ໂດຍ: ວັນເພັງ

ໃນວັນທີ 17 ຕຸລາ 2024 ຫຼື ກົງກັບ ມື້ຂຶ້ນ 15 ຄໍ່າ ເດືອນ 11 ຂອງທຸກໆປີ ແມ່ນເປັນມື້ບຸນອອກພັນສາປະວໍຣະນາ ຊຶ່ງເປັນປາງບຸນໃຫຍ່ສຳຄັນໃນຮີດ 12 ຄອງ 14 ປະເພນີລາວ ຂອງຊາວພຸດທະສາສະນິກະຊົນ ໄດ້ພ້ອມພຽງກັນໄປໃສ່ບາດຖວາຍສັງຄະທານ ແດ່ພະສົງສາມະເນນ ຢູ່ຕາມວັດວາອາຮາມຕ່າງໆ ໃນຂອບເຂດທົ່ວປະເທດ ຕາມຮີດຄອງປະເພນີທີ່ສືບທອດກັນມາຮອດປັດຈຸບັນ.

ໂດຍສະເພາະຢູ່ນະຄອນຫຼວງວຽງຈັນ ພຸດທະສາສະນິກະຊົນ ກໍໄດ້ຮ່ວມກັນໃສ່ບາດຢູ່ຕາມວັດແຫ່ງຕ່າງໆ ຢ່າງຫຼວງຫຼາຍ, ຄຶກຄື້ນຖືກຕ້ອງຕາມຮີດຄອງປະເພນີ, ວັດທະນະທຳອັນດີງາມທີ່ເຄີຍສືບທອດກັນມາແຕ່ບູຮານນະການ, ພ້ອມຮັກສາໄດ້ຮີດຄອງປະເພນີອັນດີງາມຂອງລາວເຮົາ, ຮັກສາໄດ້ຄວາມເປັນລະບຽບຮຽບຮ້ອຍ, ສະຫງົບ ແລະ ປອດໄພ. ພ້ອມນັ້ນ, ບາງຄົນກໍມາເປັນຄອບຄົວ, ໝູ່ຄູ່, ຄູ່ຮັກ ແລະ ອື່ນໆ ໂດຍສະເພາະຜູ້ຍິງນຸ່ງສິ້ນໄໝ, ເສື້ອໄໝ, ບ່ຽງແພ, ມັດຜົມ, ເກົ້າຜົມ ຢ່າງສວຍງາມ, ຜູ້ຊາຍກໍນຸ່ງຖືສຸພາບຮຽບຮ້ອຍ ພ້ອມໃນມືຖືຂັນໃສ່ບາດ ຊຶ່ງກ່ອນຈະໃສ່ບາດກໍໄດ້ມີພິທີກຳທາງສາສະໜາ ເປັນຕົ້ນຟັງທຳມະເທດສະໜາ, ຮັບພອນ ແລະ ອື່ນໆ ຕາມຮີດຄອງປະເພນີລາວ.

ຢ່າງໃດກໍຕາມ, ງານບຸນດັ່ງກ່າວ ເປັນໜຶ່ງງານບຸນທີ່ມີຄວາມໝາຍສໍາຄັນຫຼາຍ ໃຫ້ທຸກຄົນຈົ່ງພ້ອມກັນອະນຸລັກຮັກສາວັດທະນະທໍາອັນດີງາມຂອງລາວເຮົາໃຫ້ໄວ້ຄຽງຄູ່ກັບຊາດລາວຕະຫຼອດໄປ.