ຕອນເຊົ້າວັນທີ 17 ຕຸລານີ້, ກົງກັບຂຶ້ນ 15 ຄໍ່າ ເດືອນ 11 ລາວ ພສ 2567, ເປັນວັນບຸນປະວໍຣະນາອອກພັນສາ. ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ພ້ອມພັນລະຍາ ແລະ ຄະນະນໍານະຄອນປາກເຊ ຕະຫຼອດຮອດພໍ່ແມ່ປະຊາຊົນ ຊາວພຸດ ໄດ້ຮ່ວມໃສ່ບາດຢູ່ວັດຫຼວງປາກເຊ.

ການໃສ່ບາດຄັ້ງນີ້, ເປັນການສືບທອດຮີດຄອງປະເພນີ ງານບຸນປະວໍຣະນາອອກພັນສາ ກໍຄືວັດທະນະທຳອັນດີງາມຂອງຊາດ ທີ່ຄົນລາວຊາວພຸດ ສືບທອດຈັດຕັ້ງປະຕິບັດມາແຕ່ບູຮານນະການ ໃຫ້ຍືນຍົງຄົງຢູ່ຄຽງຄູ່ກັບຄົນລາວຕະຫຼອດໄປ. ຈາກນີ້ ກໍໄດ້ໃສ່ບາດ, ຖວາຍທານ ແລະ ຢາດນໍ້າ ເພື່ອເປັນການອຸທິດສ່ວນບຸນກຸສົນ ແລະ ສີລິມົງຄຸນໃຫ້ແກ່ຕົນເອງ - ຄອບຄົວ ໃຫ້ຢູ່ເຢັນເປັນສຸກ ທັງເປັນການເຜີຍແຜ່ວັດທະນະທຳອັນດີງາມຂອງຊາດອີກດ້ວຍ.

(ຂ່າວ-ພາບ: ທູນທອງໃຈ)