນສໍາເລັດໃນການເປັນປະທານອາຊຽນ ຄັ້ງທີ 3 ຂອງ ສປປ ລາວ ໃນປີ 2024 ພາຍໃຕ້ຄໍາຂວັນ: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ (ASEAN: Enhancing Connectivity and Resilience)”, ໂດຍສະເພາະ ກໍແມ່ນຜົນສໍາເລັດຂອງການເປັນເຈົ້າພາບ ແລະ ປະທານກອງປະຊຸມສຸດຍອດອາຊຽນ ຄັ້ງທີ 44-45 ແລະ ບັນດາກອງປະຊຸມສຸດຍອດອື່ນໆທີ່ກ່ຽວຂ້ອງ ຊຶ່ງສາມາດຍາດມາໄດ້ຜົນສໍາເລັດອັນໃຫຍ່ຫຼວງ ແລະ ໄດ້ຍົກບົດບາດຂອງ ສປປ ລາວ ໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນ ກໍຄືການປະກອບສ່ວນຂອງອາຊຽນຕໍ່ການຮັກສາສັນຕິພາບ, ຄວາມໝັ້ນຄົງ, ການພັດທະນາ ແລະ ການເຊື່ອມຈອດຂອງພາກພື້ນ ແລະ ສາກົນ. ທ່ານ ສະເຫຼີມໄຊ ກົມມະສິດ ຍັງໄດ້ຖືໂອກາດສະແດງຄວາມຂອບໃຈ ແລະ ຊົມເຊີຍມາຍັງບັນດາອ້າຍເອື້ອຍນ້ອງພະນັກງານກະຊວງການຕ່າງປະເທດທຸກຄົນ ແລະ ທຸກພາກສ່ວນທີ່ກ່ຽວຂ້ອງໃນການປະກອບສ່ວນຕາມພາລະບົດບາດຂອງຕົນ ເພື່ອເຮັດໃຫ້ການເປັນປະທານອາຊຽນ ແລະ ການເປັນເຈົ້າພາບກອງປະຊຸມຕ່າງໆ ໄດ້ຮັບຜົນສໍາເລັດຢ່າງຈົບງາມ.

ໃນຕອນທ້າຍ, ທ່ານ ສະເຫຼີມໄຊ ກົມມະສິດ ຍັງໄດ້ຊີ້ນໍາ ແລະ ໃຫ້ທິດເຍືອງທາງແກ່ ພະນັກງານກະຊວງການຕ່າງປະເທດ ໂດຍໄດ້ເນັ້ນວ່າ ໃນສະພາບການຂອງໂລກ ທີ່ມີການຜັນແປໄປຢ່າງໄວວາ ແລະ ສະຫຼັບສັບຊ້ອນ, ພະນັກງານກະຊວງການຕ່າງປະເທດ ຫຼື ນັກການທູດ ຕ້ອງສືບຕໍ່ຢຶດໝັ້ນແນວທາງການຕ່າງປະເທດສັນຕິພາບ, ເອກະລາດ, ມິດຕະພາບ ແລະ ການຮ່ວມມື ຢ່າງສະເໝີຕົ້ນສະເໝີປາຍ, ເປີດກວ້າງການຮ່ວມມືແບບຫຼາຍທິດ, ຫຼາຍຝ່າຍ ແລະ ຫຼາຍຮູບແບບ ຕາມທິດຊີ້ນໍາເພີ່ມມິດ ຫຼຸດຜ່ອນສັດຕູ ພາຍໃຕ້ຄໍາຂວັນ “ການທູດປ້ອງກັນເຫດ ແລະ ບຸກທະລຸ ເພື່ອພາລະກິດປົກປັກຮັກສາ ແລະ ພັດທະນາປະເທດຊາດ”; ພ້ອມທັງໄດ້ຢໍ້າຕື່ມອີກວ່າ: ນັກການທູດ ຕ້ອງເປັນຄົນທີ່ມີຄວາມຮູ້ກວ້າງຂວາງ, ມີຄວາມສຳນິຊໍານານ ດ້ານການພົວພັນສາກົນ, ມີຄວາມຮູ້ດ້ານເສດຖະກິດ, ກົດໝາຍ, ພາສາຕ່າງປະເທດ, ມີຄວາມຮູ້ດ້ານວັດທະນະທໍາ, ສາສະໜາ, ເຕັກໂນໂລຊີ, ຕ້ອງເປັນນັກເຈລະຈາ ແລະ ນັກໂຄສະນາທີ່ມີຄວາມສາມາດ ແລະ ຄ່ອງແຄ້ວ, ຕ້ອງມີຄວາມສະດຸ້ງໄວ ເພື່ອສາມາດເປັນເສນາທິການ ທີ່ດີໃຫ້ແກ່ພັກ ແລະ ລັດຖະບານໃນຂົງເຂດວຽກງານການຕ່າງປະເທດ ແນໃສ່ບັນລຸສອງໜ້າທີ່ຍຸດທະສາດຂອງພັກ ແລະ ລັດ ຕາມລະດັບຄາດໝາຍທີ່ວາງໄວ້ໄດ້ເປັນຢ່າງດີ.

ພາຍຫຼັງສໍາເລັດການປາຖະກະຖາ, ທ່ານ ສະເຫຼີມໄຊ ກົມມະສິດ ພ້ອມດ້ວຍຄະນະພັກ-ຄະນະນໍາກະຊວງ, ອະດີດທູດອາວຸໂສ, ພະນັກງານບໍານານ, ຄະນະກົມ ແລະ ບັນດາພະນັກງານ-ລັດຖະກອນ ພາຍໃນກະຊວງການຕ່າງປະເທດ ກໍໄດ້ຢ້ຽມຊົມຫ້ອງມູນເຊື້ອຂອງກະຊວງການຕ່າງປະເທດ ຊຶ່ງໄດ້ຈັດວາງສະແດງຮູບພາບ ແລະ ຜົນງານ ອັນສະແດງເຖິງມູນເຊື້ອການທູດລາວ ຕະຫຼອດ 79 ປີ ຜ່ານມາ.

ໃນໂອກາດດຽວກັນນີ້, ກໍໄດ້ມີການປະກາດພະນັກງານການນໍາກະຊວງ ທ່ານ ຕິ່ງ ສຸກສັນ ຮອງເລຂາຄະນະພັກະຊວງ ຮອງລັດຖະມົນຕີກະຊວງການຕ່າງປະເທດອອກຮັບອຸດໜູນບໍານານ, ມອບ-ຮັບໜ້າທີ່ຫົວໜ້າກົມອົງການຈັດຕັ້ງສາກົນ ລະຫວ່າງ ທ່ານ ນາງ ມຸກດາວັນ ສີສຸລິດ ຜູ້ໃໝ່ ແລະ ທ່ານ ດາວວີ ວົງໄຊ ຜູ້ເກົ່າ ແລະ ປະກາດປະດັບຊັ້ນການທູດແກ່ພະນັກງານກະຊວງການຕ່າງປະເທດເຊັ່ນ: ອັກຄະລັດຖະທຸດ ຈໍານວນ 1 ທ່ານ, ອັກຄະລັດຖະທູດທີ່ປຶກສາ ຈໍານວນ 7 ທ່ານ, ທີ່ປຶກສາ 20 ທ່ານ, ເລຂານຸການເອກ 30 ທ່ານ, ເລຂານຸການໂທ 50 ທ່ານ, ເລຂານຸການຕີ 7 ທ່ານ ແລະ ອານຸເລຂາ 3 ທ່ານ.

ຂ່າວ: ກະຊວງການຕ່າງປະເທດ